Génesis
21 Anasü sukuwaʼipa Sara nutuma Jehová maʼaka nüküjatüjülin shia paala otta nikeraajüin Jehová tü nümatüjütkalia paala. 2 Ipuotkalaka Sara, jemeyutkalaka shia nümaa wanee nüchon Abrahán mayaainjeʼe laülaaichin nia, jemeyutsü shia soʼu tü kaʼi nüküjatüjütkalia achiki Maleiwa nümüin Abrahán. 3 Isaac nünülia chi joʼuukai nutuma Abrahán, chi nüchon jemeyutka amaa Sara. 4 Nüchotooko Abrahán süta nukorolo Isaac mekiisatpa kaʼi süchikijee joʼuuin nia, naaʼinrüin tia wanaapünaa sümaa tü nuluwataakalü anain Maleiwa. 5 Poloo shikii nuuyase Abrahán wanaa sümaa joʼuuin Isaac, chi nüchonkai. 6 Anuukalaka sünüiki Sara: «Nüsirajirüin taya Maleiwa jee asirajeena wanaa tamaa na aapakana süchiki tia». 7 Anuuka joo sünüikiyaa: «¿Jarattaaya eʼitaain saaʼu jemeyuluinjatüin taya nümaa wanee nüchon Abrahán mayaainjeʼe laülaaichin nia?».
8 Nimiyoʼulaaka chi joʼuukai jee nüpütinnaka suulia atujawaa, eekalaka nutuma Abrahán wanee ekawaa soʼu tü kaʼi nüpütinnakalü oʼu Isaac suulia atujawaa. 9 Shiʼrakalaka Sara meeʼerapalain Isaac nutuma chi nüchonkai Abrahán sümüin Agar, tü wayuu chejeʼewatkalü Egipto. 10 Anuukalaka joo sünüiki nümüin Abrahán: «Püjünajaa yaajee tü achepchieekat nümaʼaleeya chi süchonkai, nnojotsü nüpaajiraainjatüin Isaac nümaa süchon tü achepchieekat tü kasa eʼipünaanajatkat nüpüla». 11 Aipejeʼe nümüin Abrahán tü sümakat nüchiki chi nüchonkai. 12 Anuukalaka joo nünüiki Maleiwa nümüin Abrahán: «Nnojo mojuin paaʼin saalinjee tü sümakat pümüin Sara nüchiki chi püchonkai jee süchiki tü püchepchiakat, paainja tü sümakat süka nieechin kalüin atuma pia Isaac. 13 Wainmeenaʼaya wayuu tatuma nünainjee süchon tü püchepchiakat süka püchooin nia».
14 Nütamaaka Abrahán wattachon maalü, naapaka sümüin Agar eküülü jee wanee paaʼata kaluʼuka wüin. Noʼotuin shia sunuloʼu jee nüjütaka shia nümaa chi süchonkai. Suʼunakalaka Agar jee unataka shia süpaʼa tü isashiipaʼa chakat Beer-Seba. 15 Shiasaʼa mapa, sajaʼttapa tü wüin sulujutkat tü paaʼatakat, süpütapünaain Agar chi süchonkai neemioushi wanee wunuʼu joʼuuchon. 16 Ayatakalaka shia akoyojuin, süikalaaka sümüiwaʼa wattaluʼu.* «Nnojoishi teʼrajeein akua sünain outaa chi tachonkai», maa müsü saaʼin. Süikalaaka wattaluʼu nuulia jee shiʼyalajakalaka maʼin.
17 Naapaka Maleiwa niʼira chi süchonkai Agar, suunejünaka Agar chejee iipünaajee nutuma wanee aapiee nümaʼanajeejachi Maleiwa sümaa nümüin sümüin: «¿Jamüsü piʼyalajakaʼa Agar? Nnojo mmoluin pia, naapajüin Maleiwa niʼira chi püchonkai yala eere nia. 18 Anakajaʼa pütamaale jee pütameʼera chi püchonkai sümaa pajattüin nia, wainmeerü tatuma wayuu nünainjee». 19 Shiʼraka Agar nutuma Maleiwa wanee ishi kaluʼuka wüin. Suʼunakalaka Agar eemüin tü ishikat jee shipirajaka tü paaʼata süpülajatkat wüin sümaa süsirüin wüin chi süchonkai. 20 Nimiyoʼulaaka süchonkai Agar sümaa nükaalinjünüin nutuma Maleiwa, kepiashi nia isashiipaʼa otta atüjashi mapa süpüleerua ojunaa jatü. 21 Kepiakalaka nia eekai tü isashiipaʼa chakat Parán jee süsaajirakalaka tü niikat wanee wayuu nuʼwayuuseinjatka suluʼujee tü mmakalü Egipto.
22 Nuʼunakalaka Abimélec soʼunnaa tia nümaa Ficol, chi süʼlaülakai nusurulaatse süpüla yootuinjachin nia nümaa Abrahán. Anuu nünüiki nümüin: «Anasü sukuwaʼipa süpüshuaʼa tü kasa paainjakat süka nükaalinjain pia Maleiwa. 23 Püküjaleʼeya tamüin jooluʼuleʼeya nuʼupala chi Maleiwakai nnojoleechi jamajüin taya putuma jee nnojoleenain jamajüin putuma na tachonniikana jee na taikeyuukana. Püküjaleʼeya tamüin pümüliajeechin taya jee pümüliajeenain na wayuu yaakana eere kepiain pia maʼaka tamüliajüin pia paala». 24 «Taapüin tanüiki sünain nnojoleenain jamajüin jia tatuma», nümakalaka Abrahán nümüin Abimélec.
25 Nüküjaleeinña Abrahán nümüin Abimélec süsütünüin nuulia natuma na nüchepchiakana Abimélec wanee ishi kaluʼuka wüin. 26 Anuukalaka nünüiki Abimélec nümüin: «Eiwaʼalia neʼe taapa achiki tia. ¿Jamüshi nnojoikaʼa püküjain süchiki tia paalainka? Nnojotsü tatüjaain aaʼu jaralüin müin aainjala». 27 Nüsaajirakalaka Abrahán anneerü otta paaʼa jee naapakalaka shia nümüin Abimélec. Napansaajiraakalaka nanüiki piamaleʼeya. 28 Nükatalapa Abrahán akaratshisü anneerü jimoʼonnuu, 29 nüsakinnakalaka nutuma Abimélec sünain maa: «¿Jamüsü pükatalakaʼa türa akaratshisükalüirua anneerü jimoʼonnuu?». 30 «Paapaainjatü tü akaratshisükalüirua anneerü jimoʼonnuu taapaka pümüin, shiyaawase taponoloin ishikat tüü», nümakalaka Abrahán nümüin. 31 Beer-Seba sünülia tia mmakat nutuma Abrahán süka chajatüin keraain nünüiki nümaa Abimélec. 32 Napansaajiraaka nanüiki chaa Beer-Seba. Nüleʼejaka Abimélec noumainpaʼamüin na filisteokana nümaa Ficol, chi süʼlaülakai nusurulaatse. 33 Süchikijee tia, nüpünajaka Abrahán chaa Beer-Seba wanee wunuʼu kanüliakat tamarisco jee nuchuntaka chayaa nünülia Jehová, chi Maleiwa matüjainkai outaa. 34 Kakalia kepiain Abrahán noumainpaʼa na filisteokana.