Palajatka karaloʼuta namüinjatka na chajanakana Corinto
1 Karaloʼutakat tüü, tashajala tayakai Pablo, anii tamaa chi wawalakai Sóstenes. Aneekünüshi taya nutuma Maleiwa süpüla taluwataaushinjachin nutuma Cristo Jesús. 2 Karaloʼutakat tüü, namüinjatü na anoujakana nünain Maleiwa chaa Corinto, jümüinjatü jiakana aneekuushikana süpüla juushikajaain süchiirua nukuwaʼipa Cristo Jesús. Aneekuushi jia wanaa namaa napüshuaʼa na eekana sainküin mmakat jee eʼitaakana naaʼin nünain chi Waseñotsekai Jesucristo, Naseñotse nia jee Waseñotse niaya.
3 Kasataalejeseʼe kamaneein jümüin chi Washikai Maleiwa jee müshia chi Señotkai Jesucristo, kasataalejeseʼe jimatüin jaaʼin nutuma.
4 Taapüin analuʼutkat waneepia nümüin chi Tamaleiwasekai süka kamaneein nia jümüin saaʼujee juushikajaain süchiirua nukuwaʼipa Cristo Jesús. 5 Anasü jukuwaʼipa nutuma Maleiwa süka paaʼinwain jia nümaa Cristo. Nikirajüin jia süpüla jikirajüinjatüin süchiki tü nünüikikat Maleiwa jee süpüla jiyaawatüinjatüin maʼin saaʼu tü nünüikikat. 6 Sükajee tia, junoujaitpa sünain tü pütchi aküjünakat nüchiki Cristo. 7 Sujuuna jaʼatapajüin niiʼiyalaainjachin chi Waseñotsekai Jesucristo, naapüin Maleiwa kasa anasü jümüin. 8 Ayateeriaʼaya nükatchinrüin jaaʼin chi Maleiwakai süpüla nnojoluinjatüin shiʼitaain jaaʼu wayuu jaainjain wanee kasa eekai mojuin soʼunnaa nükalia chi Waseñotsekai Jesucristo. 9 Nikeraajüin Maleiwa waneepia tü nümakat. Nüneeküin jia süpüla paaʼinwainjanain jia nümaa chi Waseñotsekai Jesucristo, chi Nüchonkai Maleiwa.
10 Tawalayuwaa tachuntuin maʼin jümüin saaʼu nünülia chi Waseñotsekai Jesucristo paaʼinwainjanain jia. Wanaawainjatü jaaʼin sümaa tü jaashajaakalü achiki jee wanaawainjatü tü jülüjakat jaaʼin. 11 Tawalayuwaa, taapa achikirü natuma na shipialujunakana Cloe mojujiraain jia. 12 Müsü tanüiki jümüin süka eein na makana anüiki jaʼakajee: «Nümaajaisa taya Pablo», «Nümaajaisa taya Apolos», «Nümaajaisa taya Cefas», «Nümaajaisa taya Cristo», eeshi chi makaʼiya. 13 Nnojoliika paaʼinwain na anoujakana nünain Cristo. Nnojoishi akachennüin Pablo sünain wanee wunuʼu süpüla outajachin nia jaaʼu, ¿aashi müin? ¿Woutiisataale jia saaʼu nünülia Pablo? 14 Taapüin analuʼutkat nümüin Maleiwa saaʼu nnojoliin woutiisain jia tatuma, niaʼala neʼe woutiisaka tatuma Crispo nümaa Gayo. 15 Suulia «Woutiisashii waya saaʼu nünülia Pablo» jümajüin. 16 Shiimainsaʼaya woutiisain tatuma na chajanakana nipialuʼu Estéfanas. Nnojotpejeʼe sotuin taaʼin eere nooʼomüin na woutiisakana tatuma. 17 Nnojoishi taya aluwataanüin nutuma Cristo süpüla woutiisainjatüin wayuu tatuma, nuluwataain taya süpüla taküjainjachin tü pütchi anakat maʼin.* Nnojotsü taküjain neʼe tia sümaa anayaain neʼe tanüiki, mülejeʼe sukuwaʼipa tatuma nnojotsüjeʼe kasain saamüin nükachennüin Cristo sünain wanee wunuʼu* süpüla outaa.
18 Tü pütchi aküjünakat süchiki nükachennüin Cristo sünain wanee wunuʼu, müsü alawaayaakai saaʼin namüin na wayuu ajaʼttinnüinjanakana, eekajasaʼa wamüin wayakana oʼtteʼennüinjanakana shia wanee kasa pülasü naainjaka chi Maleiwakai. 19 Anuu sünüiki tü Karaloʼuta Nüchikimaajatkat Maleiwa: «Yüüʼülaa meerü tatuma tü kasa nütüjakalü apüleerua wanee wayuu eekai kekiin maʼin jee tayouteerü achiki tü kasa nütüjakalü apüleerua wanee wayuu eekai nütüjain». 20 ¿Jalakaʼa joo chi wayuu kekiikai maʼin naashin? ¿Jalashi chi wayuu karaloʼutamaajachikai? ¿Jalashi joo chi wayuu atüjakai maʼin süpüleerua nünüiki saʼakajee wayuu?* Nnojotsü kasain saamüin nutuma Maleiwa tü sütüjakalü apüleerua wayuu. 21 Nnojoishi shiʼraajüin wayuu chi Maleiwakai süka kekiin maʼin naya naashin. Nnojotsü kasain anain apüla saashin wayuu tü pütchi waküjakat. Anashiipejeʼe nümüin Maleiwa nuʼtteʼerüin wayuu sünainjee saapaain sümaa tia pütchikat, sütüjaakalaka saaʼu wayuu kekiin maʼin chi Maleiwakai.
22 Na judíokana, eʼreeshii kasa pülasü jee na griegokana, achuntushii kekiwaa. 23 Eekajasaʼa wayakana, aküjashii pütchi süchiki nükachennüin Cristo sünain wanee wunuʼu süpüla outaa. Tia pütchikat airuʼutsü neʼe namüin na judíokana jee malaa neʼe shia namüin na nnojoliikana judíoin. 24 Na wayuu nüneekajalakana Maleiwa natüjaa aaʼu nükajee Cristo kekiin maʼin Maleiwa jee pülashin maʼin nia. Natüjaa aaʼu tia jaʼitashii judíoin jee griegoin naya. 25 Tü kasa nümaʼanajeejatkat Maleiwa, tü kasa nnojotkat kasain anain apüla saashin wayuu jee nnojotkat kasain saamüin saashin wayuu, kekiʼireesia maʼin shia suulia wayuu jee yalayalaleesia saaʼin.
26 Tawalayuwaa, jütüjaainnapa aaʼu jaraliin na wayuu aneekünakana nutuma Maleiwa, saashin wayuu nnojoishii wattain maʼin naalii na wayuu kekiikana maʼin, nnojoishii wattain naalii na kojutukana atumawaa jee nnojoishii wattain naalii na süchooinkana wayuu washinnuu. 27 Nüneeküin Maleiwa tü kasa nnojotkat kasain anain apüla saashin wayuu süpüla naapülijüinjanain na wayuu kekiijakana maʼin. Nüneeküin tü kasa nnojotkat kasain saamüin saashin wayuu süpüla naapülijüinjanain na wayuu yalayalakana aaʼin. 28 Nüneeküin Maleiwa tü kasa nnojotkat kasain anain apüla saashin wayuu, tü mojutukat sümüin, tü kasa nnojotkat kasain saamüin saashin wayuu, nüneeküin shia süpüla najaʼttirüinjatüin tü kasa kojutukat süküjainruʼu wayuu. 29 Naainjain tia Maleiwa süpüla nnojoluinjatüin jaralüin aʼwaataain suluʼu sukuwaʼipa nuʼupala. 30 Paaʼinwashii jia nutuma Maleiwa nümaa Cristo Jesús. Nüküjain wamüin Cristo Jesús kekiin maʼin Maleiwa, wulesü wakuwaʼipa noʼuluʼu Maleiwa, nuʼtteʼerüin waya nükajee Cristo saaʼujee naapajiraain nikii waaʼu. 31 Anuu tü sümakat tü Karaloʼuta Nüchikimaajatkat Maleiwa: «Chi wayuu aʼwaataakai suluʼu nukuwaʼipa, anashi nuʼwaataale saaʼu niʼraajüin Jehová».*