Chiiruaajatka karaloʼuta Samuel
5 Noutkajaakalaka mapa napüshuaʼa na israelitakana chaa Hebrón nümaʼanamüin David jee namakalaka nümüin: «Aashin püpüshiyaain waya. 2 Pia nekiipüʼütüjüika na surulaatkana sünain atkawaa nuluwataiwaʼaya waaʼu Saúl jee müshi Jehová pümüin: ‹Müinjana pürüleʼerakai naaʼin na tapüshikana jee piainjachi nekiipüʼüka na israelitakana›». 3 Oʼunushiijeseʼe napüshuaʼa na laülaashiikana napüleerua na israelitakana sünain anaʼlawaa nümüin David chaa Hebrón. Nüpansaajaka nünüiki David namüin nuʼupala Jehová, naneekaka nia süpüla niainjachin aluwataain naaʼu na israelitakana.
4 Apünüin shikii nuuyase David wanaa sümaa nuʼttuin sünain aluwatawaa jee aluwataashi nia soʼunnaa pienchi shikii juya. 5 Aluwataashi nia Hebrónjee saaʼu tü mmakat Judá soʼunnaa akaratshi juya shiatapünaamüin. Shiasaʼa chapa nia Jerusalén, aluwataashi nia saaʼu tü mmakat Israel otta Judá soʼunnaa apünüin shikii apünüinmüin juya. 6 Nuʼunakalaka David chaa Jerusalénmüin namaʼaleeya na wayuu nümaajanakana sünain atkawaa namaa na jebuseo chajanakana suluʼu tia mmakat. Meeʼerapalapejeʼe neʼe David natuma na jebuseokana jee namakalaka nümüin: «Iseerü püchiki ekeroloo suluʼumüin pueulokot tüü. Eipinneechi neʼe pia nutuma wanee wayuu eekai moʼuin jee nutuma wanee eekai masaʼain». Müsü nanüiki süka namüin suluʼu naaʼin: «Iseerü nüchiki David ekeroloo suluʼumüin pueulokot tüü». 7 Ekerolopejeʼe David suluʼumüin tü pueulo kasepüsükat kanüliakat Sion, tü «Nupueuloinkot David», münüsü tia maaʼulu yaa. 8 Anuujeseʼe nünüiki David noʼu kaʼikai chia: «Na wayuu ashutajanakana naaʼu na jebuseokana, anashii noʼunule suluʼupünaa tü süpünakat wüin, noʼuteetka naaʼin ‹wanee wayuu eekai masaʼain otta eekai moʼuin›. Nüʼürülashii David naya wayuukana». «Nnojoishi süpüla nikerolojachin suluʼumüin wanee miichi wanee wayuu eekai moʼuin otta eekai masaʼain», müsüjeseʼe sümawalin wayuu. 9 Kepiakalaka David suluʼu tü pueulo kasepüsükat, tü «Nupueuloinkot David» sümünakalaka amüin tia pueulokot. Nukumajakalaka watta saalii kasa suluʼupünaa tia pueulokot jee sooʼopünaa tü namüna kanüliakat Miló. 10 Kojutukalaka maʼin David atumawaa otta eejachi Jehová nümaa, chi Maleiwa laülaashikai naaʼu na aapiee chakana iipünaa.
11 Nüjütirüinjeseʼe Hiram chi aluwataashikai saaʼu Tiro wayuu sünain eʼikajawaa nümüin David tü wunuʼu kanüliakat cedro, nuluwataainña nümüin wayuu atüjakana aʼyatawaa süka taapüla jee süka ipa süpüla nakumajüinjatüin süsepü wanee kasa jee nakumajakalaka wanee miichi nipiainjatü David. 12 Niyaawatakalaka saaʼu David nüikaleʼennüin sünain aluwatawaa naaʼu na israelitakana nutuma Jehová. Anakalaka maʼin nukuwaʼipa David sünain aluwatawaa, naaʼinrüin tia Maleiwa süpüla neʼrüinjanain kasa anasü na israelitakana.
13 Nuʼunapa David suluʼujee tü mmakat Hebrón, watta naalii na jieyuu nuʼwayuusekana jee na suwalaʼatakana nuʼwayuuse chaa Jerusalén, wattakalaka naalii na nüchooinkana David. 14 Anuujeseʼe nanülia na nüchooinkana David chaa Jerusalén: Samúa, Sobab, Natán, Salomón, 15 Ibhar, Elisúa, Néfeg, Jafía, 16 Elisamá, Eliadá otta Elifélet.
17 Noʼunakalaka na filisteokana sünain ashutaa naaʼu David naapapa süchiki nüneekünüin süpüla aluwatawaa naaʼu na israelitakana, ounjulaashijeseʼe David napüleerua naapapa süchiki tia. 18 Naʼwalakalaaka na filisteokana süpaʼapünaa tü patajatshii chajatkat Refaím. 19 Anuujeseʼe nünüiki David nümüin Jehová: «¿Anashiche toʼunule sünain atkawaa namaa na filisteokana? ¿Paapeena ekii tamüin?». «Aa, anashi puʼunule sünain atkawaa namaa, taapeena ekii naya pümüin», nümakalaka Jehová nümüin David. 20 Nuʼunakalaka David suluʼumüin tü mmakat Baal-Perazim, nakanajuukalaka na filisteokana nutuma suluʼu tia mmakat jee nümakalaka: «Nia Jehová akanajaka na taʼünüükana, nujuttirüin naya maʼaka sujuttuin süsepü pueulo sutuma sütsüin wüin». «Baal-Perazim», nümakalaka David sümüin tia mmakat. 21 Napütapünaaka na filisteokana shiyaakua namaleiwase, sülüʼüjünaka nutuma David jee natuma na wayuu nümaajanakana.
22 Naʼwalakalaakala na filisteokana suluʼupünaa tü patajatshii chajatkat Refaím. 23 Anuu nünüiki Jehová nümüin David sutuma nuchuntuin kaalinwaa nümüin: «Anashi nnojoire pushutuin napanapejee naya wayuukana, anashii püʼleeyarüle naya, pushuteechika naaʼu nachiiruajee wanaa maʼin sümaa tü wunuʼuliakat bacá. 24 Shiasaʼa paapapa suuʼuisanain surulaat süraloʼujee tü wunuʼuliakat bacá, anashi piyaawatüle saaʼu tayain tayakai Jehová, oʼunuin püpüleerua süpüla tayamülajanain na surulaat filisteokana, shiakalaka anain aluʼu pushutamaatüle naaʼu». 25 Naaʼinrüinjaʼa David tü nümakat Jehová nümüin, niyamütkalaka na filisteokana suluʼujee tü mmakat Gueba suluʼumüinreʼeya Guézer.