Levítico

14 Ayatakalakaʼaya naashajaain Jehová nümaa Moisés sümaa nümüin nümüin: 2 «Anuu tü aaʼinnajatkat nüka wanee wayuu kanainkai tü ayuulii kanüliakat lepra soʼu süküjünüin wulein nia, niʼikajaanapa nümaʼanamüin chi sacerdotekai. 3 Oʼunajachi chi sacerdotekai wattaluʼu suulia nepia na israelitakana jee nünaʼleechi chi wayuukai. Naawalaale chi wayuukai suulia tü ayuulii kanüliakat lepra, 4 nuchunteerü chi sacerdotekai nümüin süpüla wuleinjachin nia piamasü wüchii eekai wulein sümaa katüin soʼu, wunuʼu kanüliaka cedro, jiirü ishotot maʼin jee wunuʼu kanüliaka hisopo. 5 Nuluwataajeetka chi sacerdotekai suʼutunüin aaʼin wanee wüchii saaʼu wanee wushu aainjuushika süka pootshi kaluʼuka wüin ajaʼituushika shirokujee wüin palataka. 6 Naapaainjatü tü wüchii katakalü oʼu, tü wunuʼu kanüliakat cedro, jiirü ishotot maʼin jee tü wunuʼu kanüliakat hisopo sümaa nüchüttüin shia saʼaka süsha tü wüchii oʼutunakalü aaʼin saaʼu tü wüin palatakat. 7 Nütülüittireetka tü ishakalü akaratshitua naaʼu chi wayuu kanainkai tü ayuulii kanüliakat lepra jee wuleechikalaka chi wayuukai, nüjüteetka süchiki tü wüchii katakalü oʼu wattaluʼu suulia nepia na israelitakana.

8 »Niasaʼa chi wayuu wuleinjachikai nüshijaainjatü nüsheʼin, nümoijüinjatü nikii jee oʼoojuinjachi nia, wuleechikalaka nia. Eekalaka süpüla nikerotüin naʼakamüin na israelitakana, nnojolinjachipejeʼe nia ekerotuin nipialuʼumüin soʼu akaratshi kaʼi. 9 Shiasaʼa soʼu tü akaratshikat kaʼi nümoijüinjatü nikii, nüʼliima jee nüʼlamaloʼu. Süchikijee nümoijüin nikii, nüshijaainjatü nüsheʼin jee oʼoojuinjachi nia, wuleechikalaka nia.

10 »Naapaajeetka soʼu tü mekiisatkat kaʼi piamashii anneetchein eekai nnojoliin ayuulin, wanee anneerü waneeitka juya, apünüin kilo shiatapünaamüin* ariina yütchonka ojuruttuushika sümaa seita süpüla süsülajünüin maʼaka süsülajünüin eküülü tamüin tayakai Maleiwa jee musia wanee kuriia kaluʼuka seita.* 11 Chi sacerdote aküjainjachikai wulein chia wayuukai, niʼikajaainjachi nia tamülatuʼu tayakai Jehová sümaʼaleeya tü kasa nüsülajakat soʼuluʼumüin tü miichi aʼwaajüleekat. 12 Naapaajeetka chi sacerdotekai wanee anneetchon, niʼikajaajeechika nia tamülatuʼu tayakai Jehová saaʼu naainjala chi wayuukai, niʼikajaajeerü sümaa tü kuriia kaluʼukat seita, niʼyuunaleetka shia tamülatuʼu süpüla naapüinjatüin shia tamüin. 13 Nuʼuteechikalaka naaʼin chi anneetchonkai suluʼu süpaatiase tü miichi aʼwaajüleekalü eere suʼutunuin aaʼin tü mürüt asülajünakat saaʼu tü kasa mojusü naainjakat wanee wayuu sümaa nnojolin naaʼinjeein shia otta eere suʼutunuin aaʼin tü mürüt aʼajünüinjatkat tamüin tayakai Maleiwa. Nia kamüinjachika chi sacerdotekai tü asülajünakat saaʼu naainjala wanee wayuu jee tü asülajünakat saaʼu tü kasa mojusü naainjakat wanee wayuu sümaa nnojolin naaʼinjeein shia, shia wanee kasa kojutuka maʼin.

14 »Niʼitaajeetka chi sacerdotekai süpüshi nüsha chi mürüt aapünakai saaʼu naainjala chi wayuu wuleinjachikai, niʼitaajeerü tia sünain nücheʼe nikialuʼujeeka, sünain shii najapü nikiaka jee sünain shii nuuʼui nikialuʼujeeka. 15 Niʼyoteetkalaka chi sacerdotekai süpüshi tü seita suluʼukat tü kuriiakat süpaʼa tü najapü nipeʼekat. 16 Nüchütteetka chi sacerdotekai tü najapira nikialuʼujeetkat saʼaka tü seita yalakat süpaʼa tü najapü nipeʼekat jee nütülüittireetka akaratshitua süka najapira tü seitakat tamülatuʼu tayakai Jehová. 17 Nushulereetka mapa chi sacerdotekai süpüshi tü seita apütaakat süpaʼa najapü sünain nücheʼe nikialuʼujeeka chi wayuu wuleinjachikai, sünain shii najapü nikiaka jee sünain shii nuuʼui nikialuʼujeeka, niʼitaainjatü shia saaʼu tü isha nushulerakat paala saaʼu naainjala chi wayuukai. 18 Nushulereetka chi sacerdotekai tü seita apütaakat süpaʼa najapü saaʼu nikii chi wayuu wuleinjachikai. Naainjainjatü tia chi sacerdotekai tamülatuʼu tayakai Jehová süpüla sülatinnüin naainjala chi wayuukai.

19 »Naapeetka chi sacerdotekai tü asülajünakat saaʼu tü kasa mojusü naainjakat chia wayuukai sümaa nnojolin naaʼinjeein shia, naapeerü shia tamüin süpüla sülatinnüin naainjala chi wayuu wuleinjachikai jee nuʼuteetkalaka saaʼin tia mürütkat süpüla saʼajünüinjatüin tamüin tayakai Maleiwa. 20 Niʼitaajeetka chi sacerdotekai saaʼu tü aʼajüleekat tü mürüt oʼutunakalü aaʼin süpüla saʼajünüin tamüin otta tü eküülü asülajünajatkat tamüin. Naainjain tia chi sacerdotekai süpüla sülatinnüin naainjala chi wayuu wuleinjachikai, wuleechikalaka nia süchikijee tia.

21 »Maʼletsere chi wayuu wuleinjachikai jee nnojorüle wainmain kasa nümaʼana, naapeechi wanee anneetchon süpüla sülatinnüinjatüin naainjala. Niʼyuunaleechi nia chi sacerdotekai süpüla sülatinnüinjatüin naainjala chia wayuukai, naapeeriaʼaya wanee kilo* ariina yütchonka ojuruttuushika sümaa seita, nüsülajeerü shia maʼaka süsülajünüin eküülü tamüin tayakai Maleiwa, naapeerü wanee kuriia kaluʼuka seita 22 jee piamasü wawaachi jee shiale piamasü toomasüchein wanaapünaa sümaa tü eekat süpüla naapüin. Aapünajatü wanee wüchii saaʼu tü kasa mojusü naainjakat sümaa nnojolin naaʼinjeein shia jee oʼutunajatü aaʼin tü wane wüchiichonkat süpüla saʼajünüinjatüin tamüin. 23 Niʼikajaajeetka süpüshuaʼa tia soʼu tü mekiisatkat kaʼi nümaʼanamüin chi sacerdotekai soʼuluʼumüin tü miichi aʼwaajüleekat tamülatuʼu tayakai Jehová süpüla süküjünüin nümüin wuleichipain nia.

24 »Naapaajeechika chi sacerdotekai chi anneetchon asülajünakai saaʼu naainjala chi wayuukai sümaʼaleeya tü kuriia kaluʼukat seita, niʼyuunaleetka shia tamülatuʼu tayakai Jehová süka shiain wanee kasa asülajuushi aʼyuunannaka tamüin. 25 Nuʼuteechikalaka naaʼin chi anneetchon aapünakai saaʼu naainjala chi wayuukai. Nushulereetka chi sacerdotekai süpüshi nüsha chi anneetchon aapünakai saaʼu naainjala chia wayuukai, nushulereerü shia sünain nücheʼe nikialuʼujeeka chi wayuu wuleinjachikai, sünain shii najapü nikiaka jee sünain shii nuuʼui nikialuʼujeeka. 26 Niʼyoteetkalaka chi sacerdotekai süpüshi tü seitakat süpaʼa tü najapü nipeʼekat, 27 nütülüittireetka akaratshitua tamülatuʼu tayakai Jehová süka tü najapira nikiakat süpüshi tü seita süpakaʼat tü najapü nipeʼekat. 28 Nushulereetka chi sacerdotekai süpüshi tü seita süpaʼakat tü najapü nipeʼekat sünain tü nücheʼe nikialuʼujeekat chi wayuu wuleinjachikai, sünain shii tü najapü nikiakat jee sünain shii nuuʼui nikialuʼujeeka eere nushulerüin paala nüsha chi anneetchon aapünakai saaʼu naainjala chi wayuukai. 29 Nushulereetka chi sacerdotekai tü seita apütaakat süpaʼa najapü saaʼu nikii chi wayuu wuleinjachikai. Naainjainjatü tia chi sacerdotekai tamülatuʼu tayakai Jehová süpüla sülatinnüin naainjala chi wayuukai.

30 »Naapeetka wanee wawaachichon jee shiale wanee toomasüchon wanaapünaa sümaa tü eekat nümaʼana, 31 wanaapünaa sümaa tü wüchii eekai süpüla nüsülajüin chi wayuukai süpüla naapüinjatüin shia saaʼu tü kasa mojusü naainjakat sümaa nnojolin naaʼinjeein shia otta tü wane wüchiikat, naapüinjatü shia süpüla suʼutunuin aaʼin jee saʼajünüin tamüin tayakai Maleiwa sümaa tü eküülü asülajünakat tamüin. Nuchunteechika chi sacerdotekai tamülatuʼu tayakai Jehová nüpüleerua chi wayuu wuleinjachikai süpüla sülatinnüin naainjala nuulia.

32 »Tüü shia tü aainjünüinjatkat süpüla süküjünüin wulein suulia tü ayuulii kanüliakat lepra wanee wayuu eekai maʼletsein».

33 Anuuka joo nünüiki Jehová nüchikuaʼa nümüin Moisés jee nümüin Aarón: 34 «Jüntapa suluʼumüin tü mmakat Canaán, tü mma taapüinjatkat jümüin jee tooʼulaataale eejaʼalaa sümüin tü ayuulii kanüliakat lepra suluʼu wanee miichi sulujutka tia mmakat, 35 oʼuneechi chi nipialujuchikai nümaʼanamüin chi sacerdotekai sümaa nümüin nümüin: ‹Eeʼiyalaasü wanee yarütshii tepialuʼu›. 36 Nuluwataajeechika chi sacerdotekai malujunainjatüin tü miichikat süpülapünaa nikerotuin sünain anaʼlawaa sümüin tü yarütshii eeʼiyalaakat, nnojoleetkalaka nüküjain yarüttüin süpüshuaʼa tü kasa eekat suluʼu tü miichikat, nikeroteechika mapa chi sacerdotekai sünain anaʼlaa tü miichikat. 37 Nünaʼleerü tü yarütshiikat, niʼrüle koʼujain süsepü tü miichikat, wüittüle shia sümaa marieemaatüin jee ishooittüle shia sümaa oʼutuin shia suulia süsepü tü miichikat, 38 ojuʼiteechi chi sacerdotekai soʼuluʼumüin tü miichikat jee nüküjeerü nnojoluinjatüin jaralüin ekerotuin soʼu akaratshi kaʼi.

39 »Sülatapa tü akaratshikat kaʼi, nünaʼleerü shia süchikuaʼa chi sacerdotekai, wattakuarüle tü yarütshiikat sünain süpüshuaʼa süsepü tü miichikat, 40 nuluwataajeerü chi sacerdotekai süsünneʼennüinjatüin tü ipa kanainkat tü yarütshiikat jee sujutunuinjatüin wattamüin suulia tü pueulokolü eere sojotunuin yarütshii. 41 Noojirüinjatü suluʼupünaa tü miichikat, shiasaʼa tü aakatünakat, ojotunuinjatü shia wattaluʼu suulia tü pueulokolü eere sojotunuin yarütshii. 42 Eʼitaaneerü waneirua ipa süchikanainruʼu tü ipa asünneʼennakat paala jee ashulenneerü kasa jeketü sünain süsepü tü miichikat.

43 »Shiiʼiyalaale süchikuaʼa tü yarütshiikat suluʼu tü miichikat süchikijee saakatünüin paala tü ipa kanainkat tü yarütshiikat, soojunuin süsepü tü miichikat jee sushulennüin kasa jeketü sünain, 44 ekeroteechi chi sacerdotekai jee nünaʼleerü tü miichikat. Wattakuarüle tü yarütshiikat sünain tü miichikat, shiajaʼamata tü ayuulii mojusü kanüliakat lepra sünainka tü miichikat, yarüttüsü tia miichikat. 45 Nujuʼichijeʼereerü tü miichikat, tü ipa sünainkat, tü wunuʼu sajapuluʼujiakat jee süpüshuaʼa tü ashulennakat sünain tia miichikat. Niʼikajeʼereerü tia wattamüin suulia tü pueulokot, eere sojotunuin yarütshii. 46 Nikerotataale wanee wayuu soʼu tü kaʼi nnojotkat süpüla shikerotunuin aluʼu tü miichikat, yarütteechi chia wayuukai, waneʼereeya wulein nia motsopa kaʼikat. 47 Chi eekai nutunkuin suluʼu tia miichikat, nüshijaainjatü nüsheʼin, akaʼaya chi eekai niküin suluʼu tü miichikat nüshijaainjatiaʼaya nüsheʼin.

48 »Nuʼunule joo chi sacerdotekai suluʼumüin tü miichikat jee niʼrataale nnojoluin wattakualin tü yarütshiikat suluʼu tü miichikat süchikijee sushulennüin paala kasa sünain tü süsepükat, nüküjeerüjaʼa chi sacerdotekai wulein tia miichikat süka nnojoluitpain tü yarütshiikat sünain. 49 Süpüla wuleinjatüin tü miichikat, naapaajeerü chi sacerdotekai piamasü wüchii, wunuʼu kanüliaka cedro, jiirü ishotot maʼin jee wunuʼu kanüliaka hisopo. 50 Nuʼuteetka saaʼin wanee wüchii saaʼu wanee wushu aainjuushika süka pootshi kaluʼuka wüin ajaʼituushika shirokujee wüin palataka. 51 Naapaajeetka tü wunuʼu kanüliakat cedro, tü wunuʼu kanüliakat hisopo, tü jiirü ishototkot maʼin jee tü wüchii katakalü oʼu, nüchütteetka shia saʼaka süsha tü wüchii outakat jee shiroku tü wüin ajaʼituushikat shirokujee tü wüin palatakat. Nütülüittireetka tü ishakalü akaratshitua sünain tü miichikat. 52 Wuleetkalaka tü miichikat nutuma sükajee süsha tü wüchii outakat, sükajee tü wüin ajaʼituushikat shirokujee tü wüin palatakat, sükajee tü wüchii katakalü oʼu, sükajee tü wunuʼu kanüliakat cedro, sükajee tü wunuʼu kanüliakat hisopo otta sükajee tü jiirü ishototkot maʼin. 53 Taasheetka nutuma tü wüchii katakalü oʼu eere nnojoluin pünajüt, wattaluʼu suulia tü pueulokot. Müinjatü sukuwaʼipa nutuma süpüla wulein tü miichikat, wuleetkalaka shia.

54 »Tüü shia tü aaʼinnajatkalü eere tü ayuulii kanüliakat lepra, yooire tü sünainkat nikii wanee wayuu jee sünainre shia nüʼliima, 55 eere tü ayuulii kanüliakat lepra sünain wanee kuluulu jee sünainre shia miichi, 56 shütüle nüta wanee wayuu otta josole süjü sümaa süsha tü nülioʼukot. 57 Nüküjeetka chi sacerdotekai yarüttüle jee wulere wanee wayuu jee shiale wanee kasa. Tia shia tü aaʼinnajatkat sujuʼitaale tü ayuulii kanüliakat lepra».