Génesis
23 Anaajaasü Sara soʼu 127 suuyase. 2 Sünaajaakalaka Sara chaa Quiryat-Arbá, chasü Hebrón tia makat suluʼu tü mmakat Canaán. Niʼyalajakalaka maʼin Abrahán sümaa mojuin naaʼin süchiirua Sara. 3 Nuʼunakalaka Abrahán eejeere sülapajünüin aaʼu tü nuʼwayuusekat jee nümakalaka namüin na nüchonniikana Het: 4 «Wayuusa naatajachi taya jaʼaka jee wayuu wattajeʼewai taya, jalia maa tamüin wanee mma süpüla taamakainjatüin shia, teʼikeetkalaka tü taʼwayuusekat chamüin, nnaasaʼa joo shia anaajaain». 5 Nasoutakalaka nümüin Abrahán na nüchonniikana Het: 6 «Wamüshi paala pia waʼlaülaa, wayaawata aaʼulu püneekünüin nutuma Maleiwa süpüla shikiipüʼüinjachin pia wayuu. Püneeka wanee woowira eekai anain maʼin saʼakajee tü wamaʼanakat süpüla piʼiküinjatüin tü puʼwayuusekat suluʼu, nnojoleechi eein wanee waʼakajee eekai aʼalijirüin puulia wanee woowira süpüla piʼiküinjatüin puʼwayuuse».
7 Nütamaakalaka Abrahán jee nejepülaakalaka namülatuʼu na wayuu chajanakana suluʼu tia pueulokot, nüchonnii Het naya makana 8 sümaa nümüin namüin: «Saaʼu anashiitpain jümüin teʼiküinjatüin tü taʼwayuusekat juumainpaʼa, anakajaʼa jooluʼu juchuntule tapüleerua nümüin Efrón, chi nüchonkai Zóhar. 9 Juchunta nümüin nuikaiwa tamüin tü koʼushii chakat Macpelá nia koumainka tia, chasü shia shiinaluʼu nuumain, anakajaʼa tawalaajüle nümüin juʼupalaʼaya tü nneerü pülaata süliakat tia mmakat, taamakeetkalaka shia».
10 Chajachi Efrón joyotuin naʼaka na nüchonniikana Het, asoutushijeseʼe nia nümüin Abrahán noʼupala na nüchonniikana Het jee noʼupala napüshuaʼaya na wayuu ekeronuwaakana soʼuluʼupünaa tü pueulokot, anuu nünüiki Efrón chi hititakai: 11 «Taʼlaülaa, nnojotsü shiain neʼe taapajatüin pümüin tü puchuntakat, taapajatiaʼaya pümüin süpüshuaʼa tü mma kaluʼukat tia koʼushiikat, taapüinsa shia pümüin noʼupala na wayuu yaakana suluʼu tü pueulokot, piʼika pümaala tü puʼwayuusekat suluʼu». 12 Nejepülaakalaka Abrahán namülatuʼu na wayuu chajanakana suluʼu tia pueulokot, 13 anuukalaka nünüiki nümüin Efrón noʼupala napüshuaʼa na wayuukana: «Paapaja maa tanüiki, taapeerü pümüin süpüshuaʼa tü nneerü süliakat tia mmakat, paapaa tü nneerü pülaata taapajatkat pümüin saaʼu, teʼikeetkalaka tü taʼwayuusekat».
14 Anuukalaka nünüiki Efrón nümüin Abrahán: 15 «Paapaja tanüiki taʼlaülaa, 400 nneerü aainjuushika süka pülaata* sülia tia mmakat, nnojotpejeʼe shiain alanaʼaleein ojutu tia, anakajaʼa piʼiküle tü puʼwayuusekat». 16 Anashiikalaka nümüin Abrahán tü nuchuntakalü Efrón nümüin saaʼu tü mmakat, nipesajakalaka tü nneerü aainjuushikat süka pülaata nuchuntaka nümüin noʼupala na nüchonniikana Het. 400 nneerü aainjuushi süka pülaata tia makat, wanaapünaa sümaa sukuwaʼipa shipesajia wanee kasa natuma na oikaaliikana. 17 Shia sukuwaʼipa suikia tia tü nuumainkalü Efrón, tü chajatkat Macpelá sümaʼaleeya tü koʼushii chakat suluʼu jee müsia tü wunuʼulia chajatkat suluʼu, tü chakat süʼütpaʼa Mamré. Niakalaka joo 18 koumain shia Abrahán. Niyaʼlajala shia noʼupala na nüchonniikana Het jee noʼupala napüshuaʼa na wayuu ekeronuwaakana soʼuluʼupünaa tü pueulokot. 19 Shiasaʼa süchikijee tia, niʼikakalaka Abrahán tü nuʼwayuusekat, niʼiküin shia suluʼu tü koʼushii chakat Macpelá süʼütpaʼa Mamré, chasü Hebrón tia makat, suluʼu tü mmakat Canaán. 20 Suluʼujee tia, naamakaka Abrahán tü mmakat sümaʼaleeya tü koʼushiikat, nnojoluitpa noumain na nüchonniikana Het.