Karaloʼuta namüinjatka na chajanakana Roma
4 ¿Kasache eeka süpüla waküjain nüchiki chi watuushikai Abrahán? 2 Jamüsüjaʼa süküjünüle lotuin nukuwaʼipa Abrahán sünainjee tü kasa naaʼinrakat, aʼwaataashijeʼe nia suluʼu tia, nnojoipejeʼe nia aʼwaataainjachin nuʼupala Maleiwa. 3 ¿Jamüsü sünüiki tü Karaloʼuta Nüchikimaajatkat Maleiwa nüchiki Abrahán? Müsü sünüiki mayaa: «Kanoulashi Abrahán nünain Jehová,* lotuitkalaka nukuwaʼipa noʼuluʼu suluʼujee tia». 4 Jamüshijaʼa niʼyataale wanee wayuu süpüla nipijaainjachin sünainjee, nnojotsü asülajalaain tü nneerü aapünakat nümüin saaʼu niʼyataain, jama nükanain shia sünainjee aʼyatawaa. 5 Eekajasaʼa naashin Maleiwa nnojotsü lotuin nukuwaʼipa wanee wayuu sünainjee neʼe tü kasa naaʼinrakat, anoujainjachi nia nünain Maleiwa süpüla lotuinjatüin nukuwaʼipa jaʼitashi wayuuin kaainjarai nia. 6 Nüküjainña David talatüin naaʼin wanee wayuu eekai lotuin akuwaʼipa naashin Maleiwa jaʼitashi nnojolin aʼyataain nia süchiirua tia, anuu nünüiki David: 7 «Anakuwaʼipalii na wayuu alatinnakana aainjala nutuma Maleiwa jee na nülaʼajaakana aainjala. 8 Anakuwaʼipaitaʼaleejaʼa chi wayuu nnojoikai sotokuʼu müin naaʼin Jehová* naainjala».
9 ¿Nayache neʼe anakuwaʼipaliika na wayuu achoteʼerakana süta nakorolo?* ¿Nayataapa anakuwaʼipaliin na wayuu nnojoliikana achoteʼerüin süta nakorolo? «Wayuu loto akuwaʼipachi Abrahán saaʼujee kanoulain nia», mataashii wamakai. 10 Loto akuwaʼipachi Abrahán naashin Maleiwa, ¿nüküjainche tia süchikijee süchotoonüin süta nükorolo Abrahán? ¿Nüküjataapa shia süpülapünaa tia? ¿Aashin nüküjain shia süpülapünaa nüchoteʼerüin süta nükorolo? 11 Shiasaʼa mapa, süchoteʼennaka süta nükorolo Abrahán süpüla sütüjaanajatüin aaʼu pansaain nünüiki Maleiwa nümüin süchiki wayuuin loto akuwaʼipachi nia sünainjee kanoulain nia, matüjülia nukuwaʼipa nnojoliiwaʼaya süchoteʼennüin süta nükorolo. Aainjünüsü tia, süpüla niainjachin nashin napüshuaʼa na wayuu kanoulakana mayaainjeʼe nnojoluin nachoteʼerüin süta nakorolo, eekalaka süpüla wayuuin loto akuwaʼipachii naya suluʼujee tia 12 jee süpüla nashinjachin Abrahán na wayuu achoteʼerakana süta nakorolo. Nnojoipejeʼe neʼe nashinjachin nia na wayuu achecheraakana süchiirua nachoteʼerüin süta nakorolo, nashinjachiaʼaya nia na wayuu ashatakana sukuwaʼipa nunoula nnojoliiwaʼaya nüchoteʼerüin süta nükorolo.
13 Nnojotsü sükajeejatüin wanee pütchi aküjünaka akajee nümüin Abrahán jee namüin na nüikeyuukana saapünajatüin nümüin süpüshuaʼa tü mmakat. Shia sükajee lotuin nukuwaʼipa noʼuluʼu Maleiwa, jama kanoulain nia. 14 Saapünüinjatülejeʼeya sümüin wayuu sükajee tü Pütchi Aapünakat nümüin Moisés tü kasa aküjünatüjütkalia achiki paala, nnojotsüjaʼamata kasain saamüin tü kanoulaakat otta tü pütchi apansaajünakat nümüin Abrahán nnojotsüjeʼe kasain anain apüla. 15 Shiimain maʼin kasalajaneerüin sümüin wayuu nnojorüle soonooin sümaa tü Pütchi Aapünakat nümüin Moisés. Akaajasaʼa nnojorüle wanee pütchi eekai aluwataanüin anain, nnojotsü süpüla kaainjalain wayuu.
16 Nüküjirüin Maleiwa wamüin tia pütchikat saaʼujee kanoulain waya, nüsülajala shia wamüin. Napüshuaʼa na nüikeyuukana Abrahán aapünüsü namüin tia pütchikat. Nnojotsü neʼe namüinjatüin na wayuu aapaakana sümaa tü Pütchi Aapünakat nümüin Moisés, namüinjatiaʼaya shia na wayuu makana anoula maʼaka nunoula Abrahán, chi washikai wapüshuaʼa. 17 Mataasü sümakai tü Karaloʼuta Nüchikimaajatkat Maleiwa: «Taneeküin pia süpüla süshinjachin pia watta saalii wayuu». Kanoulashi Abrahán nuʼupala Maleiwa, nia Maleiwa kataka atuma soʼu wayuu outusü otta nia aashajaakai süchiki wanee kasa eekai nnojoyülüin sülatüin, müsü eekaijaʼaya saaʼin nutuma. 18 Nütüjaa aaʼu Abrahán süshinjachin nia wayuu maʼleekalia mayaapejeʼe müin kapüleekai saaʼin tia. Nunouja anainrü tü münakat nümüin, tü makat mayaa: «Watteerü saalii püikeyuu». 19 Mayaainjeʼe nnojoluin sümatchinjaain tü nunoulakat, müsü shiakaijaʼa aaʼin amatchinjaain tü niʼirukukat saaʼin nümüin, müshijaʼaya outakai naaʼin soʼujee polooin shikii nuuyase jee nütüjaa aaʼu isairüin süchiki Sara kachonwaa, jama laülaairüin shia. 20 Sutuma nüpansaajüin nünüiki Maleiwa nümüin, nnojotsü wainmajüin naaʼin Abrahán, akatchinraapejeʼe naaʼin sutuma kanoulain nia otta nuʼwaajüin chi Maleiwakai suluʼujee tia. 21 Niʼitaain maʼin naaʼin Abrahán sünain nikeraajeerüin Maleiwa tü pütchi nüpansaajakat nümüin. 22 «Lotuitkalaka nukuwaʼipa noʼuluʼu Maleiwa» sutuma kanoulain nia.
23 «Loto akuwaʼipachi», nnojoipejeʼe niain neʼe münüin amüin nümüiwaʼa. 24 Müshiʼiya wayakana, loteeriaʼaya wakuwaʼipa sutuma kanoulain waya nünain chi Asoʼireʼerakai naaʼin chi Waseñotsekai Jesús. 25 Aapüna ekiichi süpüla outajachin nia saaʼu waainjala otta asoʼireʼenna aaʼinchi nia süpüla lotuinjatüin wakuwaʼipa noʼuluʼu Maleiwa.