Tü nüshajalakat Mateo
23 Naashajaakalaka Jesús namaa na wayuu wattakana naalii jee namaa na nikirajüinkana, nümaka namüin: 2 «Naaʼinruʼu na karaloʼutamaajanakana otta na fariseokana aapünüsü laülawaa namüin maʼaka saapünüin laülawaa nümüin Moisés. 3 Jaaʼinra tü naluwataakalü anain jia otta jikeraaja tü namakat jümüin, nnojoluinjatpejeʼe jaainjain tü naaʼinrakat, jama nnojoluin naaʼinrüin tü nekirajakalü anain. 4 Tü naluwataakalü anain müsü aka saaʼin chisooui jawataka maʼin noʼotoko saaʼu wayuu, nnojotpejeʼe müin nepetteekai saaʼin süka süchon najapü. 5 Süpüshuaʼa tü kasa naaʼinrakat naaʼinrayaain süpüla shiʼrüinjanain neʼe naya wayuu. Najaʼapülüin tü kaajachein* neʼitaakat neʼipoʼunain jee tü neʼitaakat sünain tü natüna nepeʼeruʼujeekat otta najaʼapülüin tü sotpünaajanakat nasheʼin. 6 Noʼunapa sünain wanee ekawaa aikalaashii naya eere naikalaain na wayuu kojutukana atumawaa otta aikalaashii naya palajana suluʼu tü miichi ekirajüleekat nüchiki Maleiwa. 7 Kamalainsü namüin nasakünüin metkaaraluʼu jee kamalainsü namüin ‹ekirajüikalee›* namünüinjanain sutuma wayuu. 8 Nnojotsü jücheküinjatüin achiki ‹ekirajüikalee› jümünüinjanain sutuma wayuu, waneeshiaʼala neʼe chi Ekirajakai jia, eekajaʼa jiakana pawalaawashii jia jüpüshuaʼa. 9 ‹Tashi› nnojoishii müinjanain jia sümüin wayuu yaa mmapaʼa. Waneeshiaʼala neʼe chi Jüshikai, nia chi chakai iipünaa. 10 Nnojotsü jücheküinjatüin achiki ‹ekiipüʼü› jümünüinjanain, waneeshiaʼala neʼe chi Jikiipüʼükai, nia Cristo. 11 Chi wayuu miyoʼuweekai jaʼakajee aʼyataainjachi nia napüleerua na waneinnua. 12 Chi wayuu yaletakai aaʼin nieechi eʼraka japülii, eekajasaʼa chi nnojoikai yaletüin aaʼin nieechi kojutuka atumawaa.
13 »Eʼreena jia müliaa jiakana karaloʼutamaajanakana otta fariseokana. Wayuu piama oʼupünaachii jia, müsü jüsürülakai saaʼin tü puettoʼu shikerotuinjatkalü aluʼupünaa wayuu chaa eere nuluwataain Maleiwa. Nnojoishii ekeroteein jia chamüin sümaa jütaʼülüin sukuwaʼipa wayuu eekai shikeroteein. 14 *
15 »Eʼreena jia müliaa jiakana karaloʼutamaajanakana otta fariseokana. Wayuu piama oʼupünaachii jia, wattakualiishii jia sünain achajawaa waneeshia neʼe wayuu süpüla müinjachin nia aka jukuwaʼipa sünain anoujaa. Nunoujapa chia wayuukai wanaa jümaa, alanaʼaleejeerü tü müliaa niʼreetkat juulia, jama müichimaʼaleeinjachin nia.*
16 »Eʼreena jia müliaa, oʼunitshii jia sukuwaʼipa wayuu jaajüin, mapajeʼe moʼupaʼakai neʼe jaaʼin, müsü jünüiki mayaa: ‹Chi wayuu aapakai nünüiki saaʼu tü aʼwaajüleekat Maleiwa nnojotsü kaawain nünüiki, eekajasaʼa chi wayuu aapakai nünüiki saaʼu tü ooro suluʼukat tü aʼwaajüleekat Maleiwa, nikeraajüinjatü nünüiki›. 17 Mayaawatüinsalii jia saaʼu jukuwaʼipa otta müshii jia maʼaka naaʼin chi wayuu eekai moʼupaʼain. ¿Jarat alanaʼaleeka ojutu saaʼin jümüin? ¿Tü oorokot shiataapa tü aʼwaajüleekat Maleiwa kojutuka atuma tü oorokot? 18 Anuutaala joo jünüikiya: ‹Chi aapakai nünüiki saaʼu tü aʼajüleekat kasa nümüin Maleiwa, nnojotsü kaawain nünüiki, eekajasaʼa chi aapakai nünüiki saaʼu tü kasa aʼajünakat saaʼu tü aʼajüleekat, nikeraajüinjatü tü nümakat›. 19 Müshii jia maʼaka naaʼin wanee wayuu eekai moʼupaʼain. ¿Jarat alanaʼaleeka ojutu saaʼin jümüin? ¿Tü aʼajünakat, shiataapa tü aʼajülee kojutukalü atuma tü aʼajünakat saaʼu? 20 Chi aapakai nünüiki saaʼu tü aʼajüleekat kasa nümüin Maleiwa, naapaleeinña nünüiki saaʼu tü aʼajünakat saaʼu. 21 Chi aapakai nünüiki saaʼu tü aʼwaajüleekat, naapaleeinña nünüiki naaʼu Maleiwa süka kepiain Maleiwa suluʼu. 22 Chi aapakai nünüiki saaʼu tü sirumatuʼukat, naapüin nünüiki saaʼu tü einasee eere nuluwataain Maleiwa jee naapaleeinña nünüiki naaʼu Maleiwa.
23 »Eʼreena jia müliaa jiakana karaloʼutamaajanakana otta müshiʼiya jiakana fariseokana. Wayuu piama oʼupünaachii jia, aapüshii jia* ‹menta›, ‹eneldo› otta müsia ‹comino›, motopejeʼe jaaʼin tü kasa kojutuleekat maʼin sünainjee tü Pütchi Aapünakat nümüin Moisés* maʼaka saaʼin lotuinjatüin jukuwaʼipa, jümülialaainjanain saalin wayuu otta kanoulainjanain jia. Jaapüinjatü tia tachuntakalü anülia jümüin, nnojotpejeʼe motuinjatüin jaaʼin aaʼinraa tü taküjakat jümüin chiiruaa. 24 Oʼunitshii jia sukuwaʼipa wayuu jaajüin, mapajeʼe moʼupaʼakai neʼe jaaʼin. Jüsatüin tü jüsüinkat süpüla jiyuʼluinjatüin tü meikat shirokujee, jimiralapejeʼe neʼe tü kameeyakat.
25 »Eʼreena jia müliaa jiakana karaloʼutamaajanakana otta müshiʼiya jiakana fariseokana. Wayuu piama oʼupünaachii jia, müshii jia maʼaka saaʼin wanee waasü jee wanee pülaata wuleka atouta, suchuntaapejeʼe jaaʼin wanee kasa naata kakorotshi otta matüjainsalii jia achecheraa jaaʼin. 26 Jia fariseokana, müshii moʼupaʼakai neʼe jaaʼin, wule jutuma palajana suluʼupünaa tü waasükat jee tü pülaatakat, wuleetkalaka shia sutoutajee.
27 »Eʼreena jia müliaa jiakana karaloʼutamaajanakana otta müshiʼiya jiakana fariseokana. Wayuu piama oʼupünaachii jia, müshii jia maʼaka saaʼin woowira kasuukat sutoutajee, anasü maʼin shiyolojo, wotopejeʼe shia shiipüse wayuu outusü otta kasa yarüttüsü. 28 Müsü jukuwaʼipa maʼaka saaʼin tia woowirakat, anayaasü jukuwaʼipa suʼupala wayuu, piamapejeʼe juʼupünaa otta mojulaashii jia.
29 »Eʼreena jia müliaa jiakana karaloʼutamaajanakana otta müshiʼiya jiakana fariseokana. Wayuu piama oʼupünaachii jia, jukumajüin woowira nata na nünüikimaajanakana Maleiwa jee junoutuin nata na wayuu loto akuwaʼipachiikana. 30 Müsü jünüiki mayaa: ‹Eejanalejeʼe waya namaa na watuushinuukana nnojotsüje wanaawain waaʼin shikiira noʼutunuin aaʼin na nünüikimaajanakana Maleiwa›. 31 Sükajee tü jümüitpakat atüjaana aaʼu nachooin jia na wayuu oʼutakana naaʼin na nünüikimaajanakana Maleiwa. 32 Keraa jutuma tü eʼitaanakalü ekii jüpüleerua natuma na jutuushinuukana.
33 »Süchon wüi outasiroʼu jia, müinnamaʼaleeya jia, ¿jalapünaainjana jia isajüin suulia ajaʼttinnaa?* 34 Taluwataajeena jünainmüin na nünüikimaajanakana Maleiwa namaʼaleeya na wayuu eekai kekiin otta na eekai ekirajüliin. Eejeena na juʼutakana aaʼin otta na jükachetkana süpüla juʼutuin naaʼin. Eejeena na jiʼyaajakana suluʼu tü miichi ekirajüleekat nüchiki Maleiwa jee eejeena na jüchajaakana achiki sainküinpünaa pueulo. 35 Suluʼujee tia, süsaleena jia jaainjala süka juʼutuin saaʼin wayuu loto akuwaʼipat, nünainjeʼereʼeya Abel nünainmüinreʼeya Zacarías chi nüchonkai Baraquías, chi juʼutakai aaʼin suluʼu süpaatiase tü aʼwaajüleekat, süʼütpaʼa tü aʼajüleekat kasa nümüin Maleiwa. 36 Shiimain juwalaajeerüin süpüshuaʼa tü jiʼralakat wayumüin.
37 »Aituashiʼiya maʼin jia wayuu yaakana Jerusalén, oʼunulii jia naaʼin na nünüikimaajanakana Maleiwa otta jüʼinaʼalüin süka ipa na wayuu aluwataanakana jünainmüin. Kotteeyaashiijeʼe jia paala tatuma maʼaka kottuin na kaliinacheinkana suupünaa tü neikat, nnojotpejeʼe jücheküin süchiki tia. 38 Suluʼujee tia, niyüülajüin Maleiwa jüpüla tü aʼwaajüleekat.* 39 Müichimaʼaleeya nnojolin jiʼrüin taya, waneʼereeya jümapa: ‹¡Anataʼaleeshijaʼa maʼin chi nüjünalakai Jehová!›».*