Génesis
16 Machonsat Sarái, tü nuʼwayuusekalü Abrán. Eejatpejeʼe wanee süchepchia kanüliaka Agar. 2 Anuukalaka joo sünüiki Sarái nümüin Abrán: «Paapaja maa tanüiki, nnojotsü nücheküin Jehová kachoinjatüin taya. Anashi püinkaale sümaa tü tachepchiakat, eesüjaʼa kachonjeerüle taya sünainjee». Noonookalaka Abrán sümaa sünüiki Sarái. 3 Poloopa juya Abrán kepiain suluʼu tü mmakat Canaán, saapüin Sarái nümüin Abrán Agar, tü süchepchia chejeʼewatkalü Egipto, nuʼwayuusekalaka shia. 4 Nüinkaakalaka Abrán sümaa Agar, ipuotkalaka shia. Sütüjaapa saaʼu Agar ipuoluin shia, mojutukalaka sülaamain sümüin.
5 Anuukalaka sünüiki Sarái nümüin Abrán shiʼrapa tü saainjakalü Agar: «Pia kasitka müliain taya sutuma. Taya kaapajalaka pümüin tü tachepchiakat, mojutupejeʼe taya sümüin sütüjaapa saaʼu ipuoluin shia. Nieechi Jehová aküjaka jaralin kasirüin tia, tayalejeʼe tayakat jee pialejeʼe neʼe piakai». 6 Anuujeseʼe nünüiki Abrán sümüin Sarái: «Pia laülaaka saaʼu tü püchepchiakat. Paaʼinra neʼe tü paaʼinreekat süka». Shiʼraka japülii Agar sutuma Sarái, suʼluwataaka suulia.
7 Süntünaka anain Agar mapa nutuma wanee aapiee nümaʼanajeejachikai Jehová süpaʼapünaa wanee isashiipaʼa eejeere süparalüin wüinkat, shia tü wüin aparatkat sotpünaa tü wopu chaʼwatkat Sur. 8 Anuukalaka nünüiki sümüin: «¿Jalejeesü pia Agar, pia süchepchiaka Sarái? ¿Jalainjatü pia?». Anuukalaka sünüiki nümüin: «Aʼluwataasü taya suulia Sarái, tü talaamainkat». 9 Anuukalaka nünüiki sümüin Agar chi aapiee nümaʼanajeejachikai Jehová: «Püleʼeja püchikuaʼa eemüin tü pülaamainkat otta jüüjüü pia sümüin, jama shiain laülaain paaʼu». 10 Ayatakalaka naashajaain sümüin Agar chi aapiee nümaʼanajeejachikai Jehová: «Watteerü maʼin saalii püikeyuu tatuma, iseerü süchiki shiyaawajüin shia wayuu süka watteerüin saalii». 11 Anuuka joo nünüikiya chi aapiee nümaʼanajeejachikai Jehová: «Nnaa joo pia ipuoluin, jemeyuleerü pia nümaa wanee joʼuu, piʼitaajeechika nünüliain Ismael süka naapüin Jehová piʼira sünain müliain paaʼin. 12 Meechi nia maʼaka saaʼin wanee püliikü simoluuna, mojulaajeechi nia sümüin wayuu süpüshuaʼa jee mojulaajeeriaʼaya wayuu nümüin. Katateechi nia kepiain noulia na nuwalayuukana».
13 Suchuntakalaka nünülia Jehová, jama naashajaain sümaa, anuukalaka sünüiki nümüin: «Piʼrüin kasa süpüshuaʼa Maleiwakalee». Müsüleʼe sünüiki süka «Teʼrüichipa chi eʼrakai taya» sümüin saaʼin süleʼeruʼu. 14 Müsüjeseʼe Beer-Lahái-Roí sümünüin tü ishi chakat pasanain sünain tü mmakat Cadés otta Bered. 15 Jemeyutkalaka Agar nümaa wanee nüchon Abrán, Ismaelka nünülia chi joʼuukai nutuma Abrán. 16 Mekiisat shikii aipiruamüin nuuyase Abrán soʼu jemeyuluin Agar nümaa Ismael.