Chiiruaajatka karaloʼuta Samuel

18 Niyaawajakalaka David na wayuu eejanakana nümaa, nayaka nekiipüʼüin nutuma na shikiipüʼükana 1.000 surulaat otta na shikiipüʼükana poloo shikii surulaat. 2 Nükatatkalaka David na surulaat nümaajanakana suluʼu apünüin neʼipapaʼa nutuma, aneekünüshi Joab süpüla nekiipüʼüinjachin wanee neʼipapaʼa surulaat, nüneekünaka Abisái, chi nuwalakai Joab, chi süchonkai Zeruyá süpüla nekiipüʼüinjachin nia wane neʼipapaʼa surulaat, aneekünüshiaʼaya Ittái, chi guititakai süpüla nekiipüʼüinjachin nia wane neʼipapaʼa surulaat. «Oʼuneechi taya jümaʼayaa», nümakalaka David namüin naya wayuukana. 3 Anuujeseʼe nanüiki nümüin: «Anashi nnojoire puʼunuin wamaa, jaʼitashii waya apantajaain napüleerua naya wayuukana, nnojoleena waya kasajanain namüin, jaʼitakajeʼe wattale naalii na outakana waʼakajee, nnojoleerü kasajatüin tia namüin, jama sülanaʼaleein maʼin pujutu namüin noulialeʼeya 10.000 wayuu waʼakajee. Shiakalaka anain yaale pia pueulopaʼa, pükaalinjeenaka waya». 4 Anuujeseʼe nünüiki David namüin: «Taaʼinreerü tü jümakat tamüin». Nüshaʼwalaakalaka David süʼütpaʼa soʼu tü pueulokot Mahanaim, nojuʼinuwaayaa namaka na wayuu nümaajanakana suluʼu polooin nekii jee suluʼu 1.000 nekii. 5 Anuujeseʼe nünüiki David nümüin Joab, Abisái otta nümüin Ittái: «Nnojo juʼutuin naaʼin Absalón, aishi maʼin tapüla chi tachonkai. Jaaʼinra tia taaʼujee». Naapakalaka napüshuaʼaleʼeya naya wayuukana tü nümakat David namüin na nekiipüʼükana surulaat.

6 Nojuʼitakalaka anooipaʼamüin sünain tü pueulokot na wayuu nümaajanakana David süpüla natkaainjanain namaa na israelita paaʼinwakana nümaa Absalón. Chajana naya atkaain saʼaka tü mojuui sulujutkat noumain na nüikeyuukana Efraín. 7 Nakanajuukalaka na israelita paaʼinwakana nümaa Absalón natuma na wayuu nümaajanakana David. Wattakalaka maʼin naalii na wayuu outakana soʼu kaʼikat tia, outushii 20.000 wayuu. 8 Wattakualiika natkaain naya wayuukana suluʼupünaa tia mmakat. Wattaleeya maʼin naalii na wayuu oʼutunakana aaʼin saʼaka tü mojuuikat noulialeʼeya na oʼutunakana aaʼin süka chajaruuta.

9 Nüntiraaleeka Absalón namaa na wayuu nümaajanakana David. Saajuchi Absalón wanee muula, shikerotokoloko tü muulakat suupünaapünaa sütüna wanee wunuʼu miyoʼu maʼin, sükoʼojookoloko nuʼwala Absalón sünain sütüna tia wunuʼukat. Kachetaka nia süpütüin tü muulakat. 10 «Ichaa teʼrüin kachetüin Absalón sünain sütüna wanee wunuʼu», nümakalaka wanee wayuu nümüin Joab. 11 Anuukalaka nünüiki Joab nümüin chia wayuukai: «¿Jamakaʼa nnojotka puʼutatüjülin naaʼin? Taapüinje pümüin poloosü nneerü pülaata jee wanee kasa süseʼeruʼupünaaka wayuu». 12 Anuukalaka nünüiki chia wayuukai nümüin Joab: «Nnojorüleejaʼa süpüla toʼutajatüin naaʼin nüchon chi laülaashikai, jaʼitakajeʼe neʼe saapünüle tamüin 1.000 nneerü pülaata. ‹Jaaʼinmaja Absalón suulia nuʼutunuin aaʼin sutuma wayuu›, mataashi nümakai chi laülaashikai pümüin, nümüin Abisái otta nümüin Ittái. 13 Toʼutüle naaʼin Absalón, mojutusalüjaʼamata tamüin tü nümakat chi laülaashikai. Jamüshijaʼa naapataale süchiki tü taaʼinrakat, nnojoishije pia asoutuin taaʼu». 14 Anuujeseʼe nünüiki Joab nümüin chi wayuukai: «Anashi toʼunai puulia, ashapajaashi taya, nnojoishi taya yootokuʼu müinjachin pümaa». Naapaainjeseʼe Joab apünüinsü oʼojia kasajakat maʼin eʼichi, nütkakalaka naaʼinpünaa Absalón süka tia oʼojiakat yalaiwaʼaya kachetüin nia sünain sütüna tü wunuʼukat sümaa katüin noʼu. 15 Nantakalaka polooshii wayuu alüʼüjawaikana tü nütkaayakat Joab, nasheʼejakalaka Absalón noʼutaleepaʼaya naaʼin. 16 Niʼyalajitkalaka Joab suʼuwa tü anneetkat, nooʼulaakalaka na wayuu nümaajanakana suulia eipiijaa na wayuu paaʼinwakana nümaa Absalón, naaʼinrüin tia Joab süpüla nojoʼlooinjanain na wayuukana suulia atkawaa. 17 Nojutakalaka Absalón suluʼu wanee ishi oʼutusü maʼin eejatkat saʼaka tia mojuuikat, nojunuinjeseʼe watta saalii ipa naaʼu. Napantajaakalaka nepialuʼumüin na israelita paaʼinwakana nümaa Absalón.

18 Kataiwaʼaya noʼu Absalón, nüshaʼwaleʼerirüin wanee ipa suluʼu tü patajatshii nuumainkat chi Laülaashikai. Anuu nünüiki Absalón: «Machonsai taya, nnojoleechikalaka eein wanee tachon tanülialuʼukai». Niʼitaakalaka sünülia tia ipakat tü Ipa nünülialuʼukat Absalón, ayatayülia sünüliain atumawaa tia maaʼulu yaa.

19 Anuukalaka nünüiki Ahimáaz, chi nüchonkai Sadoc: «Anashi püjütüle taya süpüla taapirüin chi laülaashikai, jama süsalain naainjala nutuma Jehová na nüʼünüükana chi laülaashikai». 20 Anuukalaka nünüiki Joab nümüin Ahimáaz: «Yaashia pia, nnojotsü anain puʼunule sünain aapiraa soʼu kaʼikat tüü, jama outuin nüchon chi laülaashikai». 21 Anuukalaka nünüiki Joab nümüin wanee wayuu chejeʼewai suluʼu tü mmakat Cus:* «Anashi paapirüle chi aluwataashikai süchiki tü kasa alatakat». Ejepülaashijeseʼe chia wayuukai nümülatuʼu Joab jee nüpantajaakalaka. 22 Anuujeseʼe nünüiki Ahimáaz nüchikuaʼa nümüin Joab: «Jaʼitasü kasain alatüin tamüin, püjütaʼaya taya tawataaiwa nüchiirua chi wayuu chejeʼewaikai Cus». Anuukalaka nünüiki Joab nümüin: «¿Kasakai maʼin püsaajüinjatkat tachonchee? Nnojotsü eein wanee kasa püküjainjatka nümüin chi laülaashikai». 23 «Püjütaʼaya taya jaʼitasü kasain alatüin tamüin», nümakalaka Ahimáaz nümüin Joab. Anuukalaka nünüiki Joab nümüin: «Puʼuna pümaala». Nüpantajaakalaka Ahimáaz suluʼupünaa tü wopu chaʼwatkat suluʼu tü mmakat Jordán. Nülatirapünaaka chi wayuu chejeʼewaikai Cus.

24 Joyotushi David pasanain sünain tü piamasükat soʼu pueulo. Aʼliikajaashijeseʼe chi wayuu aapirawaikai saaʼu tü saajunakat süsepü tü pueulokot, niʼrüinjeseʼe wattajee wanee wayuu awataakai sünainmüin tü pueulokot. 25 Naapinnakalaka chi laülaashikai nutuma chi wayuu aapirawaikai wayuu suluʼu tü pueulokot. Anuujeseʼe nünüiki chi laülaashikai nümüin: «Nümüiwaʼale nia pütchimaajachijaʼamata». Sümaʼainruʼu nülüʼülaain chia wayuukai, 26 niʼrakalaka chi wayuu aapirawaikai wayuu suluʼu tü pueulokot wanee wayuʼuya awanaajakai nümüiwaʼa, anuujeseʼe nünüiki nümüin chi jülüjakai aaʼin soʼu tü pueulokot: «Iseeichi wanee wayuu awanaajüin nümüiwaʼa». Anuukalaka nünüiki chi aluwataashikai nümüin: «Pütchimaajachi chiseya». 27 Anuukalaka nünüiki chi aapirawaikai wayuu: «Chise palajachikai müsü nuwatira maʼaka nuwatira Ahimáaz, chi nüchonkai Sadoc». Anuukalaka nünüiki chi aluwataashikai: «Wayuu anamia chise, eʼikajaashi eera pütchi analuʼulu». 28 Anuukalaka nünüiki Ahimáaz nümüin chi laülaashikai: «Eʼikajaashi taya pümüin wanee pütchi anasü maʼin». Nejepülaakalaka nümülatuʼu chi laülaashikai sünain maa: «Kasataalejeseʼe nuʼwaajünüin Jehová, chi Pümaleiwasekai, chi süsalakai atuma naainjala na wayuu eʼrüliijaakana wayumüin pümüin».

29 Anuukalaka nünüiki chi laülaashikai nümüin Ahimáaz: «¿Anayaashijeʼe Absalón, chi tachonkai?». Anuukalaka nünüiki Ahimáaz nümüin: «Ayoojooyoo müsü* wayuu wanaa sümaa nüjütüin taya Joab nümaa chi wane wayuu püchepchiakai, nnojotpejeʼe tatüjaain saaʼu kasain alatüin». 30 Anuukalaka nünüiki chi laülaashikai nümüin: «Yaajeeruʼu pia», nünsülaakalaka Ahimáaz.

31 Anuukalaka nünüiki chi wayuu chejeʼewaikai suluʼu tü mmakat Cus: «Antüshi taya sünain eʼikajawaa wanee pütchi pümüin. Soʼu kaʼikat tü nuʼtteʼerüin pia Jehová noulia na wayuu eʼrüliijaakana pümüin». 32 Anuukalaka nünüiki chi laülaashikai nümüin chi wayuu chejeʼewaikai suluʼu tü mmakat Cus: «¿Anayaashijeʼe Absalón, chi tachonkai?». Anuukalaka nünüiki chia wayuukai nümüin: «Laülaashikalee, kasataalejeseʼe sülatüin namüin na püʼünüükana jee namüin na wayuu eʼrüliijaakana wayumüin pümüin tü alatakat nümüin chi püchonkai».

33 Sainkuukalaka naaʼin chi laülaashikai naapaiwaʼaya tü pütchikat, nuʼunakalaka sünain aʼyalajaa suluʼumüin tü miichi eejatkat saaʼu süsepü tü pueulokot. Anuukalaka nünüiki chi laülaashikai sümaʼainruʼu warai nümüin: «Absalón, tachonchee, tachonchee, Absalón, tachonchee. Anashije tayale outuin püchikumüin. Absalón, tachonchee, tachonchee».