Palajatka karaloʼuta namüinjatka na chajanakana Corinto
5 Aküjünüsü tamüin nüchiki wanee wayuu aʼluwajiraakai nukuwaʼipa.* Yarüttüsü maʼin tü kasa naaʼinrakat suulialeʼeya tü naaʼinrakat na manoujainsaliikana. Aküjünüsü tamüin nüchiki chia wayuukai sünain nüsütüin nuʼwayuuse chi nüshikai. 2 ¿Aʼwaataashii jia saaʼu tia? ¿Aashin mojuinjatüin jaaʼin sümaa jujuʼitirüinjachin jaʼakajee chi makai aainjala? 3 Mayaainjeʼe nnojolin chain taya jümaa, jülüjasü taaʼin tü kasa alatakat jaʼaka. Mojukalaka tamüin tü naaʼinrakat chia wayuukai, müshi chakaijaʼaya taaʼin jümaa. 4 Juutkajaapa saaʼu nünülia chi Waseñotsekai Jesús jütüjaa aaʼu jülüjain taaʼin* tü kasa alatakat chaa jaʼaka otta naapeerüin jümüin chi Waseñotsekai Jesús tü nüpülainkat. 5 Jaapajachi ekii chia wayuu kaainjalashikai nümüin Satanás suulia kaainjalajüin wayuu nutuma. Nayouteetka süchiki kaainjalaa na anoujashiikana soʼu nükalia chi Señotkai.
6 ¿Aʼwaataashii jia saaʼu tia alatakat jaʼaka? Kaainjarale wanee wayuu müsü aka saaʼin tü soolojiakat pan, oolojoʼoleesia süpüshuaʼa tü ariinakat sutuma. ¿Aashin jütüjaain saaʼu tia? 7 Maa jüsünneʼerakai saaʼin tü soolojiakat pan eekai kakaliairüin süpüla müinjanain jia maʼaka saaʼin wanee ariina jeketü maʼakakat soolojia, maʼaka jukuwaʼipa müinmaʼa yaa, süka jamüin, oʼutunuichipa aaʼin Cristo chi makai aka naaʼin chi anneetchon ekaanakai soʼunnaa tü Pascuakat.* 8 Sünain tü outkajawaa süchikijeekat tü Pascuakat, nnojoishii waya eküinjanain tü pan kaʼakakat soolojia eekai kakaliairüin jee nnojoluinjatü tü soolojiakat pan shiyaawasekat kaainjalaa jee tü shiyaawasekat mojulawaa. Shia neʼe weküinjatka tü pan maʼakakat soolojia, tü shiyaawasekat kasa eekai anain jee kasa eekai shiimain.
9 Ashajüshinka taya jümüin shiiʼiree juuʼulaainjanain suulia aleewaa namaa na wayuu aʼluwajiraakana nakuwaʼipa. 10 Nnojotsü shiain taküjeein jümüin jükatalaʼaleeinjanain suulia wayuu. Naya wayuukana aʼluwajiraashii nakuwaʼipa, suchuntaain naaʼin wanee kasa naata kakorotshi, nemeejüin wayuu saaʼu sukorolo jee aʼwaajüshii naya maleiwayaasü. Shialeje tachuntuin tia jümüin nnojoishiije jia saʼakain wayuu. 11 Aniisa joo taya ashajüin jümüin süpüla nnojoliinjanain nümaain jia wanee wayuu eekai nunoujashin naashin sümaa nuʼluwajiraain nukuwaʼipa, kachiiruain naaʼin naata kakorotshi, nuʼwaajüin maleiwayaasü, mojuin nünüiki sümüin wayuu, nipeʼrülin jee nimeejüin wayuu saaʼu sukorolo. Nnojoliireejaʼa jia ekaainjanain nümaa chia wayuukai. 12 Nnojoishi tayain süsalainjachin atuma naainjala na wayuu nnojoliikana anoujiraain wanaa wamaa. ¿Nnojoishiijasaʼa jiain süsalainjanain atuma naainjala na wayuu junoujiraakana amaa? 13 Niapejeʼe Maleiwa süsalain atuma naainjala na wayuu nnojoliikana anoujain. «Jujuʼitira jaʼakajee chi wayuu kaainjalashikai».