Génesis

14 Soʼu nükalia Amrafel, chi aluwataakai saaʼu Sinar jee soʼu nükalia Arioc, chi aluwataakai saaʼu Elasar nümaʼaleeya Kedorlaomer, chi aluwataakai saaʼu Elam jee müshia Tidal, chi aluwataakai saaʼu Goyim, 2 atkaashii naya aluwataashiikana nümaa Bera, chi aluwataakai saaʼu Sodoma jee nümaa Birsá, chi aluwataakai saaʼu Gomorra. Eejachiaʼaya Sinab namaa, chi aluwataakai saaʼu Admá jee müshia Seméber, chi aluwataakai saaʼu Zeboyim otta eejachia chi aluwataakai saaʼu Bela, tü Zóar münakat. 3 Noutkajeʼeraka nasurulaatse naya jaʼraishiikana aluwataalii chaa eekai tü nasapüshii kanüliakat Sidim, chaa eekai tü palaa kanüliakat mar Salado.

4 Aʼyataashii naya nümüin Kedorlaomer soʼutpünaa poloo piamamüin juya, shiasaʼa soʼu tü polookalü apünüinmüin juya, neʼrüliijaaka wayumüin. 5 Soʼu tü juyakat poloo pienchimüin, nakanaluuka nutuma Kedorlaomer otta na wayuu nümaajanakana, na wayuu kanüliakana refaím chaa Asterot-Carnaim, akanajuushiiyaʼa na wayuu kanüliakana zuzim chaa Cam jee müshiʼiya na wayuu kanüliakana emin chaa Savé-Quiryataim. 6 Akanajuushiʼiya na wayuu kanüliakana horeo saaʼu tü uuchikat Seír chamüinreʼeya El-Parán, tü chakat wanaa sümaa tü isashiipaʼakat. 7 Naleʼejakalaka nachikuaʼa, nantaka chamüin En-Mispat, shia Cadés tia. Nasütaka noumain na wayuu amalequitakana. Nakanalüinña na wayuu amorreokana, na chakana kepiain Hazazón-Tamar.

8 Nujuʼitakalaka chi aluwataashikai saaʼu Sodoma eemüin tü nasapüshii kanüliakat Sidim nümaa chi aluwataashikai saaʼu Gomorra otta chi aluwataakai saaʼu Admá jee müshia chi aluwataakai saaʼu Zeboyim nümaa chi aluwataakai saaʼu Bela, shia Zóar tia. Noutkajaakalaka chayaa süpüla natkaain 9 nümaa Kedorlaomer, chi aluwataakai saaʼu Elam otta nümaa Tidal, chi aluwataakai saaʼu Goyim jee nümaa Amrafel, chi aluwataakai saaʼu Sinar otta Arioc, chi aluwataakai saaʼu Elasar. Pienchishii aluwataashii neʼipamüin na jaʼraishiikana. 10 Watta saalii ishi kaluʼuka mena süpaʼa tü nasapüshii kanüliakat Sidim. Wanaa sümaa nuʼluwataain chi aluwataashikai saaʼu Sodoma jee chi aluwataashikai saaʼu Gomorra, nojutuuka suluʼu tia ishikat jee müshiʼiya joo na wayuu apütaakana, aʼluwataashii uuchoʼumüin. 11 Nayasaʼa na wayuu akanajüshiikana, naapaaka nawashirüin na ayamuluushikana natuma, naapaainña tü eküülü chajatkat Sodoma jee müsia Gomorra, noʼunakalaka süchikijee tia. 12 Nümaanaleeka Lot, chi nüsiipükai Abrán natuma na wayuukana sümaʼaleeya süpüshuaʼa tü nuwashirüinkat, jama chajachin nia kepiain Sodoma, noʼunakalaka süchikijee tia.

13 Nüntakalaka wanee wayuu anülieemaajachi nümaʼanamüin Abrán, chi hebreokai. Aʼluwataashi chia wayuukai jee nüküjaka nümüin Abrán süchiki tü kasa alatakat, chajachi kepiain Abrán eekai tü wunuʼulia miyoʼuyuu sulujutkat nuumain Mamré, chi amorreokai, nuwala nia Escol jee müshia Aner. Paaʼinwashii naya wayuukana nümaa Abrán. 14 Naapaiwaʼaya Abrán nütaʼünnüin chi nüsiipükai, nuutkajeʼeraka na wayuu nümaajanakana, na keraakana süpüla atkawaa, 318 na nüchepchia joʼuushiikana nipialuʼu. Nuʼunakalaka nachiirua na wayuu ashutushiikana, nüntaleeka eemüin tü mma kanüliakat Dan. 15 Nükatajiraaka Abrán saʼwai na nüchepchiakana, nashutaka naaʼu na wayuukana sümaa nakanajuuin natuma. Niipiijaka naya Abrán chamüinreʼeya Hobá, tü chakat palaamüin saaʼujee Damasco. 16 Nülejaka Abrán süpüshuaʼa tü kasa aapaanakat paala, nülejüinña Lot, chi nüsiipükai sümaʼaleeya tü jieyuu ataʼünnüsükat jee müshiʼiya na wayuu amaanakana.

17 Nüleʼejakalaka Abrán süchikijee nükanajuuin Kedorlaomer nutuma namaʼaleeya na aluwataashii nümaajanakana. Apanapajünüshijeseʼe Abrán nutuma chi aluwataashikai saaʼu Sodoma chaa eekai tü nasapüshii kanüliakat Savé, tü nasapüshii nuumainkat chi Laülaashikai münüsü tia mmakalia. 18 Niasaʼa Melquisedec, chi aluwataashikai saaʼu Salem nukolojoko pan sümaa wiino, sacerdote nia nümüin chi Maleiwa Miyoʼushikai maʼin.

19 Nuchuntakalaka Melquisedec anaa nüpüleerua Abrán sümaa nümüin nümüin:

Polookoloko shiʼipa nutuma Abrán tü kasa nükanajakat jee naapaka wanee shiʼipa nümüin Melquisedec.

21 Anuujeseʼe nünüiki chi aluwataashikai saaʼu Sodoma nümüin Abrán: «Paapaa süpüshuaʼa türa wawashirüinkat, anashii nayale püleʼejirüin na wayuukana nachikuaʼa». 22 Nusoutakalaka Abrán nümüin chi aluwataashikai saaʼu Sodoma sünain nümüin nümüin: «Anuu tayalerüin tajapü shiyaawase tapansaajüin tanüiki nuʼupala Jehová, chi Maleiwa Miyoʼushikai maʼin, chi kakumalakai tü sirumatuʼukat sümaʼaleeya tü mmakat, 23 nnojotsü taapaainjatüin wanee kasa eekai pukoroloin, jaʼitasü jiitpalin shia jee shialejeʼeya wanee süülaja püsapaatse, ‹Washirü Abrán sünainjee tü kasa taapakat nümüin›, suulia pümajüin tachiki. 24 Shieerü neʼe waapaaka tü neküitpakat na wayuu tamaajanakana jee puuʼulaa naapaaiwa Aner, Escol jee müshia Mamré süpüshi türa wakanainkat».