Palajatka karaloʼuta nümüinjatka Timoteo
5 Nnojo airuʼuluin pünüiki püchiaapa wanee wayuu eekai miyoʼuin. Püchiaa nia süka anakalü akuwaʼipa, müinjachi nia maʼaka wanee püshi pümüin otta püchiaa na tepichijakana puulia maʼaka püchiaain na pimüliayuukana. 2 Nnojo airuʼuluin pünüiki püchiaapa na jieyuu laülaayuuinnakana, müinjana naya pümüin maʼaka saaʼin pii. Otta püchiaapa na majayünnüükana, müinjana aka saaʼin pushunuuyuu pümüin, kojutuinjana naya pümüin.
3 Kojuta pümüin na jieyuu outa aʼwayuusechiikana, na shiimainkanajaʼaya eʼrüin choʼujawaa. 4 Kachonle jee kalüinre wanee wayuu eekai outuin aʼwayuuse, nayainjana akaalinjaka shia, jama wayuuin anoujashii naya nünain Maleiwa otta keeʼirakainjatü natuma namüin na wayuu kachooinkana naya jee namüin na kaikeyuukana naya tü naʼyataalakat namaa paala, jama anain tia nümüin Maleiwa. 5 Tü wayuu eekai outuin suʼwayuuse, shiimainkalajaʼaya eʼrüin choʼujawaa jee nnojorüleeka amaʼana wanee kasa, sunouja anainrü nükaalinjeerüin shia Maleiwa otta nnojotsü ooʼulaain shia suulia achuntaa nümüin Maleiwa jee suulia oʼuraajaa nümüin saʼwai otta müsia jaʼipa kaʼi. 6 Eekajasaʼa tü wayuu aaʼinrakat tü kasa suchuntaakat saaʼin, müsü outakai saaʼin mayaainjeʼe katüin soʼu. 7 Shiakalaka anain aluʼu ayatüle pikirajüin naya sünain tü aluwataanakalü anain suulia shiyoujain naya wayuu. 8 Eere wanee wayuu nnojoikai aapeein tü kasa choʼujaakat sümüin nüpüshi jee shialeekajaʼa namüin na wayuu kepiakana nümaa, müsü niyoutakai saaʼin tü nunoujakalü anain otta mojuleesia maʼin nukuwaʼipa nuulialeʼeya wanee wayuu eekai manoulain.
9 Tü wayuu outa aʼwayuuset ashajünüinjatkalü anülia naʼaka na akaalinjünüinjanakana, eeinjatü maʼaka aipirua shikii suuyase otta waneeshitüjülinjachi neʼe chi suʼwayuusekai. 10 Eʼraajünüinjatü shia sutuma wayuu sünainjee tü kasa anasü saaʼinrakat maʼaka shipijain süchonnii, kamaneein maʼin shia, suʼlojuin nooʼui na aneekuushikana, sükaalinjain wayuu eekai shiʼrüin müliaa otta sünainjee saaʼinmaain maʼin aʼyatawaa sünain kasa eekai anain.
11 Nnojo püshajüin nanülia na jieyuu eekai anayüliin sümaa outuin naʼwayuuse, jamüsüjaʼa keeʼireere naaʼin eeinjachin wanee toolo namaa suulialeʼeya aʼyatawaa nümüin Cristo, kasaatshii naya. 12 Kasalajaneerü namüin nnojoluin nekeraajüin tü pütchi napansaajatüjütkalia paala. 13 Wayuu shokulashii naya, sainküinshii naya miichi, nnojoliipejeʼe shokulain neʼe naya, wayuu perulaayuulii naya otta ekerotushii naya sünainpünaa sukuwaʼipa wayuu, naashajaakalaka süchiki wanee kasa nnojotka naashajaainjatüin achiki. 14 Shiakalaka tacheküin kasaalüinjanain na jieyuu eekai nnojoliin laülaain wanaa sümaa outuin naʼwayuuse, kachooinjanain naya, naaʼinmajüinjatüin nepia otta nnojoluinjanain naaʼinrüin wanee kasa wayoujuneenaka anainjee natuma na weʼipolokana. 15 Wattainna naalii na jieyuu ooʼulaakana suulia anoujaa sünain tü pütchi shiimainkat süpüla shiainjatüin neʼe noʼunuin achiirua tü nümakat Satanás. 16 Eere waneinnua jieyuu outakana aʼwayuuse jee süpüshinnakana wanee anoujasü, anashii sükaalinjale naya suulia nayain müliakuʼu müin na wawalayuukana namaa, nayeenaka akaalinjünüin natuma na wawalayuukana na jieyuu outa aʼwayuusechii shiimainkanajaʼaya eʼrüin choʼujawaa.
17 Kojutuinjana maʼin atumawaa na laülaashiikana sünainjee anain maʼin tü naaʼinrakat napüleerua na wawalayuukana, kojutuleejeenapejeʼe naya atumawaa naashajaale jee nekirajüle sünain nünüiki Maleiwa. 18 Anuu tü sümakat tü Karaloʼuta Nüchikimaajatkat Maleiwa: «Nnojo keimataalajain putuma wanee paaʼa toolo wanaa sümaa nüsaichijain tü trigokot süka nuuʼui». Otta müsü shiaya: «Walaainjachi wanee wayuu saaʼu niʼyataain». 19 Nnojo punoujain sünain tü aküjünakat nüchiki wanee wayuu eekai laülaain, aluʼu piamashiire jee apünüinshiire na wayuu aküjakana süchiki tia. 20 Püchiaa noʼupala napüshuaʼa na jutkatüshiikana na wayuu aaʼinrakana kasa mojusü, mmoleenaka na waneinnua. 21 Taluwataain pia nuʼupala Maleiwa, nuʼupala Cristo Jesús jee noʼupala na aapiee aneekuushikana ayatajatüin paaʼinrüin tü aluwataanakalü anain pia sümaa nnojoluin pülerajüin wayuu jee koʼuin pukuwaʼipa sümüin.
22 Nnojo püshapajaajaain püneekajachipa* wanee wayuu süpüla aʼyatawaa nümüin Maleiwa. Nnojo wanaawain pia namaa na wayuu kaainjalakana. Ayata wulein pukuwaʼipa.
23 Nnojo püsüin wüin, shia anaka aluʼu püsüle yootchon wiino süpüla analüin saaʼin püleʼe, jama ayuulin maʼin pia pejeewa.
24 Eesü sütüjaanamaatüle saaʼu tü kasa mojusü naaʼinrakat waneinnua wayuu jee süsalamaatüshii naya saaʼujee tia, eepejeʼe na nnojoliikana atüjaanüin aaʼu kaainjalain naya, atüjaaneerü aaʼu tia mapa. 25 Akaʼaya neʼe sukuwaʼipa tü kasa anasü naaʼinrakat wanee wayuu, atüjaana aaʼu sutuma wayuu jee nnojorülejeʼeya sütüjaanüin aaʼu, atüjaaneerü aaʼu mapa.