Génesis
20 Nukolojeʼeraka Abrahán tü nipia aainjuushikat süka loona jee nukumajaka shia chaa suluʼu tü mmakat Négueb. Kepiakalaka nia pasanain sünain Cadés sümaa Sur. Soʼu chajachin nia kepiain Guerar, 2 «Tashunuu», maʼwaishi Abrahán sümüin Sara. Asaajinnüsüjeseʼe Sara nutuma Abimélec chi aluwataakai saaʼu Guerar, süntinnakalaka nümüin. 3 Nüʼlapüjaakalaka mapa Abimélec nutuma Maleiwa, anuujeseʼe nünüiki Maleiwa nümüin nüʼlapüinruʼu: «Outajachi pia saaʼujee türa wayuu püsaajirakat, kawayuusesüsaʼa shia». 4 Nnojoipejeʼe ainkaain Abimélec sümaa Sara. Anuukalaka joo nünüiki: «Jehovákalee, ¿pajaʼttireenache na wayuu suluʼukana mmakat tüü mayaainjeʼe maainjalain naya? 5 ‹Tashunuu türa wayuukot›, mataashi nümakai tamüin. ‹Tepaya chira wayuukai›, müsü shiakalia tamüinña, nnojotka jülüjain taaʼin mojuin tü kasa taainjakat jee nnojoishiaʼaya taya aaʼinreein wanee kasa eekai mojuin». 6 Anuukalaka nünüiki chi shiimainshikai suluʼu Maleiwain nümüin Abimélec: «Tatüjaa aaʼulu nnojoluin mojuin tü jülüjakat paaʼin, müshijeseʼe tataʼülüin akuwaʼipa pia suulia kaainjalajüin pia toʼupala jee tataʼüla akuwaʼipachi pia suulia püinkaain sümaa tia wayuukot. 7 Anakajaʼa püleʼejirüle türa wayuukot nümüin suʼwayuuse, tanüikimaajachisaʼa nia, achunteechi nia tamüin püpüleerua ayateechikalaka katüin poʼu, eekajasaʼa nnojorüle püleʼejirüin shia, outeechi pia namaʼaleeya na wayuu pipialujunakana».
8 Nütamaakalaka Abimélec wattachon maalü, neenajirüinjeseʼe na aʼyataashiikana nümüin, nüküjakalaka namüin süchiki süpüshuaʼaleeya tü kasa alatakat. Nainkuukalaka aaʼin na wayuukana naapapa tia. 9 Neenajinnakalaka Abrahán nutuma Abimélec süchikijee tia sümaa nümüin nümüin: «¿Jamüshikai makaʼa paainjala? ¿Kasa taainjalaka puulia süpüla kaainjalainjachin taya putuma jee kaainjalainjanain putuma na wayuu taluwataakana aaʼu? Mojusü maʼin tü paainjakat». 10 Ayatakaʼaya naashajaain Abimélec nümaa Abrahán sünain maa nümüin: «¿Kasa paaʼinraka eeʼiree tia?». 11 Asoutushijeseʼe Abrahán nümüin sünain maa: «‹Noʼuteechi aaʼin taya na wayuu yaajanakana sünainjee tü taʼwayuusekat, jama nnojolin kojutuin maʼin Maleiwa sümüin wayuu yaajannuu›, müsüleʼe taaʼin taleʼeruʼu makaʼa taainjain tia. 12 Shiimainpejeʼeya tashunuuin shia, kashijiraashii waya, shiajaʼa neʼe naatain tü weikat. Taʼwayuuseitkalaka shia müinmaʼa yaa. 13 Soʼu nuluwataain taya Maleiwa sünain ojuʼitaa nipialuʼujee chi tashikai jee sünain toʼonookuʼu tamüin suluʼupünaa wanee mma, tachuntatüjülia sümüin sünain maa: ‹Anakajaʼa pümülialaale taalin, jalapünaale waya oʼunuin püküja maa sümüin wayuu pipayain taya›».
14 Nüsaajirakalaka Abimélec anneerü, paaʼa sümaʼaleeya wayuu achepchiee, naapakalaka shia nümüin Abrahán jee nüleʼejirüinña Sara nümüin Abrahán. 15 Ayataka naashajaain Abimélec nümaa Abrahán sümaa nümüin nümüin: «Anuusa toumain, püneeka tü püchekakat süpüla kepiainjachin pia suluʼu». 16 Anuu joo nünüiki Abimélec sümüin Sara: «Anuu taapüin 1.000 nneerü aainjuushika süka pülaata nümüin chi pipayakai, tia nneetkat süpülajatü nayaawatüin saaʼu na wayuu pümaajanakana jee müsia wayuu maʼleekalia nnojoluin kasain paainjalain, nnojoleetka süküjain wayuu eein wanee kasa mojuka putuma». 17 Nuchuntakalaka Abrahán nüpüleerua Abimélec nümüin chi shiimainshikai suluʼu Maleiwain, nükaalinjünaka Abimélec nutuma Maleiwa, kachonkalaka tü nuʼwayuusekat sümaʼaleeya tü nüchepchiakalüirua. 18 Marat paala nutuma Jehová süpüshuaʼa tü jieyuu chajatkat nipialuʼu Abimélec, alatüsüleʼeya tia süka nüsaajirüin Abimélec Sara, tü nuʼwayuusekalü Abrahán.