Tü nüshajalakat Lucas
10 Süchikijee tia, nüneekakalaka chi Señotkai akaratshishii nekii wayuu nooʼomüin na nikirajüinkana, nüjütakalaka naya nüpüleerua suluʼu piamawalin naya sainküinpünaa tü pueulokot jee suluʼupünaa tü mma eemüinjachire nüntüin. 2 Nümakalaka Jesús namüin: «Watta saalii tü pünajüt eekai keraairüin süpüla akotchojünaa, palitpejeʼe na wayuu aʼyataakana sünain. Shiaka anain juchuntule nümüin chi Kaʼttiashikai tü pünajütkat süpüla nuluwataainjanain wayuu aʼyataainjanakana sünain. 3 ¡Juʼuna jümaala! Anaa jooluʼu tajütüin jia maʼaka saaʼin anneetchein saʼakamüin erü simoluuna. 4 Nnojo jülüʼüjain wanee woʼot sütainjatka jünneetse, nnojo jülüʼüjain wanee kasa sütainjatka jimia, nnojo jülüʼüjain suwalaʼata jukoʼusüin otta nnojo jüsaküin wayuu jüntiraale sümaa wopuluʼu. 5 Anuu jünüikinjatka jüntapeena suluʼumüin wanee miichi: ‹Kasataalejeseʼe anain jukuwaʼipa›. 6 Eere wanee wayuu eekai kamaneein* jümüin suluʼu tia miichikat, aneerüjaʼa nukuwaʼipa maʼaka jücheküin shia nüpüleerua. Nnojoirejeʼe wanee wayuu eekai müin nukuwaʼipa, eitaweerüjaʼa jünainmüin tü jümakat nümüin. 7 Makata jia suluʼu tia miichikat, jiküinjatü jee jüsüinjatü tü kasa aapünakat jümüin, jama nüwalaajünüinjachin wanee wayuu saaʼu niʼyataain. Nnojo jülatawaain jümüin suluʼumüin wanee miichi.
8 »Kamaneere wayuu jümüin jüntapa suluʼumüin wanee pueulo, jiküinjatü tü kasa naapakat jümüin, 9 jaawaleʼera wayuu eekai ayuulin otta müinjatü jünüiki namüin: ‹Alüʼütsü nükalia Maleiwa süpüla aluwatawaa jaaʼu›. 10 Jüntüle suluʼumüin wanee pueulo sümaa mamaneein wayuu jümüin, jujuʼita kaayeruʼumüin jee müinjatü jünüiki namüin: 11 ‹Woʼotojuin sünainjee wooʼui tü mma yaajatkat süpaʼa tü jupueulosekat, shiyaawaseinjatü jümüin mojuin tü kasa jaainjakat. Anuupejeʼe wanee kasa waküjainjatka jümüin: alüʼütsü nükalia Maleiwa süpüla aluwatawaa›. 12 Shiimain tü tamakat jümüin, alanaʼaleejeeria maʼin tü müliaa jiʼreetkat suulialeʼeya tü müliaa neʼreetkat na wayuu chajanakana Sodoma.
13 »Aluʼuwatshii jia chakana Corazín jümaʼaleeya jiakana chakana Betsaida. Saainjünülejeʼeya chaa Tiro otta chaa Sidón tü kasa pülasü jiʼrakat, ayaawajaashiije naya wayuukana suulia naainjala, naʼatüinjeʼe nanain tü kuluulu shiyaawasekat mojuu aaʼin jee joyotushiije naya saʼaka paliʼi. 14 Soʼu tü Kaʼi Kasalajaneetkalü oʼu Saainjala Wayuu nutuma Maleiwa, alanaʼaleejeeria maʼin tü müliaa jiʼreetkat suulia tü müliaa neʼreetkat na wayuu chajanakana Tiro otta Sidón. 15 Otta jia wayuu chakana Capernaúm, ¿amaanüinjanayaa jia jaaʼinruʼu chaa iipünaamüin?, chainjanasaʼa neʼe jia Amuuyuupaʼamüin.*
16 »Chi aapaakai sümaa jünüiki, naapaa amaalü tanüikiya. Chi nnojoikai jaa müin jümüin, nnojoishi nia jaa müin tamüinya. Chi nnojoikai jaa müin tamüin, nnojoishijaʼamata jaa müin nümüin chi Kajünalakai taya».
17 Naleʼejaka nachikuaʼa na akaratshishiikana nekii nikirajüin Jesús, aleʼejüshii naya sümaa talatüin maʼin naaʼin jee namakalaka nümüin: «Señotkalee, jaʼitakajeʼe neʼe tü yolujaakalüirua, jüüjüüsü wamüin wachuntapa pünülia». 18 Anuujeseʼe nünüiki Jesús namüin: «Müshijaʼa teʼrakai naaʼin nujutuuin Satanás maʼaka shiyaa juya iipünaajee. 19 Anuu taapüin jümüin laülawaa süpüla jüʼliikatüin saaʼu wüi sümaa jeʼyut jee süpüla jükanalüinjanain na jüʼünüükana. Nnojoleerü eein wanee kasa eekai jamajüin atuma jia. 20 Nnojo talatüin jaaʼin sutuma jüüjüüin yolujaa jümüin, talatüinjatü jaaʼin sutuma süshajünüitpain jünülia chaa iipünaa». 21 Wanaa sümaa tia, talatakalaka maʼin naaʼin Jesús sutuma tü nüpülainkat Maleiwa, anuujeseʼe nünüiki: «Tashikalee, pia Laülaashikai chaa iipünaa jee saaʼu tü mmakat, taʼwaajüin pia suʼupala wayuu süka nnojoluin püküjain süchiki tüü namüin na atüjashiikana jee namüin na kekiishiikana. Püküjapejeʼe shia namüin na tekirajüinkana. Tashikalee, müsiaʼaya sukuwaʼipa putuma süka pücheküin suluʼu müinjatüin shia». 22 Jee müshi nia: «Niʼitaain tajapuluʼu chi Tashikai süpüshuaʼa tü kasakalüirua. Nnojoishi jaralin eʼraajüin maʼin taya, niaʼala neʼe chi Tashikai otta nnojoishi jaralin eʼraajüin maʼin chi Tashikai, tayaʼala neʼe eʼraajaka nia otta tekirajüle wanee wayuu, nieechi eʼraajaka chi Tashikai».
23 Niirakaakalaka namüin na nikirajüinkana jee nümakalaka namüin namüiwaʼa: «Anakuwaʼipalii na wayuu eʼrakana tü kasa jiʼrakat. 24 Wainma na nünüikimaajanakana Maleiwa jee wainma na aluwataashii eʼreekana tü kasa jiʼrakat maaʼulu yaa. Nnojotpejeʼe shia neʼrüin jee nnojotsü naapüin süchiki».
25 Nüshaʼwalaaka wanee wayuu atüjashi süpüleerua tü Pütchi Aapünakat nümüin Moisés jee nüsakirayaaka Jesús süpüla nuuʼulaküin naaʼin jee nümaka nümüin: «Ekirajüikalee, ¿kasa taaʼinrajatka süpüla katüinjatüin toʼu süpüla kaʼikat süpüshuaʼa?». 26 Anuujeseʼe nünüiki Jesús nümüin: «¿Kasa ashajünaka sünain tü Pütchi Aapünakat nümüin Moisés? ¿Kasa paashajeʼerawaika sünain?». 27 Anuujeseʼe nünüiki chi wayuukai nümüin: «‹Alinjachi püpüla Jehová* chi Pümaleiwasekai, alinjachi nia püpüla süka süpüshuaʼa paaʼin,* sükajee pukuwaʼipa, süka süpüshuaʼa pütchin otta jülüjainjachi nia paaʼin waneepia› jee ‹alinjatü püpüla wayuu maʼaka alin pia püpülajiraa›». 28 Anuujeseʼe nünüiki Jesús nümüin: «Pansaasü tü pümakat. Ayataʼaya paainjain tia, puunteetkalaka katüin poʼu».
29 Anuujeseʼe nünüiki chi wayuukai nümüin Jesús süpüla sütüjaanüinjatüin aaʼu wayuuin loto akuwaʼipachi nia: «¿Jarai maʼin chi wayuu alinjachikai tapüla?». 30 Nusoutaka Jesús nümüin: «Eejaittaa wanee wayuu sejechi Jerusalénjee, chaʼwai nia Jericómüin. Nüntiraaka sümaa kaʼruwarannuu, suʼluwajaka tü nüsheʼinkat, süsheʼejüin nia, outapünaaka nia süpütüin. 31 Süchikijee tia, nülatakalaka wanee sacerdote suluʼupünaa tia wopukot, niʼrapa chi wayuukai, miʼitaka nia suluʼu wanee saʼata tü wopukot. 32 Miʼitataajaʼa wanee nülüin Leví nuulia chia wayuukai nülatapa suluʼupünaa tia wopukot. 33 Nülatakalaka wanee wayuu samariajeʼewai, sümülialaaka naaʼin naalin chia wayuukai niʼraiwaʼaya nia. 34 Nürütkaakalaka nünainmüin chi wayuukai sümaa nüshorottirüin seita jee wiino saaʼu tü nülioʼukat, nükaülajaka shia. Noʼotuinjeseʼe nia saaʼu nüpüliise, nümaakalaka nia suluʼu wanee miichi atunkulee otta naaʼinmajaka nia. 35 Waneemüin kaʼi, naapakalaka piamasü ‹denario›* nümüin chi sülaülajanakai tü atunkuleekat jee nümakalaka nümüin: ‹Paaʼinmaja chi wayuukai, eerejeʼe wanee kasa piyaʼlajaka nümüin, tawalaajeerü pümüin taleʼejapeena›. 36 Naʼakajee naya apünüinshiikana wayuu, ¿jaraiche maʼin chi aikai apüla chi antiraakai sümaa kaʼruwarannuu?». 37 Anuujeseʼe nünüiki chi wayuukai nümüin Jesús: «Niajaʼa chi amülialaakai aaʼin naalin». Nusoutaka Jesús nümüin: «Anasü shiale paaʼinrüin tia».
38 Sümaʼainruʼu noʼunuin, nujuntapünaaka Jesús suluʼumüin wanee pueulo, nutunkaapünaaka shipialuʼu wanee wayuu kanüliasü Marta. 39 Eejatkalaka wanee shimiirua kanüliasü María, süikalaaka María nüʼütpaʼa chi Señotkai sünain aapajaa tü nümakat. 40 Eekajasaʼa Marta shapaakuʼu müsü saaʼin sünain aaʼinraa wainma kasa. Arütkaasüjeseʼe shia nünainmüin Jesús jee sümakalaka nümüin: «Señotkalee, ¿nnojotsükai kasajatüin pümüin süpütüin taya tamüiwaʼa tü temiiruakat sünain aaʼinraa wainma kasa? Püjüta maa shia yalejee sükaalinjaiwa taya». 41 Anuujeseʼe nünüiki chi Señotkai sümüin: «Marta, shapaakuʼu müsü paaʼin saaʼu wainma kasa, 42 nnojotpejeʼe wainmawalain tü kasa choʼujaakat, waneesiaʼala neʼe. Eekajaʼa María süneeküin tü kasa anasükat, nnojoleetkalaka süsütünüin suulia».