Génesis

25 Kaʼwayuusekalaka Abrahán nüchikuaʼa, Queturá sünülia. 2 Kachonkalaka shia mapa nutuma Abrahán, anuu nanülia na süchonniikana: Zimrán, Jocsán, Medán, Madián, Isbac jee müshia Súah.

3 Seba otta Dedán nanülia nüchonnii Jocsán.

Na nüchonniikana Dedán nia Asurim, Letusim jee müshia Leumim.

4 Na nüchonniikana Madián nia Efá, Éfer, Hanok, Abidá jee müshia Eldaá.

Süikeyuʼuleeya Queturá naya makana.

5 Naapaka mapa Abrahán süpüshuaʼaleeya tü kasa nümaʼanajatkat nümüin Isaac. 6 Asülajapejeʼe Abrahán namüin na süchonniikana tü piamasükat suwalaʼata nuʼwayuuse. Kataiwaʼaya noʼu nüjütüin na nüchonniikana wattamüin nuulia Isaac, chaa wüinpümüin naaʼujee. 7 Ciento setenta y cinco nuuyase Abrahán. 8 Nünaajakalaka Abrahán, eʼrüshi nia miyoʼuwaa, niʼikünaka suluʼu naamaka na nüpüshikana. 9 Niʼikünakalaka nutuma Isaac jee müshia Ismael suluʼu tü koʼushii chakat Macpelá suluʼuka nuumain Efrón, chi nüchonkai Zóhar chi hititakai, süʼütpaʼa Mamré. 10 Tia shia tü mma niyaʼlajakalü Abrahán noulia na nüchonniikana Het. Niʼitaanakalaka Abrahán yala saʼatoʼu Sara, tü nuʼwayuusekat. 11 Ayatüsia anain nukuwaʼipa Isaac nutuma Maleiwa süchikijee nünaajaain Abrahán. Kepiashi Isaac peje sünain Beer-Lahái-Roí.

12 Anuu tü nüchikimaajatkalü Ismael, chi nüchonkai Abrahán sümüin Agar tü wayuu chejeʼewatkalü Egipto, tü süchepchiakat Sara.

13 Anuukalaka nanülia na nüchonniikana Ismael wanaapünaa sümaa napüshi. Chi niʼirumakai Ismael nia Nebayot niakalaka eweetüin Quedar nüchikijee nümaʼaleeya Adbeel, Mibsam, 14 Mismá, Dumá, Masá, 15 Hadad, Temá, Jetur, Nafís jee müshia Quedemá. 16 Nüchonnii Ismael naya makana, tia shia tü nanüliakat wanaapünaa sümaa jalapuʼuin kepiain naya jee jalapuʼuin noʼonoopünaain. Poloo piamamüin naya, shikiipüʼü naya napüshi. 17 Ciento treinta y siete nuuyase Ismael, nünaajaakalaka, niʼikünakalaka suluʼu naamaka na nüpüshikana. 18 Kepiakalaka na nüchonniikana Ismael chaa eejee tü mmakat Havilá, peje sünain Sur, süʼütpaʼa Egipto chamüinreeya Asiria. Kepiashii naya naʼütpaʼa na nawalayuukana.

19 Anuu nachikimaajatü na nüpüshikana Isaac chi nüchonkai Abrahán.

Nia Abrahán nüshika Isaac. 20 Pienchi shikii juya Isaac wanaa sümaa nuʼwayuusein Rebeca, tü nüchonkat Betuel, chi arameo chejeʼewaikai Padán-Aram, nushunuu shia Labán chi arameokai. 21 Achuntapuʼushi maʼin Isaac nümüin Jehová kachoinjatüin tü nuʼwayuusekat süka maralüin shia. Naapakalaka Jehová nünüiki, ipuoutkalaka Rebeca tü nuʼwayuusekalü Isaac. 22 Ojuniraakuʼu müshii na süchonniikana Rebeca süleʼeruʼu, anuujeseʼe sünüiki sutuma tia: «Anasü outule taya suulia aikuʼu sümüin taleʼe». Süsakitpejeʼe Jehová süchiki tia. 23 Anuukalaka nünüiki Jehová sümüin: «Piamashii püchonnii* yalakana püleʼeruʼu, piamaseerü pueulo ojuʼitaka nanainjee sümaa katataawain, alanaʼaleejeeria wanee pueulo suulia tü wane. Achepchieejeechi chi epayaakai nutuma chi emülieekai».

24 Jemeyutkalaka Rebeca namaa na seinkeyuukana süchonnii. 25 Ishoshi maʼin chi palajachikai eweetüin sümaa kolin nia, mataashi kasheʼinkai naaʼin kuluulu aainjuushi süka süta mürüt. Müsüjeseʼe Esaúin nünülia. 26 Niweetakalaka chi emülieekai sümaa najapuluʼujuin shiineʼe nuuʼui Esaú. Eʼitaanüsüjeseʼe Jacob nünüliain. Aipirua shikii nuuyase Isaac soʼu jemeyuluin Rebeca namaa na piamashiikana süchonnii.

27 Miyoʼukalaka na tepichikana, atüjashi maʼin Esaú olojoo, kamalainsü nümüin waraittaa wünaʼapü. Aluʼujasaʼa Jacob wayuu anamia nia, kepiashi nia suluʼu miichi aainjuushi süka loona. 28 Aishi maʼin Esaú nüpüla Isaac süka niküin shiʼiruku tü nüsitkat, niapejeʼe alin maʼin süpüla Rebeca Jacob. 29 Nüleʼejakalaka Esaú soʼu wanee kaʼi sümaa mapüsain maʼin nia wünaʼapüjee, eejachikalaka Jacob nüpüla sünain aʼlakajawaa kisaawa. 30 Anuujeseʼe nünüiki Esaú nümüin Jacob: «Pümayawaata süchiirua türa, paapaiwa teküin süpüshi türa ishokolü oʼu pülakajaakat, outushi maʼin taya jamü». Müshijeseʼe Edom nümünüin. 31 Anuujeseʼe nünüiki Jacob nümüin: «Anakajaʼa paapüle shikii tamüin palajana tü aapünajatkat pümüin saaʼu eʼirumaain pia». 32 Asoutushijeseʼe Esaú nümüin: «¿Kasakai anaka apüla eʼirumaain taya motsoirüle taaʼin sutuma outuin taya jamü?». 33 «Paapa pünüiki tamüin palajana», nümakalaka Jacob nümüin. Naapakalakaʼaya nünüiki Esaú nümüin Jacob, naapüin shikii nümüin tü aapünajatkat nümüin saaʼu eʼirumaain nia. 34 Naapakalakaʼaya Jacob nümüin Esaú pan otta tü lenteeja kisaawa nüʼlakajaakat. Nikakalaka shia Esaú, emiraka nia, nuʼunakalaka süchikijee. Shia naaʼinraka Esaú tia süka mojutuin nümüin tü aapünakat nümüin saaʼu eʼirumaain nia.