Levítico

18 Ayatakalakaʼaya naashajaain Jehová nümaa Moisés sümaa nümüin nümüin: 2 «Anuu tü pünüikinjatkat namüin na israelitakana: ‹Tayasa Jehová chi Jümaleiwasekai. 3 Nnojo müin jukuwaʼipa maʼaka nakuwaʼipa na wayuu chakana Egipto na kepiapuʼukana aʼaka jia jee nnojo jaaʼinrüin tü naaʼinrakat na wayuu chakana Canaán, tü mma eeʼewaliire jia tatuma. Nnojo jaaʼinrüin tü aluwataanakalü anain naya. 4 Jaapaa sümaa tü taluwataakalü anain, jaaʼinra tü taluwataakalü anain jee joonoo sümaa tanüiki. Tayasa Jehová chi Jümaleiwasekai. 5 Oonooinjana jia sümaa tü tamakat jee sümaa tü taluwataakalü anain, kateechi oʼu chi wayuu jaa makai sümüin tü taluwataakalü anain. Tayasa chi kanüliakai Jehová.

6 »›Nnojoishi eeinjachin wanee wayuu jaʼakajee eekai noʼoteein nümalain saaʼu nüpüshi shiiʼiree nuʼluwajiraain nukuwaʼipa sümaa. Tayasa chi kanüliakai Jehová. 7 Nnojo puʼluwajiraain pukuwaʼipa nümaa püshi jee nnojo puʼluwajiraain pukuwaʼipa sümaa pii, piisa shia, nnojotkalaka anain puʼluwajiraale pukuwaʼipa sümaa.

8 »›Nnojo puʼluwajiraain pukuwaʼipa sümaa nuʼwayuuse chi püshikai, mojuteechi chi püshikai paaʼinrüle tia.

9 »›Nnojo puʼluwajiraain pukuwaʼipa sümaa puwala, jaʼitasü nüchooin shia püshi jee süchonle shia pii, jaʼitasü jemelin shia suluʼu tü miichi eejachire pia jee naatale shipia puulia.

10 »›Nnojo puʼluwajiraain pukuwaʼipa sümaa nüchon wanee püchon jee nnojo puʼluwajiraain pukuwaʼipa sümaa süchon wanee püchon süka mojuteechin pia suluʼujee tia.

11 »›Nnojo puʼluwajiraain pukuwaʼipa sümaa süchon nuʼwayuuse chi püshikai, nüchon chi püshikai tia makat.

12 »›Nnojo puʼluwajiraain pukuwaʼipa sümaa nuwala chi püshikai, jama nüpüshin shia chi püshikai.

13 »›Nnojo puʼluwajiraain pukuwaʼipa sümaa suwala pii, jama süpüshin shia tü piikat.

14 »›Nnojo puʼluwajiraain pukuwaʼipa sümaa nuʼwayuuse nuwala chi püshikai, mojuteechi nia putuma suluʼujee tia, püʼirü tia makat.

15 »›Nnojo puʼluwajiraain pukuwaʼipa sümaa paʼüi, nuʼwayuuse shia chi püchonkai. Nnojotkalaka anain puʼluwajiraale pukuwaʼipa sümaa.

16 »›Nnojo puʼluwajiraain pukuwaʼipa sümaa nuʼwayuuse chi puwalakai süka mojuteechin chi puwalakai suluʼujee tia.

17 »›Nnojo puʼluwajiraain pukuwaʼipa sümaa wanee wayuu, sümaa süchon jee sümaʼaleeya sülüin,* süpüshinna naya tia wayuukot. Yarüttüsü maʼin tia paaʼinrüle shia.

18 »›Nnojo kasaalüin pia sümaa suwala tü puʼwayuusekat süka nachunjiraajeenain neʼe jee nnojo puʼluwajiraain pukuwaʼipa sümaa tia wayuukot kataiwaʼaya soʼu tü puʼwayuusekat.

19 »›Nnojo puʼluwajiraain pukuwaʼipa sümaa wanee wayuu eekai yarüttüin saaʼujee kakashiain shia.

20 »›Nnojo puʼluwajiraain pukuwaʼipa sümaa wanee wayuu eekai kaʼwayuusein süka yarütteerüin pukuwaʼipa suluʼujee tia.

21 »›Nnojo puuʼulaain naapünüin ekii wanee pülüin nümüin Mólek. Nnojotsü paaʼinrajatüin tia süpüla mojutuinjachin taya pümüin, jama tayain Pümaleiwasein. Tayasa chi kanüliakai Jehová.

22 »›Nnojo püinkaain nümaa wanee wayuu eekai toolojiraain wanaa pümaa maʼaka püinkaain sümaa wanee jierü. Yarüttüsü maʼin tia makalü.

23 »›Nnojoishi aʼluwajiraainjachin nukuwaʼipa wanee wayuu sümaa wanee mürüt süka yarütteechin nia. Akaʼaya wanee jierü nnojotsü anataainjatüin süpüla wanee mürüt shiiʼiree suʼluwajiraain sukuwaʼipa sümaa. Tayakai Maleiwa, nnojoishii takumajüin naya süpüla müinjatüin naainjala.

24 »›Nnojoishii jia yarüttüinjanain sünainjee jaaʼinrüin tia kasakalüirua, süka jamüin shiaʼaya saaʼinraka tia tü wayuuirua tajünajaainjatkat jüpüleerua. 25 Müsüjeseʼe yarüttüin tü mmakat jee süsaleena tatuma naainjala na wayuu sulujunakana otta tajünajaajeena naya suluʼujee. 26 Oonooinjanapajaʼa jia sümaa tü tamakat jee sümaa tü taluwataakalü anain. Nnojoishii aaʼinrajanain jia wanee kasa eekai müin aka saaʼin tia kasakalüirua, nnojotsü naaʼinrüinjatüin shia chi wayuu eekai israelitain jee chi wayuu nnojoikai israelitain kepiakai jaʼaka. 27 Süpüshuaʼa tia kasa yarüttüsükat, naaʼinrapuʼuin shia na wayuu kepiakana jüpülapünaa suluʼu tia mmakat, yarüttakalaka tia mmakat maaʼulu. 28 Nnojoliijeenakalaka tajünajaain jia suluʼujee tia mmakat saaʼujee nnojoluin yarüttüin jutuma tü mmakat, maʼaka tajünajaain na wayuu eejanakana jüpülapünaa suluʼu tia mmakat. 29 Oʼutuneena aaʼin naʼakajee na israelitakana napüshuaʼa na wayuu aaʼinrakana tia kasa yarüttakat. 30 Oonooinjana maʼin jia sümüin tü taluwataakalü anain, nnojotsü jaaʼinrajatüin tia akuwaʼipaa yarüttakat maʼin naaʼinrapuʼuka na wayuu kepiakana jüpülapünaa suluʼu tia mmakat suulia yarüttüin jia sünainjee tia. Tayasa Jehová chi Jümaleiwasekai›».