Génesis
48 Anuukalaka wanee pütchi aküjünaka nümüin José süchikijee tia: «Mayeinshire maʼin chi püshikai». Oʼunushijeseʼe José sünain anaʼlawaa nümüin chi nüshikai nümaa Manasés jee müshia Efraín, na piamashiikana nüchonnii. 2 «Anii antüin José chi püchonkai sünain anaʼlawaa pümüin», nümünakalaka amüin Jacob. Nüikalaakalaka Israel saaʼu tü nücamainkat mayaainjeʼe kapüleein maʼin shia nümüin. 3 Anuukalaka nünüiki Jacob nümüin José:
«Eeʼiyataashinka tamüin chi Maleiwa Pülashikai maʼin suluʼu tü pueulokot Luz, chakat suluʼu tü mmakat Canaán, nüchekaka Maleiwa anaa tapüleerua. 4 Nüpansaajakalaka nünüiki tamüin sünain maa: ‹Süshinjachi pia tatuma watta saalii wayuu, sutuusheechi pia wainma wayuu, taapeerü mmakat tüü namüin na püikeyuukana, noumainjeerü shia tatuma süpüla kaʼikat süpüshuaʼa›. 5 Na piamashiikana püchonnii püchontüjüliikana süpülapünaa tantüin suluʼu tü mmakalü Egipto, tachonniinjana naya. Tachooinjachi Efraín nümaa Manasés maʼaka tachonniin Rubén jee müshia Simeón. 6 Nayeena püchonniika na püchonnii eejeenakana nüchikijee Efraín jee müshia Manasés. Aapüneerü namüin süpüshi tü mma aapünajatkat namüin na nawalayuukana. 7 Soʼu sejechin taya Padánjee, anaajaasü Raquel suluʼu tü mmakat Canaán, eejachi taya sümaa soʼu tia. Isayütka wapüleerua wantüinjanain Efrat, teʼikakalaka Raquel süpünaluʼu Efrat, tü Belén münakat».
8 Niʼrakalaka Israel na nüchonniikana José jee nüsakitkalaka: «¿Jaraliisaʼa joo naainnua?». 9 «Eekajasaʼa naainnua naya na tachonnii naapakana tamüin Maleiwa suluʼu mmakat tüü», nümakalaka José nümüin. Anuujeseʼe nünüiki chi nüshikai nümüin: «Pürütkeʼera maa naya tanainmüin süpüla tachuntuin anaa napüleerua». 10 Moʼupaʼaichi Israel süka matchin tü noʼukot sutuma laülaain nia, nürütkeʼerüinjeseʼe José na nüchonniikana nünainmüin, nutuʼlaka nawalapaʼa sümaa nujuupatüin naya. 11 Anuujeseʼe joo nünüiki Israel nümüin José: «Eetaayaai süntapünaain suluʼu tekii teʼrüinjachin pia püchikuaʼa, nükaalinjapejeʼe taya Maleiwa süpüla teʼrüinjanain na püchonniikana». 12 Nükatatkalaka José na nüchonniikana suulia nüsapain Israel, ejepülaa müshijaʼa nia nümülatuʼu.
13 Nürütkeʼera nümüshiʼiya José na piamashiikana nüchonnii nünainmüin Israel, naapaakalaka Efraín süka tü najapü nikiakat, niʼitaaka nia nipeʼeruʼujee Israel jee müshia Manasés naapaain nia süka tü nipeʼekat, niʼitaa nümüshia nia nikialuʼujee Israel. 14 Niʼitaakalaka Israel saaʼu nikii Efraín tü najapü nikiakat mayaainjeʼe niain emülieein jee tü nipeʼekat niʼitaain shia saaʼu nikii Manasés. Aleinjatia tia nutuma Israel mayaainjeʼe nütüjaain saaʼu niain eʼirumaain Manasés. 15 Achuntushijeseʼe nia anaa nüpüleerua José sümaa nümüin nümüin:
«Kasataalejeseʼe anain nakuwaʼipa na tepichikana nutuma chi shiimainshikai suluʼu Maleiwain, chi niʼyataapuʼukai amüin chi tatuushikai Abrahán jee müshia chi tashikai Isaac.
Chi shiimainshikai suluʼu Maleiwain müshijaʼaya nürüleejakai taaʼin jintüliiwaʼaya taya, aniiyüiya taya sünain müin takuwaʼipa nutuma.
16 Nüjütüinreʼe Maleiwa chi aapiee nümaʼanajeejachikai süpüla nükaalinjain taya suulia teʼrüin müliaa.
Anashijeʼe sotule taya saaʼin wayuu nakajee na tepichikana jee sotuin naaʼin Abrahán chi tatuushikai nümaʼaleeya Isaac chi tashikai.
Kasataalejeseʼe wainmain maʼin naya saaʼu tü mmakat».
17 Mojushiikalaka nümüin José ayatüinña niʼitaain chi nüshikai tü najapü nikiakat saaʼu nikii Efraín, naapaainjeseʼe najapü chi nüshikai shiiʼiree nüsünneʼerüin shia saaʼujee nikii Efraín süpüla niʼitaainjatüin shia saaʼu nikii Manasés. 18 Anuuka nünüiki José nümüin chi nüshikai: «Nnojotsü müinjatüin sukuwaʼipa tashikalee. Nia epayaaka chii, niainjachi piʼitaaka aaʼu ekii tü pajapü pikiakat». 19 Niyoutapejeʼe chi nüshikai naaʼinrüin tia jee nümakalaka nümüin José: «Tatüjaa aaʼu tia tachee, nnojotsü mochoojuin toʼu. Watteenaʼaya naalii nüikeyuu Manasés jee kojuteechiaʼaya nia, niapejeʼe kojuteechin maʼin chi emülieekai jee watteena naalii na nüikeyuukana, miyoʼujeerü tü mma piratakat natuma». 20 Ayatakalaka nuchuntuin anaa napüleerua soʼu kaʼikat tia sümaa müin nünüiki:
«Kasataalejeseʼe nachuntuin pünülia na nüchonniikana Israel soʼu nachuntuin anaa jee müin nanüiki:
‹Kasataalejeseʼe anain pukuwaʼipa nutuma Maleiwa maʼaka anain nukuwaʼipa Efraín jee Manasés›».
Ayatakalakaʼaya niain alanaʼaleein Efraín nutuma nuulialeʼeya Manasés.
21 Naashajaakalaka mapa Israel nümaa José sümaa müin nünüiki: «Alüʼütshisaʼa joo taya süpüla outaa, shiimainpejeʼe ayateechin chi Maleiwakai jümaa jee niiteʼereena jia noumainpaʼamüin na jutuushinuukana. 22 Taapüinjatü pümüin wanee shiʼipa mma piantuaka miyoʼuin suulia tü taapakat namüin na puwalayuukana, tasünala tia mmakat noulia na amorreokana süka chajaruutamaain taya nooʼomüin jee jatümaain taya».