Génesis
13 Nuʼunakalaka Abrán Egiptojee chai nukua suluʼumüin tü mmakat Négueb. Oʼunusü nuʼwayuuse nümaa jee müshia Lot, nülüʼüjain süpüshuaʼa tü kasa eejatkat nümaʼana. 2 Watta saalii nümüʼlüin Abrán, watta saalii pülaata nümaʼana jee müsia ooro. 3 Noʼonoʼowaikalaka Abrán chaa suluʼujee tü mmakat Négueb eemüinreʼeya tü mmakat Betel. Nüntakalaka pasanain sünain tü mmakat Betel jee müsia Hai eejatüle nukumajüin paala tü nipiayaasükat. 4 Chajatü nüpaʼawajaain wanee ipa paala jee chajatü nuchuntuin nünülia Jehová.
5 Oʼunushiaʼaya Lot nümaa Abrán jee kamüʼlüinshi nia anneerü, paaʼa jee kepiayaashi nia miichi aainjuushi süka loona. 6 Saaʼujee wattain maʼin saalii tü nawashirüinkat nnojotsü keküleeuin tü mmakat süpüla namüʼlüin, nnojoliikalaka süpüla kottiraain naya. 7 Natkaakalaka na aaʼinmajüliikana nümüʼlüin Abrán namaa na aaʼinmajüliikana nümüʼlüin Lot. (Naya kepiaka chaa Canaán soʼu tia na cananeokana jee müshiʼiya na perizitakana). 8 Anuujeseʼe nünüiki Abrán nümüin Lot: «Nnojotsüsaʼa anain mojujiraale waya jee nnojoishii atkaajiraainjanain na aaʼinmajüliikana pümüʼlüin namaa na aaʼinmajüshiikana tamüʼlüin, jama pawalaawajiraain waya. 9 ¿Aashin taashin tü mmakat püpüleerua? Anakajaʼa wakatajiraale. Puʼunule wüinpümüin, oʼuneechi taya wopumüin, eekajasaʼa puʼunule wopumüin tayeechi oʼunaka wüinpümüin». 10 Niirakaakalaka Lot sümüin süpüshuaʼa tü mma chajatkat Jordán sünainmüinreʼeya Zóar, keküleeuisü maʼin tia mmakat maʼaka saaʼin tü yüüja* niʼitaakat Jehová paala. Mapuʼusü sukuwaʼipa Sodoma sümaa Gomorra süpülapünaa najaʼttirüin shia Jehová. 11 Nüneekaka Lot kepiain nia suluʼu tü mma chakat Jordán, akolojooshijeseʼe nia wüinpümüin nukua. Napaajiraakalaka naya wayuukana. 12 Kepiakalaka Abrán suluʼu tü mmakat Canaán, eekajasaʼa Lot kepiashi nia süʼütpünaa tü pueulo chakat Jordán. Nukumajaka nipia mapa maʼin süʼütpaʼa Sodoma. 13 Mojulaapejeʼe maʼin na wayuu chajanakana Sodoma, nnojotsü anain tü naaʼinrakat nuʼupala Jehová.
14 Süchikijee nuʼunuin Lot nümaʼanajee Abrán, naashajaakalaka Jehová nümüin Abrán sünain maa nümüin: «Piirakaa eejeere pia chaa palaamüin jee müsia chaa uuchumüin. Piirakaa chaa wüinpümüin jee müsia chaa wopumüin. 15 Taapeerü pümüin tü mma piʼrakat jee taapeerü shia namüin na püikeyuukana, juumainjeerü tü mmakat waneepia. 16 Watteena maʼin naalii na püikeyuukana tatuma maʼaka wattain saalii tü jasaikat. Nieechi neʼe ountaka ayaawajüin na püikeyuukana chi wayuu ountakai ayaawajüin tü jasaikat. 17 Anakajaʼa puwaraijaale süpaʼapünaa mmakat tüü süka taapüinjatüin shia pümüin». 18 Oʼunushijeseʼe Abrán süpaʼapünaa tia mmakat jee kepiayaakalaka nia miichi aainjuushi süka loona, nüntakalaka mapa maʼin eemüin tü wunuʼulia miyoʼuyuu chakat Mamré, suluʼu tü mmakat Hebrón jee nukumajakalaka wanee aʼajülee süpülajatü aʼwaajaa Jehová.