Jueces

2 Nuʼunakalaka chi aapiee nümaʼanajeejachikai Jehová chejee suluʼujee tü mmakat Guilgal chamüin suluʼumüin tü mmakat Bokim, anuukalaka nünüiki: «Tayuʼluin jia Egiptojee jee tamaashii jia suluʼumüin tü mma tapansaajakat namüin na jutuushinuukana. Anuu tanüiki namüinña: ‹Nnojoleerü taʼwüinjeʼerüin tü pütchi tapansaajakat jümüin. 2 Akaataajaʼa neʼe jiakana, nnojoishii jia apansaajiraainjanain jünüiki namaa na wayuu kepiakana suluʼu mmakat tüü, jajaʼttirüinjatü eere naʼajüin kasa namüin namaleiwase›. Nnojoliipejeʼe jia oonooin sümaa tanüiki, ¿jamüshiikai makaʼa jia? 3 Anuu joo tanüiki jümüinña: ‹Nnojoleena tayuʼluin naya jüpüleerua suluʼujee mmakat tüü, nemeejeena jia jee naʼwaajireena jia namaleiwase›».

4 Naʼyalajakalaka maʼin na israelitakana kettaapa nünüiki chi aapiee nümaʼanajeejachikai Jehová. 5 Neʼitaaka Bokim* sünülia tia mmakat jee naʼajakalaka wanee kasa nümüin Jehová.

6 Nüjütapa Josué na israelitakana, oʼunushii naya suluʼumüin tü mma aapünakat namüin waneʼewai nakua. 7 Naʼyataakalaka na israelitakana nümüin Jehová nükalioʼu Josué otta nakalioʼu na laülaashii eejanakana nüchikumüin Josué, na eʼrakana süpüshuaʼa tü kasa pülasü naaʼinrakat Jehová napüleerua na israelitakana. 8 Nünaajaakalaka Josué soʼu 110 nuuyase, nüchon nia Nun jee aʼyataashi nia nümüin Jehová. 9 Niʼitaanakalaka Josué suluʼu tü mma aapünakat nümüin, suluʼu tü mma kanüliakat Timnat-Heres, saaʼu tü uuchikat eere na nüikeyuukana Efraín, palaapünaa sünain tü uuchikat Gaas. 10 Ajaʼlajaashii na wayuu eejanakana nükalioʼu Josué, naya apütaaka na naikeyuukana, nnojoipejeʼe neʼraajüin Jehová jee nnojotsü natüjaain saaʼu tü naaʼinrakat napüleerua na israelitakana.

11 Naaʼinraka na israelitakana tü kasa mojukat nümüin Jehová jee naʼwaajüin niyaakuairua chi maleiwayaashi kanüliakai Baal. 12 Nnojoishi sotuin Jehová naaʼin, Namaleiwase na natuushinuukana, chi ayuʼlakai naya suluʼujee tü mmakat Egipto. Ayatüshiʼiya naya aʼwaajüin maleiwayaasü, naʼwaajüin namaleiwase na wayuu kepiakana pejepünaa nanain, nasapainkashii naya namülatuʼu jee jashichikalaka Jehová namüin. 13 Nnojoishi sotuin Jehová naaʼin, naʼwaajüin neʼe Baal otta shiyaakua Astoret. 14 Müshijeseʼe naashichijaain Jehová namüin na israelitakana, naapüin naya sajapuluʼu kaʼruwarannuu, sajaʼttiraka tü kasa eejatkat namaʼana. Niyüülajüin naya napüla naʼünüü kepiakana pejepünaa nanain jee nayamünnakalaka natuma. 15 Noʼunule na israelitakana sünain ashutaa naaʼu naʼünüü, ayatüshiʼiya naya akanajuuin, jama peʼipaain Jehová namaa jee nuluwataaka kasa mojusü namüin. Ayatüsia ekeraajüin tü nümakat Jehová paala otta ayatüsia alatüin tü nüpansaajakat Jehová paala. Müliashiijeseʼe na israelitakana sünainjee tia. 16 Müshiijeseʼe nüneekawalin Jehová wayuu nekiipüʼüinjana süpüla nakaalinjain naya suulia kaʼruwarannuu.

17 Nnojoliipejeʼe oonooin na israelitakana sümaa nanüiki na wayuu nekiipüʼüjanakana nutuma Maleiwa, aʼwaajüshii neʼe maleiwayaasü,* nasapainkashii namülatuʼu. Ooʼulaamaatüshii naya suulia anoujaa. Nnojoishi naʼwaajüin Maleiwa maʼakaapuʼu naʼwaajüin nia na natuushinuukana, nnojoishii naya oonooin sümaa tü nuluwataakalü anain Jehová maʼakaapuʼu noonooin na natuushinuukana. 18 Nüneekawaipa Jehová wanee nekiipüʼü na israelitakana, eejachi Jehová nümaa chia nekiipüʼükai, nükaalinjain na israelitakana noulia naʼünüü, naaʼinrüin tia kataiwaʼaya noʼu chi nekiipüʼükai. Amülialaasü naaʼin Jehová naalin na israelitakana naapapa neʼira sutuma müliain maʼin naya atumawaa.

19 Nünaajaapa wanee nekiipüʼü, mojuleesia maʼin tü nakuwaʼipakat suulialeʼeya nakuwaʼipa na natuushinuukana. Aʼwaajüshii neʼe maleiwayaasü, ayatüshiʼiya aaʼinrüin kasa mojusü jee ayatüshiʼiya eʼrüliin wayumüin. 20 Naashichijaakalaka Jehová namüin na israelitakana sünainjee tia, anuujeseʼe nünüiki: «Wayuukana naainnua, mojutusat namüin tü pütchi tapansaajakat namüin natuushinuu, nnojoishii naya oonooin sümaa tanüiki. 21 Sutuma neʼrüliijaain wayumüin, nnojoleena tayuʼluin napüleerua na wayuu nnojoliikana nushutuin aaʼu Josué kataiwaʼaya noʼu. 22 Sükajee tia tooʼulakeerü naaʼin na israelitakana shiimainrejeʼe noonooin sümaa tanüiki tayakai Jehová maʼakaapuʼu naaʼinrüin shia na natuushinuukana». 23 Müshiijeseʼe nuuʼulaain Jehová makatüin naya wayuu nnojoliikana judíoin suluʼu tia mmakat, nnojoishii niyuʼlamaatüin naya suluʼujee jee nnojoishii naapüin ekii nümüin Josué.