Levítico

15 Ayatakalaka naashajaain Jehová nümaa Moisés jee müshia Aarón sümaa nümüin namüin: 2 «Anuu tü jünüikinjatkat namüin na israelitakana: ‹Yarütteechi wanee wayuu kajüle tü nükorolokot. 3 Yarütteechiaʼaya nia sutuma süjü tü nükorolokot, jaʼitasü amülain süjü tü nükorolokot jee suukuule, ayateechi yarüttüin nia.

4 »›Yarütteeria wanee cama nujuleraaka aaʼu chi kajükai akorolo jee yarütteeriaʼaya wanee kasa nüikalaaka aaʼu. 5 Yarütteechi chi wayuu epettakai tia camakat, acheküshi nüshijaain nüsheʼin jee oʼoojüinjachi nia, waneʼereeya wulein nia motsopa kaʼikat. 6 Yarütteechiaʼaya chi aikalaakai eejachire joyotuin chi kajükai akorolo, acheküshi nüshijaain nüsheʼin jee noʼoojüinjachin, waneʼereeya wulein nia motsopa kaʼikat. 7 Jaʼitashi jeʼtshin maʼin chi epettakai chi kajükai akorolo yarütteechi nia, acheküshi nüshijaainjachin nüsheʼin jee noʼoojüinjachin, waneʼereeya wulein nia motsopa kaʼikat. 8 Yarütteechi chi wayuu eekai wulein nejetünüle aaʼu nutuma chi eekai kajüin akorolo, acheküshi nüshijaainjachin nüsheʼin jee noʼoojüinjachin, waneʼereeya wulein nia motsopa kaʼikat. 9 Nüikalaale chi wayuu kajükai akorolo saaʼu tü siiya oʼotünakat saaʼu mürüt, yarütteerü tü siiyakat. 10 Yarütteechi chi eekai epettüin tü nüikalaakalü aaʼu chi kajükai akorolo, waneʼereeya wulein nia motsopa kaʼikat. Yarütteechiaʼaya chi eekai alüʼüjain tia kasakalüirua, acheküshi nüshijaainjachin nüsheʼin jee noʼoojüinjachin, waneʼereeya wulein nia motsopa kaʼikat. 11 Nnojoireje nuʼlojooin najapü chi eekai kajüin akorolo jee nipettataarale wanee wayuu, yarütteechiaʼaya chi wayuu epettünakai, acheküshi nüshijaainjachin nüsheʼin jee noʼoojüinjachin, waneʼereeya wulein nia motsopa kaʼikat. 12 Asoʼttünajatü tü iita aainjuushikat süka pootshi nipettüle shia chi eekai kajüin akorolo, eekajasaʼa nipettüle tü iita aainjuushikat süka taapüla oʼlojoonajatü shia süka wüin.

13 »›Süshaʼwalaapa nuulia chi wayuukai tü süjükat nükorolo jee naawalaapa suulia, nuuʼulaajeetka sülatüin akaratshi kaʼi süpüla wuleinjachin nia. Nüshijaajeetkalaka nüsheʼin jee noʼoojeechika shiroku wüin palataka, wuleechika nia. 14 Naapaajeetkalaka piamasü wawaachi jee shiale piamasü toomasüchein soʼu tü mekiisatkat kaʼi, niʼikajaajeetkalaka shia tamülatuʼu tayakai Jehová soʼuluʼu tü miichi aʼwaajüleekat, naapeetkalaka shia nümüin chi sacerdotekai. 15 Naapaajeechikalaka chi sacerdotekai wanee wüchii süpüla naapüin shia saaʼu tü kasa mojusü naaʼinrakat chi wayuukai sümaa nnojolin naaʼinjeein shia jee müsia tü wane wüchiikat, nuʼuteerü aaʼin süpüla naʼajüin shia tamüin tayakai Maleiwa. Naaʼinrajatü tia chi sacerdotekai tamülatuʼu tayakai Jehová süpüla sülatinnüin naainjala chi wayuu kajükai akorolo.

16 »›Yarütteechi wanee wayuu amülale nüwasain, acheküshi noʼoojüinjachin, waneʼereeya wulein nia motsopa kaʼikat. 17 Ashijaanajatü wanee kuluulu jee shiale wanee kasa aainjünaka süka süta mürüt yarüttüle shia sutuma nuwasain wanee wayuu, waneʼereeya wulein shia motsopa kaʼikat.

18 »›Nüinkaale wanee wayuu sümaa wanee jiet jee kawasainre nia, oʼoojüinjana naya piamaleʼeya, waneʼereeya wulein naya motsopa kaʼikat.

19 »›Kakashiale wanee wayuu, yarütteerü shia soʼu akaratshi kaʼi. Yarütteechi chi eekai epettüin shia, waneʼereeya wulein nia motsopa kaʼikat. 20 Yarütteerü wanee kasa sujuleraaka aaʼu wanee wayuu yarüttaka sutuma kakashiain shia jee yarütteeriaʼaya wanee kasa süikalaaka aaʼu. 21 Yarütteechi chi wayuu epettakai tü sücamainkat, acheküshi nüshijaain nüsheʼin jee oʼoojüinjachi nia, waneʼereeya wulein nia motsopa kaʼikat. 22 Yarütteechi chi eekai aikalaain eejatüle süikalaain paala tü wayuukot, acheküshi nüshijaain nüsheʼin jee noʼoojüinjachin, waneʼereeya wulein nia motsopa kaʼikat. 23 Yarütteechi chi wayuu epettakai tü sücamainkat jee shiale nipettüin wanee kasa süikalaaka aaʼu, waneʼereeya wulein nia motsopa kaʼikat. 24 Nüinkaale wanee wayuu sümaa tia wayuu kakashiakat, yarüttüle nia sümaa tü süshakat, yarütteechi nia soʼu akaratshi kaʼi jee yarütteeriaʼaya tü cama eekai nujuleraain aaʼu.

25 »›Kojuyale kaʼi amülain süsha wanee wayuu sümaa nnojoluin shiain sükalia tü sükashiakat jee sülanaʼaleerü sükalia tü sükashiakat, yarütteerü shia soʼu tü kaʼi amülakalü oʼu isha sümüin maʼaka yarüttüin shia soʼu tü kaʼi kakashiakalü oʼu shia. 26 Yarütteeriaʼaya tü cama sujuleraakalü aaʼu soʼu tü kaʼi amülakalü oʼu isha sümüin maʼaka yarüttüin tü cama sujuleraakalü aaʼu soʼu kakashiain shia. Yarütteeriaʼaya tü kasa süikalaakalü aaʼu maʼaka yarüttüin wanee kasa süikalaaka aaʼu soʼu kakashiain shia. 27 Yarütteechiaʼaya chi eekai epettüin süpüshuaʼa tia, acheküshi nüshijaainjachin nüsheʼin jee noʼoojüinjachin, waneʼereeya wulein nia motsopa kaʼikat.

28 »›Süshaʼwalaapa tü ishakat suulia tü wayuukot, ayaawajüinjatü shia akaratshi kaʼi jee wuleetkalaka shia süchikijee tia. 29 Saapaajeetka piamasü wawaachi jee shiale piamasü toomasüchein soʼu tü mekiisatkat kaʼi, shiʼikajaajeetka tia nümüin chi sacerdotekai soʼuluʼu tü miichi aʼwaajüleekat. 30 Naapaajeechikalaka chi sacerdotekai wanee wüchii süpüla naapüin shia saaʼu saainjala tü wayuukot sümaa nnojoluin saaʼinjeein shia jee müsia tü wane wüchiikat, nuʼuteerü aaʼin shia süpüla saʼajünüin tamüin tayakai Maleiwa. Naaʼinrajatü tia chi sacerdotekai tamülatuʼu tayakai Jehová süpüla sülatinnüin saainjala tü wayuu amülakalü amüin isha.

31 »›Jükaalinjainjana na israelitakana suulia yarüttüin naya, nnojoleenaka naya outuin saaʼujee yarüttüin natuma tü miichi eere taʼwaajünüin, tü yalakat pasanain nanain.

32 »›Shia aaʼinnajatka tia kajüle nükorolo wanee wayuu, yarüttüle wanee wayuu saaʼujee kawasain nia, 33 wanee wayuu yarüttaka sutuma kakashiain shia, niale wanee wayuu eekai ayuulin sutuma kajüin nüta jee shiale wanee wayuu amülaka amüin isha sutuma ayuulin shia jee müshia chi ainkaakai sümaa wayuu eekai yarüttüin›».