Tü nüshajalakat Juan

4 Naapapa chi Señotkai süchiki natüjaaitpain saaʼu na fariseokana wainmaleʼeinña na wayuu nikirajakana Jesús noulialeʼeya na nikirajakana Juan otta wainmaleʼeinña na woutiisakana nutuma, 2 (nnojoipejeʼe niain Jesús woutiisain atuma wayuu, naya woutiisaka atuma na nikirajüinkana), 3 nuʼunakalaka Judeajee chamüin nüchikuaʼa Galileamüin. 4 Alatüinjachipejeʼe nia Samariapünaa. 5 Nüntakalaka suluʼumüin wanee mma chaa Samaria kanüliasü Sicar. Süʼütpaʼa tü mma niʼipünaalakat Jacob nüpüla José, chi nüchonkai. 6 Chajatü tü ishi nüsülekat Jacob suluʼu tia mmakat. Mapüsashi Jesús sükajee waraittüin nia. Nüikalaaka süʼütpaʼa tü ishikat, kaleʼujatü tia, maʼaka saaʼin las doce.*

7 Süntakalaka wanee wayuu sünain ajaʼitaa, chejeʼewat shia Samaria. Anuukalaka nünüiki Jesús sümüin: «Püsiʼra maa taya wüin». 8 (Oʼunushii na nikirajüinkana Jesús sünain ayaʼlajaa eküülü chaa pueulopaʼamüin). 9 Anuujeseʼe sünüiki nümüin Jesús tü wayuu Samariajeʼewatkat: «¿Jamüshi pujulijaka wüin taaʼu sümaa wayuuin judío pia?». (Manüijiraasalii na judíokana namaa na wayuu Samariajeʼewaliikana). 10 Nusoutakalaka Jesús sümüin: «Piyaawatüle saaʼu tü kasa nüsülajakat Maleiwa jee piʼraajülejeʼe chi makai pümüin ‹Püsiʼra maa taya wüin›, ojulijasüje pia wüin naaʼu, naapüinjeʼe pümüin tü wüin katakalü atuma soʼu wayuu». 11 Anuujeseʼe sünüiki tü wayuukot nümüin: «¿Jalakaʼa joo wanee kasa pajaʼitüinjatka aka tü wüinkat?, oʼutusüsaʼa maʼin türa ishikat. ¿Jalejeekualeetka püpüla tü wüin kateetkalü atuma soʼu wayuu? 12 ¿Piataale miyoʼuin nuulia chi watuushikai Jacob? Nia keʼipünaalaka wapüla ishikat tüü, shia nüsapuʼuka aʼwüira tia chi watuushikai namaʼaleeya nüchonnii jee müsia nüsachirat». 13 Nusoutakalaka Jesús sümüin: «Wüinñaaseechi nüchikuaʼa chi wayuu asakai suʼwüira türa ishikat. 14 Chi wayuu asakai tü wüin taapakat nümüin, müichia nnojolin wüinñaasüin nüchikuaʼa. Meerü shia nümüin maʼaka saaʼin wanee wüin aparatka mmapüjee, kateetka atuma soʼu wayuu waneepia». 15 Anuujeseʼe sünüiki tü wayuukot nümüin Jesús: «Püsiʼra maa taya tia wüinkat, nnojoleetka wüinñaasüin taya tachikuaʼa jee nnojoleetka tantakuʼu tamüin sünain ajaʼitaa».

16 «Püsaaja chi puʼwayuusekai, püleʼejeetkalaka püchikuaʼa yaamüin», nümakalaka Jesús sümüin. 17 «Maʼwayuusesatsa taya», sümakalaka tü wayuukot nümüin Jesús. Anuujeseʼe nünüiki sümüin: «Shiimainña maʼwayuusein pia. 18 Jaʼraituaitpejeʼe kaʼwayuusein pia jee müshia chi wayuu kamaakai pia jooluʼu, nnojoishi puʼwayuusein, shiimainkalaka tü pümakat». 19 Anuujeseʼe sünüiki tü wayuukot nümüin Jesús: «Señotkalee, nünüikimaajachinjaʼa eera pia Maleiwa. 20 Aʼwaajünapuʼushi Maleiwa natuma na watuushinuukana saaʼu uuchikat tüü, aʼwaajünüinjachipejeʼe nia jaashin chaa Jerusalén». 21 Nusoutakalaka Jesús sümüin: «Shiimain tanüiki pümüin nii waaʼiraa, soʼuweena wanee kaʼi nnojoleechi juʼwaajüin Maleiwa saaʼu uuchikat tüü otta chaa Jerusalén. 22 Shia juʼwaajaka wanee kasa eekai nnojoluin jiʼraajüin, eekajasaʼa wayakana waʼwaajüin tü kasa eekai weʼraajüin, jama nayain oʼttaain palajana na judíokana. 23 Soʼuweena wanee kaʼi, na wayuu aʼwaajakana Maleiwa süka anaka akuwaʼipa, naʼwaajeechi nia sükajee tü nüpülainkat Maleiwa otta sükajee tü shiimainkat. Naya nüchajaakana achiki Maleiwa na wayuu makana akuwaʼipa süpüla naʼwaajüin nia, antüitpa tia kaʼikat maaʼulu. 24 Meʼrujusai chi Maleiwakai, na wayuu aʼwaajakana nia, naʼwaajüinjachi sükajee tü nüpülainkat otta sükajee tü shiimainkat». 25 Susoutakalaka tü wayuukot nümüin Jesús: «Tatüjaa aaʼulu nüntajachin chi Mesíaskai, chi Cristo münakai sutuma wayuu. Nüntapeena nüküjeerü wamüin jamaluʼuluin süpüshuaʼa tia». 26 Nusoutakalaka Jesús sümüin: «Taya chia makai, chi anii joo aashajaain pümaa».

27 Wanaa maʼin sümaa tia, nantakalaka na nikirajüinkana Jesús jee ponokoloko naaʼin neʼrüin nia sünain aashajawaa sümaa tü wayuukot, nnojoipejeʼe jaralin müin nümüin «¿jamüshi makaʼa pia? ¿Jamüshi paashajaaka sümaa tü wayuukot?». 28 Süpütapünaaka sümüchi tü wayuukot jee suʼunakalaka pueulopaʼamüin sünain maa namüin na wayuukana: 29 «Jooʼuya tamaaiwa jia, jiʼraajaiwa wanee wayuu aküjakai tamüin süpüshuaʼa tü kasa taaʼinrüitkat. Niainjaʼa eera nia Cristo». 30 Nakoʼulayaa namaka na wayuukana chaa eejachire Jesús.

31 Süchikiruʼu chain suʼunuin wayuukot, namakalaka na nikirajüinkana Jesús nümüin: «Ekirajüikalee, pika pümaala». 32 Nusoutakalaka Jesús namüin: «Eesü tamaʼana wanee eküülü nnojotka jiʼraajüin». 33 «Nnojoipejeʼe jaralin antirüin niküin, ¿aashi müin?», namajiraaka na nikirajüinkana. 34 Anuujeseʼe nünüiki Jesús namüin: «Müshijaʼaya tekakai aaʼin shiale taaʼinrüin tü nuluwataakalü anain chi Kajünalakai taya otta shiale tekeraajüin tü aʼyatawaa niʼitaakat tajapuluʼu. 35 Choʼujaayülia jaashin pienchi kashi süpüla sütpajünüin tü aʼttieekat. Jülüjataa jaaʼin tanüiki jümüin, jiirakaa sümüin tü aʼttieekat, keraaitpa süpüla atpajünaa. Aapünüitpa 36 nümüin chi atpajüshikai tü nneerü süliakat niʼyataain otta nütpajüin tü süchonkalü aʼttiee. Na makana aka saaʼin süchon aʼttiee, naya na wayuu katüinjanakana oʼu waneepia. Suluʼujee tia, talateechi chi apünajüshikai nümaʼaleʼeya chi atpajüshikai. 37 Sükajee tia, ekeraajüsü tü sünüikipalakat wayuu tü makat mayaa ‹Eeshi chi apünajakai otta eeshi chi atpajakai›. 38 Taluwataain jia sünain atpajaa tü kasa nnojotkat jiʼyataain anain. Naata na aʼyataakana maʼin sünain, eʼrapajaʼa jia anaa sünainjee naʼyataain».

39 Watta naalii wayuu samariajeʼewalii anoujakana nünain Jesús sünainjee tü sümakat tü wayuu naashajaakalü amaa paala, müsü shia namüin: «Nüküjain tamüin süpüshuaʼa tü kasa taaʼinrüitkat». 40 Nantapa na samariajeʼewaliikana eemüin Jesús, nachuntaka nümüin makatajachin nia namaa. Makatshijeseʼe nia namaa soʼu piama kaʼi. 41 Nawainmalaaka na wayuu anoujakana nünain, naapapa tü pütchi nikirajakalü anain. 42 Anuujeseʼe nanüiki na wayuukana sümüin tü wayuukot: «Nnojoliinnapa anoujain neʼe waya sünainjee tü püküjakat wamüin, waapajüitpa tü nümakat jee watüjaa aaʼu niainña maʼin chi oʼtteʼerajachikai wayuu».

43 Sülatapa tia piamakat kaʼi, nuʼunakalaka Galileamüin. 44 (Nüküjainña Jesús mojutuin atumawaa nuumainpaʼa chi nünüikimaajachikai Maleiwa). 45 Nüntapa Galileamüin, kamaneeshii na wayuu chajanakana nümüin, süka neʼrüin süpüshuaʼa tü kasa naaʼinrakat Jesús chaa Jerusalén soʼu chajachin nia sünain tü miʼiraakat, chajana naya nümaa soʼu tia.

46 Nuʼunakalaka Jesús nüchikuaʼa suluʼumüin tü mma kanüliakat Caná, tü chakat Galilea, eejatüle wiinojaain nutuma tü wüinkat. Chajachi chayaa wanee wayuu aʼyataashi nümüin chi aluwataashikai, ayuuishi nüchon chia wayuukai chaa Capernaúm. 47 Naapapa chia wayuukai nüleʼejüin Jesús Judeamüin chejee Galileajee, nuʼunakalaka nümaʼanamüin jee nuchuntaka nümüin nuʼunajachin sünain aawaleʼeraa chi nüchonkai süka mayein maʼin nia. 48 Nümakalaka Jesús nümüin: «Nnojoleena jia anoujain tanain, aluʼusaʼa shiale jiʼrüin taaʼinrüin kasa pülasü otta kasa eekai anain maʼin». 49 Anuujeseʼe nünüiki nümüin Jesús chi wayuu aʼyataaikai nümüin chi aluwataashikai: «Señotkalee, anashi puʼunule tamaa, outushitaa chi tachonkai». 50 Nusoutakalaka Jesús nümüin chi wayuukai: «Puʼuna pümaala pipialuʼumüin, katoʼuchi chi püchonkai». Nuʼunakalaka chi wayuukai nipialuʼumüin süka nunoujain tü nümakat Jesús nümüin. 51 Wopuluʼupa chi wayuukai, nüpanapajünaka natuma na nüchepchiakana süpüla naküjainjatüin nümüin naawalaain chi nüchonkai. 52 Nüsakirakalaka na nüchepchiakana jalapüshijachin naawalaain chi nüchonkai. «Ojutajaasü tü tuttaakat nuulia soʼukalinka maʼaka saaʼin la una»,* namakalaka nümüin. 53 Niyaawataka saaʼu chi wayuukai sülatüin tia, wanaa maʼin sümaa nümüin Jesús nümüin: «Katoʼuchi chi püchonkai». Nunoujakalaka chi wayuukai namaʼaleeya na wayuu kepiakana nümaa. 54 Piantuairü joo sukua naaʼinrüin Jesús kasa pülasü. Naaʼinrüin shia süchikijee nüleʼejüin Judeajee chaa Galileamüin.