Karaloʼuta namüinjatka na Hebreokana

9 Eesü tü aluwataanakalü anain sünain tü pütchi apansaajünakat paala. Tia süpülajatü niʼyataanüin amüin Maleiwa otta eejatü wanee miichi aʼwaajülee yaa mmapaʼa. 2 Yapakalaka atumawaa tü palajatkat kuatta sulujutka tü miichikat eejatüle shiʼitaanüin süpülajana tü ranparakat, eejatü meesa otta eejatü tü pan aapünajatkat nümüin Maleiwa, Kuatta Wulesü münüsü tia kuattakat. 3 Eejatka wanee kuluulu pasanain sünain tü miichikat otta eejatü wanee kuatta süchiiruajee tia kuluutkat, tü Kuatta Wulekat maʼin münüsü shia. 4 Suluʼu tia kuattakat eejatü wanee aʼajülee wunuʼu jemeta eejuut aainjuushi süka ooro otta eejatü tü kojon shiyaawasekat süpansaajünüin pütchi, eʼitaanüsü ooro sutoutajee tia. Suluʼu tia kojonkot eejatü tü jaara aainjuushikat süka ooro, kalujut maná tia makat, eejatü tü waraarat kasiisü nümaʼanajatkalü Aarón otta eejatü tü ipa* ashajünakalü anain tü pütchi nuluwataakalü anain Maleiwa. 5 Saaʼu tü kojonkolü eejatü nayaakua piamashii querubín, müsü nakoʼolokoi saaʼin shiʼrouse tü kojonkot* süka natüna. Nnojotpejeʼe choʼujaain waashajaainjanain maʼin jooluʼu süchiki tia.

6 Keraapa tia miichikat ekerotowaishii na sacerdotekana suluʼu tü palajatkat kuatta süpüla naʼyataainjanain nümüin Maleiwa. 7 Suluʼu tü kuatta chiiruaajatkat nia neʼe ekerotowaika nümüiwaʼa chi laülaashikai napüleerua na sacerdotekana, naaʼinrawalin tia juyawai sümaa nülüʼüjawalin tü isha naapüinjatkat nümüin Maleiwa saaʼu naainjala jee saaʼu naainjala na wayuukana, jama kaainjalawalin naya sümaa nnojoluin natüjaain saaʼu mojuin tü naainjakat. 8 Nüpansaajüin Maleiwa sükajee tü nüpülainkat nnojoluin süpüla shikerolüin wayuu suluʼumüin tü kuatta wulekat maʼin, eeiwaʼaya tü palajatkat miichi aʼwaajülee. 9 Tia miichikat shiyaawase tü kasa eekat maaʼulu jee saaʼujee süshatünüin akuwaʼipa tia, asülajünüsü wanee kasa nümüin Maleiwa jee oʼutuna aaʼinrü mürüt nümüin. Nnojotpejeʼe wulein naaʼin chi wayuu aaʼinrakai tia sünain aʼyatawaa nümüin Maleiwa. 10 Tü kasa asülajünakat shia tü eküütkat jee waneirua kasa asünajatka jee tü naaʼinrajatkat wanee wayuu süpüla wuleinjachin nia. Achuntunawaisü tia süpüla wulein nukuwaʼipa wanee wayuu jee naaʼinrajatü shia waneʼereeya sunoutunapa wanee kasa nutuma Maleiwa.

11 Antüshi Cristo suluʼu laülaashin nia napüleerua na sacerdotekana. Naainjakalaka tü kasa anasü eeitpakat, ekerotushi nia suluʼumüin tü miichi aʼwaajüleekat, tü kojutukat maʼin jee tü anakat maʼin, tü nnojotkat sukumalain wayuu, nnojotsü yaajeʼewalüin shia mmapaʼa. 12 Uwatua neʼe nikerotüin Cristo suluʼu tü kuatta wulekat maʼin, süpülajatü kaʼi süpüshuaʼa tia naaʼinrakat. Nnojoipejeʼe nia ekerotuin sümaa süsha kaaʼula jee sümaa süsha paaʼachein. Ekerotushi nia sümaa nüsha, nuuntakalaka taashin waya nutuma süpüla kaʼikat süpüshuaʼa. 13 Naapaain na sacerdotekana süsha kaaʼula toolo jee süsha paaʼa toolo sümaʼaleeya süpaliʼise paaʼa jee atülittinnüsü shia saaʼu wayuu eekai yarüttüin akuwaʼipa. Wulekalaka sukuwaʼipa wayuu sutuma tia noʼuluʼu Maleiwa. 14 Alanaʼaleepejeʼe maʼin tü nüshakat Cristo. Saaʼujee eein waneepia tü nüpülainkat Maleiwa aapajiraashi nikii Cristo nümüin Maleiwa sümaa maainjalain nia, wulekalaka waaʼin nutuma suulia tü kasa nnojotkat kasain anain apüla. Wountakalaka waʼyataain nümüin chi Maleiwa matüjainkai outaa.

15 Akaalinjashi Cristo sünain apansaajaa wanee pütchi jeketü, saapünakalaka namüin na aneekuushikana tü namüinjatkat süpüla kaʼikat süpüshuaʼa, jama naapajiraain nikii Cristo shiiʼiree taashinjanain suulia naainjala na wayuu eejanakana soʼu tü pütchi apansaajünakat paala. 16 Süpansaajünüle wanee pütchi choʼujaashi outajachin chi wayuu apansaajakai tia pütchikat. 17 Kaawainsü tü pütchikat eere wanee eekai outuin* sünainjee, maawainpejeʼe tü pütchikat katüle noʼu chi wayuu apansaajakai shia. 18 Tü pütchi apansaajünakat paala kaawainreesia shia amülapa isha. 19 Süchikijee nüküjain Moisés namüin napüshuaʼa na wayuukana tü pütchi aluwataanakalü anain nutuma Maleiwa, naapaakalaka nasha paaʼachein tooloyuu sümaʼaleeya süsha kaaʼula jee müsia wüin otta müsia laana ishosü maʼin sümaa wunuʼu* jee nütülittiraka isha saaʼu tü karaloʼutakat jee naaʼu napüshuaʼa na wayuukana. 20 Anuukalaka nünüiki Moisés: «Ishakat tüü shiyaawase tü pütchi nüpansaajakat Maleiwa, tü nuluwataakalü anain süpüla joonooinjanain sümaa». 21 Nütülittirüinña Moisés isha saaʼu tü miichi aʼwaajüleekat jee saaʼu süpüshuaʼa tü kasa aʼwaajünakalü aka Maleiwa. 22 Saashin tü Pütchi Aapünakat nümüin Moisés atülittinnüinjatü isha saaʼu kasa süpüshuaʼa süpüla wuleinjatüin shia. Nnojorüle amülain isha saaʼu wanee kasa, nnojoleerü motuin naaʼin Maleiwa saainjala wayuu.

23 Wuleinjatü tü makalü aka saaʼin shiyaawase tü kasa chakalü iipünaa. Anaʼleeinjatpejeʼe maʼin tü aapünakat saaʼu tü kasa chakalü iipünaa. 24 Nnojoishi ekerotuin Cristo suluʼu wanee kuatta wulekat maʼin eekai sukumalain wayuu. Tia makat shiyaakua neʼe tü kuatta shiimainkat maʼin. Ekerotushi nia chaa sirumatuʼumüin, ichaakalaka nia maaʼulu nümülatuʼu chi Maleiwakai süpüla nusoutajachin waaʼu. 25 Nnojotsü aainjünüin tia süpüla wainmatuainjachin naapajiraain nikii maʼaka nikerotopuʼuin juyawai suluʼu tü kuatta wulekat maʼin chi laülaashikai napüleerua na sacerdotekana, ekerotopuʼushi nia sümaa süsha mürüt, nnojotsü nüshain tia makat. 26 Naaʼinrülejeʼeya tia Cristo wainmatuaje müliain maʼin nia soʼujeʼereeya shiʼitaanüin shikii wayuu.* Uwatuapejeʼe neʼe antüin nia, süpülajatü kaʼikat süpüshuaʼa tia waneʼereeya sajaʼttapa tü kasa alatakat sainküin mma.* Najaʼttireetkalaka tü saainjalakat wayuu sükajee naapajiraain nikii. 27 Maʼaka nnojoleenain isajüin na wayuukana suulia outuin naya uwatua neʼe sümaa süsaleenain naya naainjala nutuma Maleiwa, 28 müsia neʼe nukuwaʼipa Cristo, uwatua neʼe naapajiraain nikii süpüla müinjatüin nülüʼüjakai saaʼin saainjala watta saalii wayuu. Nüntapeena nüchikuaʼa nnojoleerü müin nülüʼüjakai saaʼin saainjala wayuu jee neʼreechi nia na wayuu aʼatapajakana maʼin noʼtteʼennajanain.