Génesis
45 Naapapa José tü namakat, isaka nüchiki nüchecherüin naaʼin suulia aʼyalajaa noʼupala na nüchepchiakana. Emetutkalaka nünüiki sünain maa: «Jujuʼita jüpüshuaʼa yaajee». Niapa neʼe apütaain José namaa na nuwalayuukana, nüküjain namüin jaralin nia.
2 Emetutkalaka maʼin nikiisa José sünain aʼyalajaa, saapünakalaka natuma na egipciokana namaʼaleeya na nipialujunakana faraón. 3 Anuujeseʼe nünüiki José namüin na nuwalayuukana: «Taya José. ¿Ichaayüiya chi tashikai?». Yüütaka neʼe na nuwalayuukana nuulia süka moʼooin naya. 4 Anuukalaka nünüiki José namüin na nuwalayuukana: «Jürütkaa maa tanainmüin». Arütkaashiijeseʼe naya nünainmüin.
Ayatakalaka müin nünüiki namüin: «Taya José chi jimüliakai, chi juikakai Egiptomüin. 5 Nnojo jiʼinnaajiraain sünain juiküin taya jee nnojo mojuin jaaʼin. Nuluwataainreʼe taya Maleiwa yaamüin jüpüleerua süpüla suʼttaainjatüin wayuu süchikumüin outaa. 6 Piamairü joo juya nüka chii aika oʼu jamü yaa Egipto, isayütka jaʼrai juya sooʼomüin. Soʼunnaa tia nnojoleerü jaralüin ajaralüin jee akotchojuin süchon aʼttiee. 7 Nuluwataainreʼeya taya Maleiwa yaamüin jüpüleerua süpüla ayatüinjanain katüin joʼu sükajee naaʼinrüin kasa pülasü jüpüleerua, eejeenakalaka na apütaakana jaʼakajee yaa saaʼu tü mmakat. 8 Nia aluwataaka taya yaamüin chi shiimainshikai suluʼu Maleiwain, nnojoishii jiain kaluwanaajalain taya. Nuluwataainreʼe taya süpüla tayainjachin alanaʼaleein naʼakajee na aküjakana nümüin faraón* tü naaʼinrajatkat, süpüla shiʼitaanüin tajapuluʼu tü kasa eekat nipialuʼu faraón jee süpüla taluwataainjachin saaʼu Egipto.
9 »Anashii juʼunamaatüle eemüin chi tashikai otta meerü jünüiki nümüin: ‹Anuule tü nümakat José chi püchonkai: «Niʼitaainre taya Maleiwa süpüla süʼlaülajanain taya süpüshuaʼa tü mmakalü Egipto. Anashi püntüle yaamüin eere taya, nnojo koulain pia. 10 Kepieechi pia taʼütpaʼa suluʼu tü mmakat Gosén. Cheechi pia namaa püchonnii, püikeyuu, paʼanneetse, pükaʼülain, püpaaʼase jee süpüshuaʼaleeya tü kasa pümaʼanakat. 11 Eejeetsa tatuma tü piyaalujutkat, jama choʼujaayülüin jaʼrai juya süpüla sajaʼttüin tü jamükat. Eekajasaʼa nnojorüle müin sukuwaʼipa tia, ajaʼtteerü tü kasa eekat pümaʼana jee tü namaʼana na pipialujunakana»›. 12 Jiʼraleeinsaʼaya wanaa nümaa Benjamín shiimainña tayain aashajaain jümaa. 13 Jüküja nümüin chi tashikai süchiki kapülain taya saaʼin wayuu yaa Egipto jee süchiki süpüshuaʼa tü kasa jiʼrakat. Anashii juʼunamaatüle jüntiraiwa chi tashikai yaamüin».
14 Nukoʼojookalaka José nünain Benjamín chi nimüliakai sümaa niʼyalajüin, niʼyalajiraaka Benjamín wanaa nümaa. 15 Nutuʼlaka José nawalapaʼa na nuwalayuukana, nukoʼojooka nanain sümaa niʼyalajüin. Naashajaakalaka na nuwalayuukana nümaa süchikijee tia.
16 Talatakalaka naaʼin faraón namaʼaleeya na nüchepchiakana naapapa süchiki chaa nipialuʼu nantüin na nuwalayuukana José. 17 Anuukalaka nünüiki faraón nümüin José: «Püma namüin na puwalayuukana noʼonoiwa nachise saaʼu napüliiküse,* noʼuneenakalaka suluʼu tü mmakat Canaán. 18 Anakajaʼa nantirüle yaamüin chi nashikai namaa na napüshikana. Taapeerü namüin tü kasa anasü eekat suluʼu tü mmakalü Egipto, ekeena naya süchon aʼttiee anaka maʼin eeka suluʼu tü mmakalü Egipto. 19 Püma namüinña nalüʼüjain eʼejetuu yaajee Egiptojee süpüla nantirüinjanain nachonnii, naʼwayuuse, nantiraleejeechia chi nashikai suluʼu tü eʼejetuukat. 20 Nnojo shapaain jaaʼin saaʼu tü kasa eekat jümaʼana süka jieenain kamüinka süpüshuaʼa tü kasa anasü yaakalü Egipto».
21 Naaʼinrakalakaʼaya tia na nüchonniikana Israel. Naapüinña José tü eʼejetuukat namüin maʼaka nuluwataain shia faraón, kemiakalaka naya nutuma süpüla neküinjatüin shia wopuluʼu. 22 Nüsülajaka nasheʼin jekennuu waneʼewai nakua, nüsülajapejeʼe nümüin Benjamín 300 nneerü aainjuushika süka pülaata jee müsia jaʼraisü kuluulu jekennuu. 23 Nuluwataakalaka José nümüin chi nüshikai poloosü püliikü sümaajatka kasa anasü eeka suluʼu tü mmakalü Egipto sümaʼaleeya poloosü püliikü* sümaajatka trigo jee waneirua eküülü nimiainjatka chi nüshikai wopuluʼu. 24 «Nnojoishiisaʼa aʼülüjiraakuʼu müinjana jia wopuluʼu», nümakalaka José namüin na nuwalayuukana namaʼichiki. Nüjütakalaka naya süchikijee tia.
25 Oʼunushiijeseʼe naya Egiptojee, nantakalaka Canaánmüin nümaʼanamüin Jacob chi nashikai. 26 Anuujeseʼe nanüiki nümüin chi nashikai: «Katoʼuchisaʼa José, aluwataashi nia saaʼu süpüshuaʼa tü mmakalü Egipto». Nnojotpejeʼe patatayaain naaʼin Jacob süka nnojolin nunoujain sünain tü namakat nümüin. 27 Atalatalaapejeʼe naaʼin Jacob nüchikuaʼa naküjapa nümüin tü nümakat José jee niʼrapa tü eʼejetuu nuluwataakat José süpüla nümaanüinjachin. 28 Anuujeseʼe nünüiki Israel: «Shiimaintaajaʼa tü jümakat, katoʼuchiyaʼala José chi tachonkai. Anakajaʼa toʼunule teʼraiwa nia süpülapünaa outaa».