Tü nüshajalakat Lucas
2 Shiasaʼa soʼu tia, Augusto chi «César»* münakai, nüjütirüin wanee pütchi eere nuluwataain wayuu maʼleekalia sünain ashajiraa sünülia. 2 (Aainjünüsü tia palajatkat censo wanaa sümaa niain aluwataain Quirinio saaʼu tü mmakat Siria). 3 Noʼunayaa namaka napüshuaʼa na wayuukana sünain ashajiraa nanülia noumainpaʼamüin. 4 Oʼunushijaʼaya José, jama nüpüshitchin nia David. Oʼunushi nia Galileajee chaa Judeamüin, suluʼujee tü pueulokot Nazaret suluʼumüin tü pueulo eejeʼewaire David, tü kanüliakat Belén. 5 Nuʼunakalaka sünain ashajiraa nünülia sümaa María, tü nuʼwayuusekat, nuchuntala paala shia. Jakütüsü maʼin María wanaa sümaa noʼunuin sünain ashajiraa nanülia. 6 Saʼalijaakalaka María nantapa chamüin. 7 Jemeyutkalaka shia nümaa chi shiʼirumakai, sukoʼoyoloko nia süka kuluulu, sujulereʼeraka nia suluʼu shiitain mürüt süka wotuin napüla tü atunkuleekat.
8 Suluʼu tia mmakat eejana wanee arüleejülii aaʼinmajakana narüleejüin saʼwai süpaʼa anoui. 9 Niiʼiyataaka namüin wanee aapiee nümaʼanajeejachi Jehová. Jorottoko neʼe naʼütpünaa tü nüpülainkat Jehová,* mmotkalaka maʼin naya. 10 Nümakalaka chi aapieekai namüin: «Nnojo mmoluin jia süka tantüshin süpüla aküjaa jümüin pütchi anasü talateetkalü atuma saaʼin wayuu süpüshuaʼa. 11 Joʼuushi soʼukai suluʼu tü pueulo eejeʼewaire David, wanee oʼtteʼerüinjachikai wayuu, nia Cristo, chi Señotkai. 12 Anuu tü jiyaawateechika akajee nia: koʼoyoojeechi nia jüpüla süka kuluulu otta juʼleteechi nia suluʼu shiitain mürüt». 13 Nantapaayaa namaka waneinnua aapiee nünainmüin chi aapiee yalajachikai aashajaain namaa, naʼwaajakalaka Maleiwa sünain maa: 14 «Kasataalejeseʼe nuʼwaajünüin Maleiwa chaa iipünaa otta müsia saaʼu tü mmakat. Kasataalejeseʼe talatüin naaʼin na wayuu anakana akuwaʼipa noʼuluʼu Maleiwa».
15 Shiasaʼa naleʼejapa na aapieekana nachikuaʼa chaa iipünaamüin, namajiraaka na arüleejüliikana: «Oʼunajanaʼaya neʼe waya Belénmüin weʼraiwa tü kasa alatakat, tü nüküjirakalü achiki Jehová* wamüin». 16 Noʼunamaatakalaka, eejatka María napüla nümaa José otta müshia chi joʼuukai, yalajachi juʼletachoin suluʼu shiitain mürüt. 17 Neʼraiwaʼaya tia, naküjakalaka süchiki tü aküjünakat namüin paala nüchiki chi joʼuukai. 18 Nayasaʼa na wayuu aapajakana nanüiki na arüleejüliikana ponusü maʼin naaʼin tü namakat. 19 Jülüjaa müsü saaʼin María tia pütchikat otta süsakireʼerüin saaʼin jamaluʼuluin shia. 20 Noʼunakalaka na arüleejüliikana. Naapüin analuʼut nümüin Maleiwa otta naʼwaajüin nia saaʼu tü kasa naapakat jee tü neʼrakat, jama shiainña tü aküjünakalü achiki paala namüin.
21 Mekiisat kaʼi süchikijee tia, shiʼyotoonoko süta nükorolo* chi joʼuukai. Shiʼitaanakalaka Jesúin nünülia, maʼaka nüküjain shia paala chi aapieekai süpülapünaa nukumajaain chi joʼuukai.
22 Süntapa tü kaʼi wuleinjanakalü oʼu naya maʼaka süküjünüin suluʼu tü Pütchi Aapünakat nümüin Moisés,* noʼunakalaka Jerusalénmüin süpüla neeʼiyatajachin chi joʼuukai nümüin Jehová* 23 maʼaka sümüin suluʼu tü Pütchi Nuluwataakalü anain Jehová,* tü makat mayaa: «Akatannajachi nümüin Jehová* wanee joʼuu eekai eʼirumaain». 24 Eekalaka tü nasülajakat nümüin Jehová* maʼaka süküjünüin suluʼu tü Pütchi Nuluwataakalü anain, tü makat mayaa: «Piamasü wawaachi jee shiale piamasü toomasüchein».
25 Eejachikalaka wanee wayuu chaa Jerusalén, loto akuwaʼipachi otta kanoulashi maʼin nia, Simeón nünülia, naʼatapajüin nükaalinjain Maleiwa na wayuu kepiakana Israel otta eejatü tü nüpülainkat Maleiwa naaʼu chia wayuukai. 26 Süküjünakalaka nümüin sükajee tü nüpülainkat Maleiwa nnojolinjachin nia outuin waneʼereeya niʼrapa chi Cristo nüjünalakai Jehová.* 27 Nuʼuninnakalaka Simeón sutuma tü nüpülainkat Maleiwa, nikeroloko suluʼumüin tü aʼwaajüleekat. Nikerolokojoʼoya José sümaa María süpüla naaʼinrajatüin nüpüleerua Jesús tü aaʼinnapuʼukat nüpüleerua wanee jintüi maʼaka süküjünüin suluʼu tü Pütchi Aapünakat nümüin Moisés. 28 Nüpataaka Simeón chi joʼuukai sümaa nuʼwaajüin Maleiwa sünain maa: 29 «Señotkalee, pia Laülaashikai saaʼu kasa süpüshuaʼa, eeichipajaʼa süpüla nünaajaain sümaa anakalü akuwaʼipa chi püchepchiakai maʼaka püküjain shia paala. 30 Teʼrüichipa chi puʼtteʼerajachikai akajee wayuu, 31 chi puluwataakai süpüla shiʼrüinjachin nia wayuu maʼleekalia. 32 Müshi nia maʼaka saaʼin wanee luusa nnojotka atuma tü piʼyuushi kojokot saaʼu wayuu, müsü naakatakai saaʼin tü kuluulu koʼoyookalü aka wayuu otta kojuteena na püpüshikana nünainjee, na israelitakana». 33 Niasaʼa José sümaa María ponusü maʼin naaʼin tü kasa aküjünakat nüchiki chi joʼuukai. 34 Nuchuntakalaka Simeón nümüin Maleiwa napüleerua süpüla anakuwaʼipaliinjanain naya nutuma. Nümakalaka sümüin María, tü niikat chi joʼuukai: «Anuu tanüiki pümüin, wainmeena na wayuu yaakana Israel ashanaajeenakana naaʼujee jintüikai chii. Wainmeena na atamaakana nünainjee otta mojuteechi nia atumawaa 35 süpüla sütüjaanajatüin aaʼu tü kasa suluʼukat saaʼin wayuu, (eekajasaʼa piakat, meerü susotunakai paaʼin süka wanee chajaruuta)».
36 Eejatkalaka yalaʼaya suluʼu tü aʼwaajüleekat wanee wayuu nünüikimaajatü Maleiwa kanüliasü Ana, nüchon Fanuel, nülüin Aser. Wayuu laülaa tia makat otta akaratshi neʼe juya eejatüin shia nümaa chi suʼwayuusekai. 37 Wayuu outa aʼwayuuset shia jee mekiisat shikii pienchimüin suuyase. Waneepiasü shia suluʼu tü aʼwaajüleekat, aʼyataasü shia saʼwai jee soʼukai nümüin Maleiwa, aamajüsü otta achuntusü maʼin shia nümüin. 38 Shiasaʼa wanaa maʼin sümaa tia, sürütkaakalaka nünainmüin José sümaa María, saapakalaka analuʼutkat nümüin Maleiwa otta süküjain nüchiki chi joʼuukai namüin na wayuu yalajanakana Jerusalén, na aʼatapajakana taashinjanain naya nutuma Maleiwa.
39 Süchikijee naaʼinrüin süpüshuaʼaleʼeya tü Pütchi Nuluwataakalü anain Jehová,* nüleʼejaakalaka José sümaa María Galileamüin suluʼumüin tü pueulo eejanale naya kepiain, tü kanüliakat Nazaret. 40 Najaʼapülaaka chi jintüikai, kekiishi maʼin nia otta talatüsü naaʼin Maleiwa nümaa.
41 Oʼunawaishi juyawai chi nüshikai sümaa tü niikat chaa Jerusalénmüin sünain tü miʼiraa kanüliakat Pascua.* 42 Poloopa piamamüin nuuyase Jesús, noʼunakalaka Jerusalénmüin maʼakaapuʼu noʼunuin sünain tia miʼiraakat. 43 Sajaʼttapa tü miʼiraakat, naleʼejaakalaka nachikuaʼa. Chakaijasaʼa Jesús apütüüin Jerusalén sümaa nnojolin natüjaain naaʼu. 44 Yalayaashi Jesús naaʼinruʼu naʼaka na wayuu oʼunakana namaa. Waneeka kaʼi naya sünain oʼunaa, nachajaakalaka nüchiki naʼaka na kasayuukana nanain jee naʼaka na wayuu neʼraajüinkana. 45 Süka nnojolin nantüin nünain, naleʼejaaka nachikuaʼa Jerusalénmüin otta nachajaaka nüchiki sainküinpünaa tia. 46 Apünüin kaʼi süchikijee tia, chajachikalaka nia napüla suluʼu tü aʼwaajüleekat. Joyotushi nia pasanain nanain na ekirajüliikana, naapajüin nanüiki otta nüsakirüin naya sünain wainma kasa. 47 Nayasaʼa na wayuu aapajakana nünüiki ponusü maʼin naaʼin niyaawatüin saaʼu wanee kasa otta nütüjain asoutaa shiʼipajee tü asakinnakalü anain nia. 48 Ponusia naaʼin chi nüshikai sümaa tü niikat tü kasa naaʼinrakat. Sümakalaka tü niikat nümüin: «Tachonchee, ¿jamüsü shapaaka maʼin waaʼin putuma? Müliasü maʼin taaʼin nümaa chi püshikai sünain achajawaa püchiki». 49 Nusoutakalaka namüin: «¿Jamüshii jüchajaaka tachiki? ¿Aashin jütüjaain saaʼu yaainjachin taya yaa nipialuʼu chi Tashikai?». 50 Nnojotpejeʼe nayaawatüin saaʼu tü nüküjakat namüin.
51 Nuʼunakalaka namaa Nazaretmüin otta ayatüshia nia jüüjüüin namüin. Jülüjakalaka saaʼin tü niikat süpüshuaʼa tü nümakat chi süchonkai. 52 Najaʼapülaaka Jesús, kekiishi maʼin nia, talatüsü naaʼin Maleiwa nümaa otta müshiʼiya na wayuukana.