Tü nüshajalakat Lucas
16 Süchikijee tia nümakalaka Jesús namüin na nikirajüinkana: «Eejaittaa wanee wayuu washirü kalaülajanakai epia. Süküjünakalaka nümüin süshaitünüin aka nünneetse nutuma chi sülaülajanashikai nipia. 2 Nuunejinnakalaka chia wayuukai nutuma chi nülaamainkai jee nümakalaka nümüin: ‹¿Kasakai wayuu tü taapakat püchiki? Anasü yaawale putuma tamüin tü kasa piʼyataakalü anain süka tooʼuleʼerüinjachin pia suulia sülaülajanaa tepia›. 3 Anuujeseʼe nünüiki suluʼu naaʼin chi sülaülajanakai tü miichikat: ‹¿Jameetkajasaʼa maʼin takuwaʼipa sutuma tojutunajachin nutuma chi talaamainkai? Nnojoipejeʼe taya katchinwalain süpüla taʼyataainjachin suluʼu yüüja, japüitaaleechi joo taya tojulijakuʼu tamüle. 4 ¡Aaa!, tatüjaaitpa aaʼu tü taaʼinreetkat süpüla kamaneeinjatüin wayuu tamüin tojutunapeena nutuma chi talaamainkai›. 5 Nuunejiraka waneʼewai nakua na kojuyaalakana nuulia chi nülaamainkai, nümakalaka nümüin chi palajaikai: ‹¿Jeʼra pujuyaala nuulia chi talaamainkai?›. 6 Nusoutakalaka chi wayuukai nümüin: ‹2.200 litro* seita oliva tojuyaala nuulia›. Anuujeseʼe nünüiki chi sülaülajanakai tü miichikat: ‹Anuu tü karaloʼuta pujuyaalamaajatkat, puuntawaata, püshaja sünain kojuyaalain pia 1.100 litro seita›. 7 Nüsakirakalaka chi wane kojuyaalashikai: ‹¿Jama piakai? ¿Jeʼra pujuyaala nuulia chi talaamainkai?›. Nusoutakalaka chi wayuukai nümüin: ‹100 toleeka* trigo tojuyaala nuulia›. Anuujeseʼe nünüiki chi sülaülajanakai tü miichikat: ‹Anuu tü karaloʼuta pujuyaalamaajatkat, püshaja kojuyaalain pia 80 toleeka trigo›. 8 Mayaapejeʼe nnojoluin lotuin nukuwaʼipa chi sülaülajanakai tü miichikat, anasü pütchi nüchiki nutuma chi nülaamainkai süka wayuuin kekiishi nia. Na wayuu eekana maaʼulu yaa* atüjaleeshiʼiya süpüleerua sukuwaʼipa wanee kasa noulialeʼeya na aʼyataakana nümüin Maleiwa.*
9 »Anuu sooʼomüin tanüiki jümüin: aleewa jia sümaa wayuu sükajee tü juwashirüinkat, nnojotpeena tia eejeena jia waneepia eeinjatüle katüin joʼu. 10 Chi wayuu lotokoi akuwaʼipa sünain palit kasa, loteerü nukuwaʼipa sünain wainma kasa. Chi wayuu nnojoikai lotuin akuwaʼipa sünain palit kasa, nnojoleerü lotuin nukuwaʼipa sünain wainma kasa. 11 Nnojorüle jiisattüin tü juwashirüinkat, ¿jaraleetka eʼitaain jajapuluʼu tü washirüü shiimainkat maʼin? 12 Nnojorüle jiisattüin tü naatakat kakorotshi, ¿jaraleechikaʼa aapüin jümüin wanee kasa? 13 Piamale nülaamain wanee achepchiee, aijeechi waneeshia nüpüla otta müshia chi wane maalinjeechi nüpüla. Waneepieechi nia nümaa wanee otta mojuteechi nümüin chi wane. Nnojoishii nüchepchiainjanain jia Maleiwa sümaa chataain jaaʼin süchiirua tü washirüükat».
14 Eejanakalaka waneinnua fariseo alanaʼaleekana amüin sujutu nneerü, yalajana naya aapajüin tü nümakat Jesús jee nemeeʼerainpalashi nia. 15 Anuujeseʼe nünüiki Jesús namüin: «Jüküjain sümüin wayuu lotuin jukuwaʼipa, nütüjaapejeʼe saaʼu Maleiwa tü suluʼukat jaaʼin. Tü kojutukat sümüin wayuu nülerajüin Maleiwa.
16 »Tü Pütchi Aapünakat nümüin Moisés jee tü namapuʼukat na Nünüikimaajanakana Maleiwa ajaʼttüsü naaʼu Juan. Soʼujeʼereeya tia, aküjünüsü tü pütchi anakat maʼin süchiki nuluwataainjachin Maleiwa. Shia saaʼinmaaka maʼin wayuu tia. 17 Eesüjaʼa süpüla shieerüin ajaʼttüin palajana tü sirumatuʼukat otta tü mmakat, eekajasaʼa tü Pütchi Aapünakat nümüin Moisés ekeraajeerü shia süpüshuaʼa. Nnojoleerü eein waneesiaakaijeʼe eekai nnojoluin shikeraajüin.
18 »Chi wayuu ooʼulaakai suulia nuʼwayuuse sümaa kawalaʼatain shia nutuma kaainjaleechi suulia otta chi wayuu kasaatkai sümaa wanee wayuu ooʼulaaushi kaainjaleechi nia.
19 »Eejaittaa wanee wayuu washirü jepisiiyaa soʼu nüsheʼin jee aainjuushi süka tü kuluulu kanüliakat lino, emiʼijaashi nia waneepia, eesü ekawaa nutuma jee wainma korolo nümaʼana. 20 Eʼipünaanawaishi soʼuluʼu nipia chi washitkai wanee wayuu kanüliashi Lázaro, wayuu ojulijüi nia jee yooisü nüta. 21 Nikeetaa amüinrü tü ojutuukat saaʼujee nimeesain chi washitkai jee antawaisü erü sünain eʼerujaa nülioʼu. 22 Mapa maʼin, outakalaka chi wayuu ojulijüikai jee nümaanakalaka nümaʼanamüin Abrahán natuma na aapiee nümaʼanajeejanakana Maleiwa.
»Outataajaʼa chi wayuu washitkai jee nojoitunakalaka. 23 Chapa chi washitkai Amuuyuupaʼa* saʼaka nümüliala, niʼrakalaka wattajee Lázaro naʼatoʼu Abrahán. 24 Anuujeseʼe nünüiki chi washitkai: ‹Taatchee Abrahán, pümüliajaʼaya taya. Püjüta pümaala Lázaro nucholotiraiwa shiʼichi najapü shiroku wüin süpüla nüsamatüin tayee, müliasiaʼaya maʼin taaʼin saʼaka tü sikikat›. 25 Anuujeseʼe nünüiki Abrahán nümüin: ‹Tachonchee, soto paaʼin piʼrüin anaa kataiwaʼaya poʼu, müliapuʼupejeʼe maʼin naaʼin Lázaro. Aniikalaka joo nia amüliajünüin aaʼin, eekajasaʼa piakai eʼrüshi pümüliala. 26 Anuutaala joo eeruʼnnuin pasanain wanain wanee ishi miyoʼu maʼin,* nnojotkalaka süpüla sülatajatüin wayuu chaa jünainmüin, akaataajaʼa na wayuu chajanakana, nnojoishii süpüla nalatajanain sei nakua›. 27 Anuujeseʼe nünüiki chi washitkai: ‹Taatchee, mülejeʼe sukuwaʼipa tia, anakajaʼa puluwataale Lázaro nipialuʼumüin chi tashikai 28 naapiraiwa na jaʼraishiikana tawalayuu suulia nantajüin yaamüin sünain eʼraa namüliala›. 29 Anuujeseʼe nünüiki Abrahán nümüin: ‹Aapinneena naya nutuma Moisés namaa na Nünüikimaajanakana Maleiwa, jaa müinjana na puwalayuukana namüin›. 30 Anuujeseʼe nünüiki chi washitkai nümüin Abrahán: ‹Nnojottaasü anain suluʼu tia taatchee Abrahán, ayaawajaajeena naya suulia naainjala nüntüle chaa namaʼanamüin wanee wayuu eekai nüsoʼiraashin aaʼin süchikijee outaa›. 31 Nusoutakalaka Abrahán nümüin: ‹Nnojoliirejeʼe noonooin sümaa tü nümakat Moisés jee na Nünüikimaajanakana Maleiwa, shiaka naapaameematüin amaa nünüiki wanee wayuu eekai nüsoʼiraashin aaʼin süchikijee outaa›».