Naʼyataain na Aluwataaushikana

17 Nalatapünaaka suluʼupünaa tü pueulokot Anfípolis jee suluʼupünaa Apolonia, nantaka Tesalónicamüin, eere eejatüin wanee ekirajülee nüchiki Maleiwa natuma na judíokana. 2 Jee maʼakaapuʼu sukuwaʼipa nutuma Pablo, ekerotushi nia chaa eejanale na judíokana. Apünüinkalaka nia kaʼi sünain nüchajaain sukuwaʼipa süpüla nayaawatüinjatüin saaʼu sünüiki tü Karaloʼuta Nüchikimaajatkat Maleiwa, naainjain tia sükalioʼu eemerawaa. 3 Nüküjain namüin jamüin choʼujaaka müliainjachin Cristo jee jamüin choʼujaaka nüsoʼireʼennajachin aaʼin süchikijee outaa otta nüküjain namüin sükajee tia karaloʼutakat jamüin shiimainka tia. Maʼwaishi nia namüin: «Eekajasaʼa chia nia Cristo, chi Jesús taashajaakai achiki jümüin». 4 Suluʼujee tia eeshii na wayuu anoujakana jee nümaatalashii naya Pablo nümaa Silas, müsia neʼe tü naaʼinrakat kojuyashii griego aʼwaajakana Maleiwa namaʼaleeya waneinnua jieyuu kojutukana atumawaa.

5 Achunjapejeʼe naaʼin na judíokana, müshiijeseʼe nasakajüin waneinnua wayuu mojulaashii warai makana neʼe metkaaraluʼupünaa, nashükajaka wayuu suluʼu tia pueulokot. Ashutushiijeseʼe naya nipialuʼumüin Jasón sünain achajawaa nüchiki Pablo nümaa Silas süpüla naapajatüin nekii namüin na wayuukana. 6 Süka nnojoliin naya napüla, niakalaka najaraijüin Jasón namaa waneinnua anoujashii namaʼanamüin na aluwataashiikana saaʼu tia pueulokot jee müsü nanüiki nekiiseruʼu: «Anaainnapa waʼaka na wayuu amojujakana sukuwaʼipa wayuu sainküin mmakat. 7 Ichaasa naya nipialuʼu Jasón, napüshuaʼa naya wayuukana nnojotsü noonooin amaa tü nuluwataakalü anain ‹César›,* shia neʼe naküjaka achiki eein wanee wayuu aluwataashi, Jesús nünülia chia makai naashin». 8 Neimmolojooko na wayuukana jee müshiʼiya na aluwataashiikana saaʼu tü pueulokot naapaiwaʼaya tia. 9 Nuwalaajakalaka Jasón namaa na waneinnua tü nneerü achuntunakat nümüin süpüla najütünajanain achiki. Nawalaajapa tia, najütünaka achiki.

10 Soʼuleʼeya aikat tia, nüjütünaka Pablo chaa Bereamüin natuma na anoujashiikana. Nantapa chamüin noʼunakalaka eemüin tü ekirajüleekat nüchiki Maleiwa natuma na judíokana. 11 Eekajasaʼa naya judíokana, naapaamaata amaalü tü Nünüikikat Maleiwa noulialeʼeya na chajanakana Tesalónica jee ekirajaʼawaishii naya weinshi sünain tü Karaloʼuta Nüchikimaajatkat Maleiwa süpüla natüjaain saaʼu shiimainrejeʼeya tü münakat namüin. 12 Suluʼujee tia watta naalii na wayuu anoujakana, anoujayaa müshiʼiya waneinnua jieyuu griego kojutukana atumawaa namaʼaleeya waneinnua tooloyuu. 13 Naapapa na judío chajanakana Tesalónica süchiki chajachin Pablo aküjain tü nünüikikat Maleiwa chaa Berea, oʼunushii naya chamüin sünain aashichijaa jee sünain ashükajaa wayuu. 14 Nüjütünamaataka Pablo sotpaʼamüin tü palaakat natuma na anoujashiikana, niakalaka makatüin Silas nümaa Timoteo. 15 Niʼikajaanaka Pablo chaa Atenasmüin natuma na wayuu kamaajanakana nia. Naleʼejaapa naya wayuukana, pansaasü pütchi namüin sünain niainjachin oʼunuin Silas nümaa Timoteo chaa eemüin Pablo.

16 Wanaa sümaa chajanain naya naʼatapajüin Pablo Atenas, aisü maʼin nümüin niʼrüin wattain saalii shiyaakua maleiwayaasü suluʼu tia pueulokot. 17 Nükaalinjainjeseʼe na judíokana namaʼaleeya waneinnua wayuu aʼwaajakana Maleiwa süpüla nayaawatüinjatüin saaʼu tü Karaloʼuta Nüchikimaajatkat Maleiwa. Naaʼinrüin tia suluʼu tü ekirajüleekat nüchiki Maleiwa, akaʼaya chaa metkaaraluʼu nükaalinjawalin weinshi wayuu eekai chain nüpüla. 18 Eepejeʼe waneinnua wayuu napüshi na kanüliakana «epicúreos»* jee napüshi na kanüliakana «estoicos»,* aaʼayajiraashii naya nümaa Pablo. Eeshii na makana anüiki sünain asakiraa: «¿Kasakajasaʼa nüküjeein wamüin chi koyoroloikai?». Eetaashii joo na makanaya: «Eeshijaʼa nüküjaire pütchi nachiki namaleiwase na naatakana oumain». Müsüleʼeya nanüiki mayaa süka nüküjain Pablo tü pütchi anakat maʼin nüchiki Jesús jee süchiki nüsoʼiraain aaʼin. 19 Nütaʼünakalaka Pablo jee nümaanaka saaʼumüin tü kanüliakat Areópago,* namakalaka naya wayuukana nümüin: «Püküja maa wamüin tia jeketükat sukuwaʼipa anoujaa. 20 Pikirajüin waya sünain wanee kasa nnojoyütkalia waapüin achiki, watüjaweepejeʼe maʼin saaʼu jamaluʼuluin shia». 21 Na wayuu chejeʼewaliikana Atenas otta na alatapünaakana chapünaa, kamalainsü maʼin namüin aashajawaa jee aapajaa süchiki kasa nnojoyütkalia natüjaain aaʼu. Shia neʼe naainjawaika tia jimatapa naya. 22 Nüshaʼwalaaka Pablo pasanain sünain tü kanüliakat Areópago jee nümakalaka:

«Jia wayuu yaakana Atenas, jaʼyasü jaaʼu kanoulain maʼin jia nanain na maleiwakana noulialeʼeya na wane wayuukana. 23 Wanaa sümaa warai tamüin, teʼrajawaain tamüsü tü kasa juʼwaajakat, teʼrakalaka wanee pütchi sünain wanee aʼajülee müsü mayaa: ‹Nümüinjatü wanee maleiwa meʼraajuukai›. Chi Maleiwa taashajaakai achiki jümüin, niajaʼa chi juʼwaajakai sümaa nnojolin jiʼraajüin nia. 24 Chi Maleiwa kakumainkai tü mmakat jee süpüshuaʼa tü kasa eekat saaʼu, nia chi Laülaashikai saaʼu süpüshuaʼa tü kasa chakat iipünaa jee tü kasa yaakat mmapaʼa. Nnojoikalaka nia kepiain suluʼu wanee miichi sukumala wayuu. 25 Nnojoishi nia achuntuin kaalinwaa sümüin wayuu, ¿kasakaʼa isain nüchiki? Nia kataka atuma soʼu wayuu, nia asanatka atuma saaʼin jee naapüin kasa süpüshuaʼa sümüin. 26 Nünainjee waneeshia wayuu, nukumajüin Maleiwa napüshuaʼa na wayuukana süpüla kepiainjanain naya sainküinpünaa tü mmakat jee nüküjain joujainjatüin sülatüin wanee kasa sümaa niʼitaain jalainjanain kepiain na wayuukana. 27 Naainjain tia Maleiwa süpüla nachajaainjachin nüchiki. Nachajaalejeʼeya maʼin nüchiki, nanteechi anain, süka jamüin, nnojoishi wattain nia woulia. 28 Katoʼuchii waya nutuma, warai müshii waya jee wayuushii waya nutuma. Eeshiʼiya waneinnua ashajülii jaʼakajee jiakana makana anüiki mayaa: ‹Nüchonniʼiya waya›.

29 »Saaʼujee nüchonniin waya Maleiwa, nnojotsü süpüla jülüjain waaʼin müin chi Maleiwakai maʼaka saaʼin wanee kasa eekai saainjuushin süka ooro, pülaata jee müsia ipa. Nnojoishi müin nia maʼaka saaʼin wanee kasa eekai sukumajuushin jee eekai shiyuʼluushin suluʼujee shikii wayuu. 30 Shiimainsaʼaya saaʼinrapuʼuin wayuu tia süka nnojoluin sütüjaain saaʼu mojuin shia, nuuʼulaapejeʼe shia Maleiwa. Aluʼusaʼa maaʼulu yaa, nuchuntuin sümüin wayuu maʼleekalia sainküinpünaa mma shiyaawajaainjatüin suulia saainjala. 31 Niʼitaain chi Maleiwakai wanee kaʼi süpüla süsalainjatüin saainjala wayuu nutuma, lotuinjatü sukuwaʼipa tia makat, naainjainjatü shia nükajee wanee wayuu nüneekakai süpüla tia. Wayuukai chia, nüsoʼireʼera aaʼinchi nia süchikijee outaa süpüla sütüjaanajatüin aaʼu shiimainjaʼa maʼin nüneekuushin».

32 Naapaiwaʼaya na wayuukana süchiki asoʼirawaa aaʼin, eeshii na kemeeʼerainpalakana nia otta eeshii na makana anüiki mayaa: «Waapajeerü pünüiki soʼu wane kaʼi». 33 Oʼunushijeseʼe Pablo. 34 Eepejeʼe waneinnua wayuu nümaatalashii Pablo jee anoujashii naya. Noʼutku naya wayuukana nia Dionisio, laülaashi nia suluʼu tü laülaapia chakat Areópago jee eejatü wanee wayuu kanüliasü Dámaris namaʼaleeya waneinnua wayuu.