Génesis
8 Nnojoishi motuin Noé naaʼin Maleiwa, nnojotsü motuin naaʼin tü wüchii wünaʼapüjatkat otta tü mürüt eejatkat nümaa Noé suluʼu tü anuwakat. Süwawatkalaka wanee joutai nutuma Maleiwa süpüla shiyoolojuinjatüin tü wüinkat. 2 Müsü süsürünnakai aaʼin tü wüin chajatkat sirumatuʼu, shiyüʼülaaka tü juyakat. 3 Süshakajaka tü wüinkat, shiyoolojoko sülatapa 150 kaʼi. 4 Soʼu polooin akaratshimüin sükalia tü akaratshikat kashi, atükaasü tü anuwakat saaʼu tü uuchi kanüliakalü Ararat. 5 Mekietsat kashi shiyoolojoko oʼu tü wüinkat. Shiiʼiyalaaka shiʼichi tü uuchikalüirua soʼu tü palajatkat kaʼi soʼunnaa tü polookot kashi.
6 Nujutatkalaka Noé shiwentaanase tü anuwakat sülatapa pienchi shikii kaʼi. 7 Nüjütaka wanee wüchii kanüliasü cuervo, oʼunawaisü shia jee aleʼejawaisü shia suluʼumüin tü anuwakat josoleepaʼaya tü mmakat.
8 Nüjütaka mapa Noé wanee toomasü süpüla nütüjaain saaʼu shiyoolojüle tü wüinkat. 9 Süleʼejaka süchikuaʼa tü toomasükat suluʼumüin tü anuwakat, jama nnojoluin jalainjatüin suʼttuin süka jamatüin tü wüinkat. Niyurutka nütüna Noé süpüla nikerotirüin shia suluʼumüin tü anuwakat. 10 Naʼatapajaka Noé akaratshi kaʼi süpüla nüjütüin süchikuaʼa tü toomasükat. 11 Süleʼejaka tü toomasükat motsouupa, niʼrakalaka Noé shiʼichiruʼu süpana wanee wunuʼu kanüliasü olivo, irolu tia makat. Niyaawataka sükajee tia shiyoolojuin tü wüinkat. 12 Nüjütaka tü toomasükat akaratshi kaʼi mapa, nnojorüleeka süleʼejüin süchikuaʼa.
13 Maʼülaka tü wüinkat soʼu 601 nuuyase Noé, soʼu tü palajatkat kaʼi, noʼu chi palajachikai kashi. Naakatakalaka Noé süpüshi saajuna tü anuwakat, niʼrakalaka soosolooin tü wüinkat süpaʼajee tü mmakat. 14 Josoleeka tü mmakat soʼu tü piamakat shikii akaratshimüin kaʼi, noʼu chi piamakai kashi.
15 Anuukalaka nünüiki chi Maleiwakai nümüin Noé: 16 «Pujuʼita suluʼujee tü anuwakat sümaa puʼwayuuse, püchonnii otta naʼwayuuse na püchonniikana. 17 Pujuʼitiraleejeetka süpüshuaʼa tü kasa eekat pümaa, wüchii waawataka iipünaapünaa, mürüt, wüchii wünaʼapüjatka otta müsia wüchii lemütüsüka, jouleetkalaka shia süpaʼa tü mmakat, kachonjeerü jee watteerü saalii».
18 Nujuʼitaka Noé sümaa tü nuʼwayuusekat, namaa nüchonnii otta naʼwayuuse na nüchonniikana. 19 Ojuʼitüsiaʼaya süpüshuaʼa tü kasa eekai katüin soʼu sümaa naatayaa sümüin sukuwaʼipa, wüchii eekai lemütüin, eekai waawatüin iipünaapünaa otta süpüshuaʼa tü eekat süpaʼa tü mmakat. 20 Nukumajaka mapa Noé wanee aʼajülee süpüla nuʼutuinjachin saaʼin mürüt jee naʼajüin shia nümüin Jehová jee naʼajüin wüchii wuleka saashin wayuu. 21 Jemetakalaka maʼin seejuu nümüin Jehová tü aʼajünakat nümüin, anuujeseʼe nünüiki Jehová nüleʼeruʼu: «Nnojorüleejeeria taaʼinrüin wanee kasa mojeetka atuma tü mmakat, jama süleʼeruʼutüjülüinña wayuu süchiki aaʼinraa kasa mojusü tepichiiwaʼaya shia. Müiria nnojoluin tajaʼttirüin süka wanee juya miyoʼu maʼin süpüshuaʼa kasa eekai katüin soʼu. 22 Noʼujeʼereeya kaʼikai chii, apünajeerü wayuu, kachonjeerü aʼttiee, aijeerü jemiai, aijeerü walatshi, joutaleʼujeerü, juyapoʼujeerü, soʼukaijeerü jee saʼwaijeerü».