Chiiruaajatka karaloʼuta Samuel
17 Anuukalaka nünüiki Ahitofel nümüin Absalón: «Anashi puuʼulaale taneeküin 12.000 surulaat, toʼuneechika soʼu aikat tüü sünain oushikajawaa nüchiirua David. 2 Tanteechi aaʼu mapüsapa nia jee maʼlainpa naaʼin, tayoujeʼereerü naaʼin. Napantajaayaa nameenaka napüshuaʼa na wayuu nümaajanakana, nieechika neʼe toʼutuin aaʼin chi laülaashikai. 3 Tantireena pümüin nachikuaʼa na wayuu nümaakana, aleʼejeena na wayuukana kasale alatüin nümüin chi wayuu püchajaakai achiki. Jimateetkalaka naaʼin napüshuaʼa na israelitakana». 4 Anashiikalaka nümüin Absalón tü nümakat Ahitofel, anashiisiaʼaya shia namüin napüshuaʼa na laülaashiikana napüleerua na israelitakana.
5 Anuupejeʼe nünüiki Absalón: «Anashi jüsaajüle tamüin Husái, chi arkitakai, nnaweerüjaʼa nünüiki wamüin». 6 Nüntaka Husái nümaʼanamüin Absalón, anuukalaka nünüiki Absalón nümüin: «Anuu tü waaʼinrajatkat naashin Ahitofel, ¿anasüche saaʼin pümüin waaʼinrüle tü nümakat? Nnojorüle anain tia, püküja maa wamüin tü anakat süpüla waaʼinrüin», nümakalaka. 7 «Müsü nnojotkai anain saaʼin tü nümakat Ahitofel», nümakalaka Husái nümüin Absalón.
8 Anuu sooʼomüin nünüiki Husái: «Pütüjaa aaʼuchi yalayalain maʼin chi püshikai sünain atkawaa namaʼaleeya na wayuu nümaakana. Jashichishii maʼin naya maʼaka jashichin wanee oso eekai amüloulin süchonnii chaa wünaʼapü. Katchinshi maʼin chi püshikai jee nnojoleechi atunkuin nia naʼaka na wayuukana. 9 Eeshijaʼa jalale nuunjulaain maaʼulu yaa jee nuunjulaale suluʼu wanee koʼushii. Niale ashutuin palajana waaʼu, ‹akanajuushii na wayuu nümaajanakana Absalón›, meerü wayuu saapapa süchiki tia. 10 Eimmolojoojeechi wanee wayuu jaʼitasü yalayalain maʼin naaʼin maʼaka yalayalain naaʼin wanee león. Natüjaa aaʼu napüshuaʼa na israelitakana yalayalain chi püshikai sünain atkawaa otta yalayalain naaʼin na wayuu nümaakana. 11 Anuusa tanüiki pümüin: anashii puutkajeʼerüle napüshuaʼa na israelitakana, na chakana suluʼu tü mmakat Dan sünainmüinreʼeya tü mmakat Beer-Seba. Watteena maʼin jaalii maʼaka tü jasai eekat sotpünaa palaa, pieechikalaka nekiipüʼüin sünain atkawaa. 12 Watteena waalii sünain ashutaa naaʼu maʼaka wattain saalii suʼwüira joojotshi ojutuuka süpaʼapünaa tü mmakat. Nnojoleechi jaralin oʼttaain naʼakajee, woʼuteechi aaʼin nia namaʼaleeya na wayuu nümaajanakana. 13 Nuunjulaale suluʼu wanee pueulo, jiikomaajeena napüshuaʼa na israelitakana, wajaralajeetka tü pueulokot suluʼumüin tü luwopukat, wulereejeeria shia watuma, nnojoleerü apütaain waneesiaakaijeʼe ipachon süpaʼa».
14 Anuujeseʼe nünüiki Absalón namaa na wayuu eejanakana nümaa: «Anasü maʼin tü nümakat Husái suulialeʼeya tü nümakat Ahitofel», müsü nanüiki süka niain Jehová amalajeʼerüin tü nümakat Ahitofel mayaainjeʼe lotuin shia. Naaʼinrüin tia Jehová süpüla niʼrüinjachin kasa mojusü Absalón nutuma.
15 Anuukalaka nünüiki Husái nümüin Sadoc otta nümüin Abiatar, na sacerdotekana: «Anuu tü nüküjakat Ahitofel nümüin Absalón otta namüin na laülaashiikana napüleerua na israelitakana, anuupejeʼe tü taküjakat namüin. 16 Anashi jaapirüle David sünain maa: ‹Nnojo makatüin pia soʼu aikat tüü chaa isashiipaʼa. Anashi pülatüle tü süchikat, outeechisa pia namaa na wayuu pümaajanakana nnojorüle paaʼinrüin tia›».
17 Chajachi Jonatán otta Ahimáaz suluʼu tü mmakat En-Roguel. Nnojoishii ekerotuin naya suluʼumüin tü pueulokot suulia neʼnnüin, sujuʼitaka wanee achepchiee anooipaʼamüin jee süküjakalaka tia pütchikat nümüin Jonatán otta Ahimáaz. Oʼunushiijeseʼe naya sünain aapiraa David. 18 Eʼnnapejeʼe naya nutuma wanee jimaʼai, nüküjakalaka nachiki nümüin Absalón. Noʼunamaataka, antüshiijeseʼe naya suluʼumüin tü mmakat Bahurim. Noʼotoko nipialuʼumüin wanee wayuu, eejatü wanee ishi nüpaatiaseruʼu chia wayuukai, nounjulaakalaka suluʼu tü ishikat. 19 Shiasaʼa nuʼwayuuse chia wayuukai, suwayalaka wanee kuluulu sooʼopünaa soʼu tü ishikat, shijitaka trigo ayüüjaaushi saaʼu tia kuluutkat. Nnojotka jaralin atüjaain saaʼu tia. 20 Nantakalaka na nüchepchiakana Absalón shipialuʼumüin tia wayuukat jee namakalaka sümüin: «¿Jalashi piʼrüin Ahimáaz nümaa Jonatán?». «Chakualiishii naya eemüin tü süchikat», sümakalaka tü wayuukat namüin. Nachajaanaka achiki natuma naya wayuukana, nnojoliipejeʼe naya nantüin anain. Naleʼejaakalaka Jerusalénmüin.
21 Nujuʼitakalaka Ahimáaz nümaa Jonatán suluʼujee tü ishikat noʼunapa naya wayuukana. Nantaka eemüin David jee namakalaka nümüin: «Müsüsa maʼin nünüiki Ahitofel süchiki tü aainjünüinjatkat jümüin. Anashii jülatamaatüle tü süchikat». 22 Nülatamaatakalaka David tü süchikat Jordán namaa na wayuu nümaajanakana. Alatüshii napüshuaʼa süpülapünaa jaʼyuuin.
23 Nütüjaapa saaʼu Ahitofel nnojoluin saainjünüin tü nümakat, nütüriiyajaaka chi nüpüliiküsekai jee nüntaka nipialuʼumüin, chaa nuumainpaʼa. Nüküjapa süpüshuaʼa tü naaʼinrajatkat na wayuu nipialujunakana, nüülaakaʼa jee outaka nia. Eʼikünüshijeseʼe nia suluʼu naamaka na nutuushinuukana.
24 Nuʼunapa David suluʼumüin tü mmakat Mahanaim, nülatüin Absalón tü süchikat Jordán namaʼaleeya na wayuu nümaajanakana. 25 Aneekünüshi Amasá nutuma Absalón süpüla niainjachin nekiipüʼüin na nusurulaatsekana niiʼirakaluʼu Joab. Itrá chi israelitakai münüshi chi nüshikai Amasá otta Abigaíl sünülia tü niikat, nüchon Nahás, suwala shia Zeruyá, tü niikat Joab. 26 Noʼonookoloka Absalón suluʼumüin tü mmakat Galaad namaa na wayuu nümaajanakana.
27 Nüntaka David suluʼumüin tü mmakat Mahanaim, niasaʼa Sobí, chi nüchonkai Nahás, chi chejeʼewaikai suluʼujee tü mmakat Rabá tü noumainkat na ammonitakana otta Makir, chi nüchonkai Amiel, chi chejeʼewaikai suluʼujee tü mmakat Lo-Debar jee müshia Barzilái, chi chejeʼewaikai Galaad, suluʼujeejachi nia tü pueulokot Roguelim, 28 antitshii naya cama, iita, amüchi, trigo, cebada, ariina, haba, lenteja, waneirua eküülü, 29 antitshiʼiya naya mantequilla, mapa, anneerü otta keesü. Nantirüin tia niyaaluʼu David otta nayaaluʼu na wayuu nümaajanakana, süka namüin: «Outajüshii maʼin jamü na wayuu chakana isashiipaʼa, müñaasüshii naya otta mapüsajüshii naya».