Chiiruaajatka karaloʼuta namüinjatka na chajanakana Corinto
10 Shia tachekaka achiki jaaʼinrüin tü taluwataakalü anain, nia tashataka akuwaʼipa Cristo taashajaapa jümaa, wayuu anamia nia jee kamaneeshi. Eekajasaʼa naashin waneinnua wayuu jaʼakajee wayuʼulaa neʼe taya jee nnojoishi mmoluin taya sünain ashajaa jümüin naashin. 2 Kasataalejeseʼe nanoutuin nakuwaʼipa na wayuu jülüjakana aaʼin müin wakuwaʼipa maʼaka nakuwaʼipa na manoujainsaliikana. Nnojorüle nanoutuin nakuwaʼipa, aashichijaweechi taya namüin chapeena taya jaʼakamüin. 3 Mayaainjeʼe wayuuin waya, nnojotsü müin watkaaya maʼaka natkaaya na wayuu manoujainsaliikana. 4 Tü waʼapüla watkaayakat nnojotsü sümaʼanajeejatüin wayuu. Pülasü maʼin shia nutuma chi Maleiwakai süpüla wojuttirajatüin wanee kasa eekai ichein maʼin. 5 Müsü wojuttirakai saaʼin tü shikiiruʼujeejatkat wayuu jee müsü wojuttirakai saaʼin wanee kasa eekai ataʼülüin sukuwaʼipa wayuu suulia shiʼraajüin chi Maleiwakai. Müsü püreesakai saaʼin watuma wanee kasa eekai jülüjain waaʼin süpüla woonooinjanain sümüin nünüiki Cristo. 6 Sütüjaanapa aaʼu joonooin sümaa tü aluwataanakalü anain jia, süsaleena naainjala watuma na wayuu nnojoliikana jaa müin.
7 Jüküjain anale jee mojule wanee kasa sünainjee tü kasa jiʼrakat. Eere wanee wayuu shiimainkai amüin nuushikajaain süchiirua nukuwaʼipa Cristo, anashi nüsakireʼerüle naaʼin sünain tüü: nnojoishi niain neʼe oushikajaain süchiirua nukuwaʼipa Cristo, oushikajaashiʼiya waya süchiirua nukuwaʼipa Cristo. 8 Aapünüsü tamüin laülawaa nutuma chi Señotkai süpüla takatsüinrüin junoula, nnojotsü süpülajatüin müliainjanain jia tatuma. Jaʼitayaain taʼwaataain motsomüinyaakaijeʼe neʼe saaʼu tia, nnojoleechi taya eʼrüin japülii. 9 Nnojoliipejeʼe teimmolojeein jia sükajee tü karaloʼuta taluwataakat jümüin. 10 Anuu tü namakat waneinnua wayuu tachiki: «Kojutusü tü pütchi nüshajakat jee kaawainsü maʼin nünüiki, shiasaʼa yaapa nia wamaa wayuʼulaa neʼe jee müshi matüjainñaakai naaʼin aashajawaa». 11 Chi makai anüiki mayaa, anasü nütüjaale saaʼu waaʼinreerüin chapeena waya süpüshuaʼa tü pütchi washajakalü achiki suluʼu tü karaloʼuta waluwataakat. 12 Nnojotsü wanaawain waaʼin namaa na wayuu anakana akuwaʼipa naashin jee nnojotsü wayaawajeʼerüin wakuwaʼipa namaa. Nayaawajeʼerüle tü nakuwaʼipakat sümaa tü kasa anakat naashin, ayaawatüneerü aaʼu nnojoluin kasain natüjaain aaʼu.
13 Nnojoleena waya aʼwaataain suluʼu wanee kasa nnojotka waʼyataain anain. Shia waʼwaataaka aluʼu tü aʼyatawaa naapakat Maleiwa wamüin, jialeeya süpüshi tia waʼyataainkat. 14 Nnojoishii alanaʼaleeinña waya suulia tü aʼyatawaa niʼitaakat Maleiwa wajapuluʼu soʼu chejeein waya jümaʼanajee. Jia waküjaka amüin palajana tü pütchi anakat maʼin nüchiki Cristo. 15 Nnojoishii waya aʼwaataain suluʼu tü kasa nnojotkat waʼyataain anain, tü naatakat kaʼyataainshi. Shia waʼatapajaka kooʼomüinjatüin tü junoulakat jee kooʼomüinjatüin tü kasa waʼyataakalü achiirua, watteetkalaka saalii waʼyataain. 16 Wounteerü waküjain tü pütchi anakat maʼin suluʼupünaa tü mma chakat wattapünaa jünain suulia waʼwaataʼalaain suluʼu naata kaʼyataainshi. 17 «Chi wayuu aʼwaataakai suluʼu nukuwaʼipa, anashi nuʼwaataale suluʼu niʼraajüin Jehová».* 18 Nia nüneekaka Jehová* chi wayuu talatakai amaa naaʼin, nnojoishi niain nüneeküin chi wayuu anakai akuwaʼipa nüküjainruʼu.