Apocalipsis

22 Niiʼiyataka tamüin wanee süchi kataka atuma soʼu wayuu, jorottoʼu maʼin tia süchikat, aparatsü shia wanaapünaa sümaa tü einasee nuluwataakalü aaʼu Maleiwa jee chi Anneetchonkai. 2 Aparatsü tü süchikat suluʼupünaa tü wopu jerutkat suluʼu tia pueulokot. Eejatü wunuʼulia katakalü atuma soʼu wayuu sotpünaa tü süchikat, polootua piamamüin kachooin shia, jakütawaisü süchon tü wunuʼuliakat kashiwai. Aawalaasü wayuu suulia ayuulii sainküinpünaa tü mmakat sutuma süpana tia wunuʼuliakat.

3 Nnojoleena oʼulejünüin na wayuukana, eejeerü suluʼu tü pueulokot tü einasee nuluwataakalü aaʼu Maleiwa jee chi Anneetchonkai. Aʼyataajeena na nüchepchiakana Maleiwa nümüin, 4 neʼreerü nuʼupünaa jee ashajüneerü nünülia neʼipoʼunain. 5 Nnojoleerü saʼwalin süchikuaʼa jee nnojoleerü choʼujaain chuwatüin wanee ranpara naaʼu jee nnojoleerü choʼujaain nuwarala chi kaʼikai, jama niain Jehová* chi Maleiwakai chuwatuuika atuma napüleerua jee aluwataweena naya süpüla kaʼikat süpüshuaʼa.

6 Anuujeseʼe nünüiki chi aapieekai tamüin: «Shiimain pütchikat tüü jee ayateeriaʼaya shia ekeraajüin. Nüküjain shia Jehová* chi Maleiwakai namüin na nünüikimaajanakana, nuluwataain chi aapiee nümaʼanajeejachikai süpüla nüküjainjatüin namüin na nüchepchiakana süchiki tü kasa alateetkat soʼu palit kaʼi. 7 Jülüja paaʼin tantajachin soʼu palit kaʼi, anakuwaʼipai maʼin chi wayuu aapaakai sümaa tü pütchi ashajünakat suluʼu rooyokot tüü aashajaaka süchiki tü kasa alatajatkat naashin Maleiwa».

8 Tayakai Juan taya aapaka süchiki tia jee taya eʼraka shia. Süchikijee teʼrüin tia jee süchikijee taapüin süchiki, tasapainkaka taya nümülatuʼu chi aapieekai süpüla taʼwaajüinjachin nia, jama niain eeʼiyatüin tamüin tia. 9 «¡Jalian! ¡Nnojo müin pia! Achepchieʼeraa neʼe taya wanaa pümaa maʼaka naaʼin na puwalayuukana jee maʼaka naaʼin na nünüikimaajanakana Maleiwa otta müshiʼiya na oonookana sümaa tü pütchi ashajünakat suluʼu rooyokot tüü. Nia puʼwaajüinjachika Maleiwa» nümakalaka tamüin.

10 Anuujeseʼe sooʼomüin nünüiki tamüin: «Nnojo puunjulajüin süchiki tü pütchi süchikimaajatkat tü kasa alatajatkat saashin türa rooyokot, jama sülüʼülüin tü kaʼi aneekünatüjütkalia paala. 11 Chi wayuu nnojoikai lotuin akuwaʼipa, anakajaʼa ayatüle naaʼinrüin wanee kasa nnojotka lotuin akuwaʼipa. Akaʼaya chi yarüttakai akuwaʼipa, anakajaʼa ayatüleʼeya yarüttüin nukuwaʼipa. Eekajasaʼa chi wayuu lotokoi akuwaʼipa, ayatajachia aaʼinrüin kasa eekai lotuin akuwaʼipa jee müshia chi wulekai akuwaʼipa ayatajatia wulein nukuwaʼipa.

12 »‹¡Jülüja paaʼin tanüiki! Alüʼütshi taya süpüla antaa, süsaleena tatuma na aaʼinrakana kasa mojusü, eʼreenapejeʼe kasa anasü na jaa makana tamüin. 13 Taya chi Shikiishikai wanee kasa otta taya Sajaʼttakai* akajee wanee kasa. 14 Anakuwaʼipalii na ashijaakana tü nasheʼin miyoʼukat maʼin süpüla neküinjanain süchon tü wunuʼulia katakalü atuma soʼu wayuu jee süpüla nekeroluinjanain suluʼupünaa soʼu tü pueulokot. 15 Shia chaka anooipaʼa tü etkalüirua namaʼaleeya na eeʼirajitshiikana ouutsü, na aʼluwajiraakana nakuwaʼipa,* na oʼunuliikana saaʼin wayuu, na aʼwaajakana shiyaakua maleiwayaasü jee napüshuaʼa na kamalainkana amüin aküjaa naʼalain jee müshiʼiya na kiʼrakana sünain aküjaa alawaa›.

16 »‹Tayakai Jesús, taluwataain jümüin chi aapiee tamaʼanajeejachikai süpüla nüküjainjatüin jümüin pütchikat tüü anainjatka atuma nakuwaʼipa na anoujashiikana. Nüpüshi* taya David sümaa nülüin taya, müshi taya maʼaka saaʼin tü jolotsü chuwatakat maʼin, eweetakat süpülapünaa suwasajaain aikat›».

17 Ayatüshia «¡Jalaichi!» müin chi Maleiwakai sükajee tü nüpülainkat sümaa tü nümüraajüinkat chi Anneetchonkai. Napüshuaʼa na wayuu eekai aapüin tü pütchikat, anakajaʼa «¡Jalaichi!» namüle. Antajachi yaamüin chi wayuu eekai wüinñaasüin, chi wayuu aseekai sümüin tü wüin katakalü atuma soʼu wayuu, anasü nüsüle shia sümaa machekajuuin shia nümüin.

18 «Anuu tanüiki namüin napüshuaʼa na wayuu aapakana tü sümakat rooyokot tüü süchikimaajatka tü kasa alatajatkat. Eere wanee wayuu akooʼomüinjakai pütchikat tüü, nüjüteerü Maleiwa nümüin tü kasa mojusü müliakalü atuma wayuu ashajünaka achiki suluʼu rooyokot tüü. 19 Eere wanee wayuu eekai asüʼünneʼerüin süpüshi tü pütchi ashajünakat suluʼu rooyokot tüü süchikimaajatka tü kasa alatajatkat, nnojoleerü nuuʼulaain Maleiwa saapünüin nümüin tü kasa anasü ashajünakat suluʼu rooyokot tüü. Nnojoleerü nuuʼulaain Maleiwa niküin süchon tü wunuʼulia katakalü atuma soʼu wayuu jee nnojoleechi nikerotirüin nia Jerusalénmüin.

20 »Anuu nünüiki chi aküjakai shiimain tia pütchikat: ‹Antamaateechi taya maalü›».

«¡Amén!* Pünta maalü Señotkalee Jesús».

21 Kasataalejeseʼe kamaneein chi Señotkai Jesús namüin na aneekuushikana.