Chiiruaajatka karaloʼuta Samuel
22 Niiʼirajaka David nümüin Jehová soʼu tü kaʼi nükaalinjakalü oʼu nia Jehová noulia napüshuaʼa na nüʼünüükana jee nuulia Saúl. 2 Anuu tü niiʼirainkat nümüin:
«Müshi Jehová maʼaka saaʼin wanee ipa miyoʼu tamüin, müshi nia maʼaka saaʼin wanee miichi eere anain taaʼin, pia oʼtteʼeraka taya.
3 Müshi Maleiwa maʼaka saaʼin wanee wutai eere tounjulaʼawalin,
müshi nia maʼaka saaʼin wanee escudo tamüin, pia oʼtteʼeraka taya süka pülain pia, pia tounjulaayaka suulia jamajüin taya atumawaa,
pia tawataaka amaʼanamüin süpüla nnojolinjachin jamajüin taya atumawaa, pia oʼtteʼeraka taya, pia akaalinjaka taya noulia na mojulaajakana.
4 Achuntushi taya kaalinwaa pümüin Jehová, jama piainjachin aʼwaajünüin sutuma wayuu,
pia akaalinjaka taya noulia na taʼünüükana.
5 Müshi pasanainkai taaʼin sünain tü outaakat maʼaka pasanain wanee wayuu sünain sümüna palaa.
Mmotshi maʼin taya neema na wayuu nnojoliikana kasain anain apüla, müshii naya maʼaka saaʼin wanee süchi eekai süsetüin.
6 Müshi kapükai taaʼin sutuma tü Amuuyuukat,*
müshi shimeejakai taaʼin tü outaakat.
7 Shapaasü maʼin taaʼin sünain achuntaa kaalinwaa nümüin Jehová,
ayatüshia taya achuntuin kaalinwaa nümüin.
Naapüinjeseʼe tanüiki suluʼujee tü miichi eere nuʼwaajünüin,
naapüin tanüiki taʼwaatapa nümüin.
8 Aʼyuunalaasü tü mmakat jee akutkujaasü shia,
akutkujaasü tü sirumatuʼukat,
akutkujaasü shia sutuma naashichijaain Maleiwa.
9 Kaitaʼatsü niʼruʼupünaa,
ojuʼitüsü sikoʼu nuwaraluʼujee ajaʼttiraka wanee kasa,
chuwatüsü sikemechi nümülatuʼu.
10 Müsü sejepülaakai saaʼin tü sirumakat sümaʼainruʼu nüshakatüin Maleiwa mmoluʼu,
kojosü maʼin tü sirumakat suupünaa nuuʼui.
11 Antüshi nia naaʼu wanee querubín,
naajuchi nia wanee aapiee.
12 Müshi nikerotokoi aaʼin saʼakamüin piʼyuushi,
kojosü maʼin siruma nüʼütpünaa, müshi nikerotokoi aaʼin suluʼumüin wanee miichi.
13 Warattuuikalaka nüpüleerua, suchuwanajaaka tü sikemechikat sutuma suwarala tü luusakat.
14 Atüttüsü iipünaajee nutuma Jehová,
aapünüsü nünüiki chi Miyoʼushikai maʼin.
15 Nuʼwalakajeʼerüin na nüʼünüükana nuuʼulakapa naya süka tü jatükat,
müshii jalapaʼakai naaʼin kayaapa tü juyakat nutuma.
16 Jaʼyaleesia shiinaluʼu tü palaakat
jee suuʼui tü mmakat sutuma jashichin Jehová
jee sutuma sujuula niʼichi.
17 Niyurulaka tü nütünakat iipünaajee,
niyuʼlaka taya shirokujee wüin oʼutaka maʼin.
18 Nükaalinjain taya nuulia chi taʼünüü pülakai maʼin,
nükaalinjainña taya noulia na aʼürülaapuʼukana tanain, na katchinjakana maʼin toulia.
19 Nashuta aaʼuchi taya soʼu tü kaʼi müliakalü oʼu taaʼin,
nükaalinjapejeʼe taya Jehová.
20 Nükaalinjain taya suulia jamajüin taya atumawaa,
nuʼtteʼerüin taya süka talatüin nia tamaa.
21 Eʼrüshi taya kasa anasü nutuma Jehová süka lotuin takuwaʼipa,
aapüshi nia kasa anasü tamüin süka wulein takuwaʼipa.
22 Oʼunushi taya suluʼupünaa nüpüna Jehová
jee nnojoishi taya akatalaain nuulia chi Tamaleiwasekai.
23 Oonooshi taya sümaa tü nuluwataakalü anain,
nnojoleechi taya akayalaain suulia tü pütchi nüikaleʼerakalü ekii.
24 Ayateeria wulein takuwaʼipa nümüin,
eejeerü taaʼin suulia taaʼinrüin wanee kasa eekai mojuin.
25 Kasataalejeseʼe naapüin tamüin Jehová kasa anasü saaʼu lotuin takuwaʼipa
jee saaʼu wulein takuwaʼipa.
26 Aishi püpüla chi wayuu waneepiakai pümaa,
wuleerü pukuwaʼipa nümüin chi wayuu wulekai akuwaʼipa.
27 Aainjashi pia kasa anasü napüleerua na wayuu aainjakana kasa anasü,
pimeejeenapejeʼe na kamaʼüraliikana.
28 Puʼtteʼerüin na nnojoliikana yaletüin aaʼin,
nnojotpejeʼe anain pümüin nakuwaʼipa na yaletakana aaʼin jee paapülijüin naya.
29 Jehovákalee, müshi pia maʼaka saaʼin wanee ranpara tamüin.
Nia Jehová anakaka tü piʼyuushi pasanainkalü anain taya.
30 Tountuin tashutüin saaʼu kaʼruwarannuu süka pükaalinjain taya,
tountuin talatüin süchikumüin süsepü pueulo sükajee nüpülain Maleiwa.
31 Lotusü nüpüna chi shiimainshikai suluʼu Maleiwain,
wulesü tü pütchi niweetirakat Jehová.
Müshi nia maʼaka saaʼin wanee escudo namüin na anoujakana nünain.
32 Jehovákalee, nnojoishi eein wanee Maleiwa makai aka paaʼin,
piaʼala neʼe makai aka saaʼin wanee ipa miyoʼu wamüin.
33 Chi shiimainshikai suluʼu Maleiwain, müshi pia aka saaʼin wanee süsepü miichi ichekat maʼin eere tounjulaain,
aneerü maʼin tapüna putuma.
34 Kajaalapüsü tooʼui nutuma maʼaka kajaalapüin suuʼui irama,
nnojoishi taya nuuʼulaain tojutuuin saaʼujee uuchi eekai katuʼushin.
35 Nikirajüin taya süpüla tatüjainjachin atkawaa,
tountuin tashokolüin wanee jatü aainjuushikat süka cobre.
36 Paapüin tamüin tü escudo pümaʼanakat süpüla puʼtteʼerüin taya,
kojutushi taya atumawaa süka nnojoluin yaletüin paaʼin.
37 Peeruʼuluin tapüleerua tü wopukot,
nnojoleechi taya asiʼranajaain.
38 Oushikajaajeechi taya nachiirua na taʼünüükana jee tajaʼttireena naya.
Aleʼejaleejeechi taya tachikuaʼa tajaʼttiraleepa naya.
39 Tajaʼttireena naya jee tachuwerajaajeena naya süpüla nnojoluinjanain natamaain.
Tooʼuipaleena naya.
40 Pükatsüinreerü taaʼin süpüla tatkaainjachin,
pujuttireena tamülatuʼu na taʼünüükana.
41 Apattajaajeena putuma na taʼünüükana tapüleerua,
tajaʼttireena na aʼürülaakana tanain.
42 Achuntushii naya kaalinwaa, nnojotpejeʼe jaralin oʼtteʼerüin naya.
Achuntushiʼiya naya kaalinwaa nümüin Jehová masoutuinpejeʼe nia namüin.
43 Tayüüjaajeena naya, yütcheʼechonjeena naya tatuma maʼaka yütchoin sümamüla mma.
Yütcheʼechonjeena naya tatuma, taliikateena aaʼu naya maʼaka taliikatüin saaʼu pootshi eekai süpaʼapünaa kaaye.
44 Puʼtteʼereechi taya suulia mojujain nanüiki tachiki na wayuu taluwataakana aaʼu.
Paaʼinmajeechi taya süpüla nekiipüʼüin taya na wayuu eekana sainküin mma.
Aʼyataajeerü tamüin wayuu nnojotka teʼraajüin.
45 Jaratteena tanainmüin na wayuu wattajeʼewaliikana,
jaa meena naya tamüin sutuma tü naapakat tachiki.
46 Mmoleena na wayuu wattajeʼewaliikana,
anteena naya tanainmüin sümaa kutkuttüin naya suluʼujee tü pueulo eere nounjulaain.
47 Kasataalejeseʼe nuʼwaajünüin Jehová chi Maleiwa matüjainkai outaa, chi makai aka saaʼin Wutai tamüin.
Kasataalejeseʼe kojutuin atumawaa chi Tamaleiwasekai, chi makai aka saaʼin Wutai tamüin, chi oʼtteʼerakai taya.
48 Pasalaashi taya nutuma chi shiimainshikai suluʼu Maleiwain,
nüneeküin taya süpüla taluwataainjachin saaʼu wayuu.
49 Pükaalinjain taya noulia na taʼünüükana.
Piyalerüin taya iipünaamüin noulia na awataakana tooʼomüin.
Puʼtteʼerüin taya nuulia chi wayuu mojulaakai.
50 Müshijeseʼe taapeechin pümüin analuʼut Jehovákalee suʼupala wayuu eeka sainküin mma.
Taʼwaajeechikalaka pia* sükajee jayeechi.
51 Taya David, chi püneekajalakai süpüla aluwatawaa.
Aainjashi pia kasa pülasü tapüleerua süpüla puʼtteʼerüin taya.
Ayatüshia alin taya püpüla waneepia jee ayateena alin püpüla na taikeyuukana».