Levítico

13 Ayatakalaka naashajaain Jehová nümaa Moisés jee nümaa Aarón sümaa nümüin namüin: 2 «Shütüle nüta wanee wayuu, josole süjü sümaa süsha tü nülioʼukat eesüjaʼa shiale nünain tü ayuulii kanüliakat lepra.* Amaanajachi nia nümaʼanamüin Aarón chi sacerdotekai jee niale nümaʼanamüin wanee nüchon eekai sacerdotein. 3 Nünaʼlüinjatü chi sacerdotekai tü yooi sünainkat nüta chia wayuukai. Kasuule soi tü yooikat sünain nüta jee shikuule süpüshi niʼiruku chi wayuukai sutuma tia yooikat, shiajaʼamata nünainka tü ayuulii kanüliakat lepra, nünaʼlajachi nia chi sacerdotekai jee nüküjeetka nümüin yarüttüin nia sutuma tia ayuuliikat. 4 Kasuule tü süjükat sümaa tü isha josokot sünain nülioʼu sümaa nnojoluin shikuuin süpüshi niʼiruku sutuma tü yooikat sünain nüta jee nnojorüle kasuuin tü soikat, akatannajachi chia wayuukai nutuma chi sacerdotekai soʼu akaratshi kaʼi. 5 Anaʼnneechi chia wayuukai nutuma chi sacerdotekai sülatapa akaratshi kaʼi. Süshaʼwalaale nuulia tü yooi sünainkat nüta jee nnojorüle wattakualüin shia sünain nüta, akatannajachi chia wayuukai nutuma chi sacerdotekai soʼu akaratshi kaʼi sooʼomüin.

6 »Anaʼnnajachi chia wayuukai nüchikuaʼa nutuma chi sacerdotekai sülatapa tü akaratshikat kaʼi. Süshaʼwalaale nuulia tü yooikalü atuma nüta jee nnojorüle wattakualüin shia sünain nüta, nüküjeerü chi sacerdotekai wulein chia wayuukai, süta neʼe nülioʼu tü akumajaakat. Nüshijaajeetkalaka chi wayuukai tü nüsheʼinkat jee wuleechikalaka nia. 7 Eekajasaʼa wattakuarüle tü süjükat jee tü süsha oosojookot sünain nüta chia wayuukai süchikijee nuʼunuin paala nümaʼanamüin chi sacerdotekai süpüla süküjünüin nümüin wulein nia, oʼunajachi nia nüchikuaʼa nümaʼanamüin chi sacerdotekai. 8 Nünaʼlüinjatü chi sacerdotekai nülioʼu chia wayuukai. Wattakuarüle sünain nüta süjü jee süsha tü nülioʼu oosojookot nüküjainjatü chi sacerdotekai yarüttüin chi wayuukai, shia nünainka tü ayuulii kanüliakat lepra.

9 »Wattakuarüle sünain nüta wanee wayuu tü ayuulii kanüliakat lepra amaanajachi nia nümaʼanamüin chi sacerdotekai, 10 nünaʼnneechika nutuma chi sacerdotekai. Kasuule tü shütakat sünain nüta sümaa kasuuin tü noikot sutuma jee yooire tü nülioʼu shütakat, 11 shiajaʼamata sünainka nüta tü ayuulii kanüliakat lepra tü aikat maʼin, nüküjainjatü chi sacerdotekai yarüttüin chi wayuukai. Nnojoishi nükatalüinjachin, jama yarüttüichipain nia. 12 Wattakuarüle tü ayuulii kanüliakat lepra nütoutajee chi wayuukai jee niʼrüle chi sacerdotekai sukumajaain tia ayuuliikat nuuʼuinainjee sünainmüinreʼeya nikii chi wayuukai 13 jee nünaʼrüle nia chi sacerdotekai sümaa niʼrüin wattakualüin nütoutajee chi wayuukai tü ayuulii kanüliakat lepra, nüküjainjatü chi sacerdotekai wuleichipain chi wayuu ayuuikai sutuma lepra. Kasuuitpa tü nütakat sutuma tia ayuuliikat, wuleichipakalaka nia. 14 Eekajasaʼa eejaʼalaa sümüle wanee nülioʼu eekai eʼikaain, yarütteechi nia. 15 Niʼrapa chi sacerdotekai eʼikaain nülioʼu wanee wayuu nüküjeerü yarüttüin nia, yarüttüshi wanee wayuu eʼikaale nülioʼu. Shia nünainka tü ayuulii kanüliakat lepra. 16 Kasuule süchikuaʼa tü nülioʼu eʼikaakat paala nünain oʼunajachi nia nümaʼanamüin chi sacerdotekai, 17 nünaʼleechikalaka nia chi sacerdotekai. Kasuule nülioʼu chia wayuukai nüküjeerü chi sacerdotekai wuleichipain chi wayuukai.

18 »Sukumajaale wanee yooi sünain nüta wanee wayuu jee naawalaale süchikijee tia, 19 shütüle nüta sümaa kasuuin shia süchikanainruʼu eejatüle yoolin paala shia jee shiale kanajüin nüta, kasuule jee ishooitüle shia, oʼunajachi chia wayuukai nümaʼanamüin chi sacerdotekai. 20 Nünaʼleerü tia chi sacerdotekai, niʼrüle shikuuin niʼiruku chia wayuukai jee kasuuin soi tü yooikat, nüküjeerü chi sacerdotekai yarüttüin chia wayuukai. Shia nünainka tü ayuulii kanüliakat lepra akumajaaka sünain tü yooikat. 21 Eekajasaʼa nünaʼrüle tü yooikat chi sacerdotekai jee niʼrüle nnojoluin kasuuin tü soikat jee nnojoluin shikuuin niʼiruku chi wayuukai sutuma sümaa müin sajaʼtteekai saaʼin tü ayuuliikat, akatanneechi chia wayuukai nutuma chi sacerdotekai soʼu akaratshi kaʼi. 22 Wattakuarüle tü ayuuliikat nütoutajee chi wayuukai, nüküjeerü chi sacerdotekai yarüttüin chia wayuukai, shia nünainka tü ayuulii kanüliakat lepra. 23 Eekajasaʼa ayatüle kanain nüta chi wayuukai sümaa nnojoluin wattakualüin shia nütoutajee, shia neʼe sutuma shütüin tü yooikat nünain, nüküjeerü chi sacerdotekai wulein chia wayuukai.

24 »Ishale wanee wayuu sümaa sajaʼttaleein süta tü nülioʼukat, sükasuujaale sümaa ishooitajaain shia jee kasuʼleere shia, 25 nünaʼleerü chi sacerdotekai nülioʼu chi wayuukai. Kasuule soi tü kanakat sünain nüta jee müle shikuukai saaʼin niʼiruku chi wayuukai, shiajaʼamata akumajaaka saaʼu nüta tü ayuulii kanüliakat lepra, nüküjeerü chi sacerdotekai yarüttüin chia wayuukai. Shia nünainka tü ayuulii kanüliakat lepra. 26 Eekajasaʼa nünaʼrüle chi sacerdotekai nülioʼu chi wayuukai jee nnojorüle niʼrüin müin kasuukai saaʼin soi tü kanakat sünain nüta jee nnojorüle shikuuin tü niʼirukukat sutuma sümaa müin sajaʼtteekai saaʼin tü ayuuliikat, akatanneechi chia wayuukai nutuma chi sacerdotekai soʼu akaratshi kaʼi. 27 Anaʼnneechi chi wayuukai nutuma chi sacerdotekai sülatapa tü akaratshikat kaʼi. Jaʼyale saaʼu wattakualüin nütoutajee tü kanakat sünain nüta, nüküjeerü chi sacerdotekai yarüttüin chia wayuukai. Shia nünainka tü ayuulii kanüliakat lepra. 28 Eekajasaʼa ayatüle tü kanakat sünain nüta, sümaa nnojoluin wattakualüin shia nütoutajee jee müle sajaʼtteekai saaʼin tü ayuuliikat, shiajaʼa nee sutuma shütüin tü ishakat sünain nüta, nüküjeerü chi sacerdotekai wulein chia wayuukai jama shiain neʼe shütüin tü nülioʼu eʼikaakat sutuma ishain nia.

29 »Yooire nikii wanee wayuu jee shiale shikii wanee jierü jee shiataale yoolin nanain tü neʼiyeisekat, 30 nünaʼleerü chi sacerdotekai tü yooikat. Müle shikuukai saaʼin niʼiruku chi wayuukai sutuma jee mariiale tü soikat sümaa palitchoin shia, nüküjeerü chi sacerdotekai yarüttüin chi wayuukai. Shia wanee yooi sünainka nikii chi wayuukai jee sünainka nüʼliima, shia tü ayuulii kanüliakat lepra sünainka nikii chi wayuukai jee sünainka niʼiyeise. 31 Niʼrüle chi sacerdotekai nnojoluin shikuuin niʼiruku chi wayuukai sutuma tü yooikat jee nnojoluin yuulin tü soikat, akatannajachi chi wayuukai nutuma chi sacerdotekai soʼu akaratshi kaʼi. 32 Nünaʼleerü chi sacerdotekai tü yooikat sülatapa tü akaratshikat kaʼi. Nnojorüle wattakualüin tü yooikat jee nnojorüle mariiain tü soikat sümaa nnojoluin shikuuin niʼiruku chi wayuukai sutuma, 33 nümoijainjatü nikii chi wayuukai jee nüüjainjatü nüʼliima, nnojotpejeʼe nüüjainjatüin eere tü yooikat. Nükatanneechika chi wayuukai nutuma chi sacerdotekai soʼu akaratshi kaʼi.

34 »Sülatapa tü akaratshikat kaʼi, nünaʼlajatü chi sacerdotekai tü yooikat. Nnojorüle wattakualüin nütoutajee chi wayuukai tü yooi sünainjatkat nikii jee tü sünainjatkat nüʼliima sümaa nnojoluin shikuuin tü niʼirukukat sutuma, nüküjeerü chi sacerdotekai wulein chia wayuukai, nüshijaajeetka chi wayuukai tü nüsheʼinkat jee wuleechikalaka nia. 35 Eekajasaʼa wattakuarüle tü yooikat nütoutajee chi wayuukai süchikijee wulein paala nia, 36 anaʼnnajachi nia nutuma chi sacerdotekai. Wattakuarüle tü yooikat nütoutajee chi wayuukai, nnojotsü nünaʼlajatüin chi sacerdotekai mariiale tü soikat, yarüttüshi chia wayuukai. 37 Niʼrüle chi sacerdotekai nnojoluin wattakualüin tü yooikat nütoutajee chi wayuukai sümaa yuulin tü soikat, shiajaʼa süka naawalaaichipain chi wayuukai. Wuleichipa nia jee nüküjeerü chi sacerdotekai wulein chia wayuukai.

38 »Kanale nüta wanee wayuu jee shiale kanain süta wanee jierü sümaa kasuuin tü sünakat nata, 39 nünaʼleerü tia chi sacerdotekai. Moolole tü kanakat sünain nüta chi wayuukai shia süka nnojoluin alin tü akumajaakat sünain nüta, wuleshi chia wayuukai.

40 »Süsatüle nuʼwala wanee wayuu jee moire tü nikiikat wuleshijaʼamata nia. 41 Süsatüle tü nuʼwala niʼipoʼunainkat jee moire shia, shiajaʼa süka wulein nia. 42 Eekajasaʼa kasuule sümaa ishooitüin tü eʼikaakat sünain nikii wanee wayuu eere molin shia jee shiale niʼipoʼunain, shia akumajaaka sünain nikii jee sünain niʼipoʼu tü ayuulii kanüliakat lepra. 43 Anaʼnneechi chi wayuukai nutuma chi sacerdotekai. Kasuule sümaa ishooitüin sünain nüraloʼu wanee wayuu eere molin nikii jee shiale niʼipoʼunain sümaa müin shia maʼaka saaʼin tü lepra sünainkat nüta wanee wayuu, 44 ayuuishi chia wayuukai sutuma tü kanüliakat lepra. Yarüttüshi nia jee nüküjeerü chi sacerdotekai yarüttüin chia wayuukai süka sukumajaain sünain nikii tü kanüliakat lepra. 45 Chi wayuu kanainkai tia ayuulii kanüliakat lepra, chatatuainjatü nüsheʼin jee shokuleraainjatü nuʼwala. Akaʼaya nia, keimataalajainjachi sümaa müin nünüiki nikiiseruʼu: ‹¡Yarüttüshi taya, yarüttüshi taya!›. 46 Ayateechia yarüttüin nia waneʼereeya naawalaapa suulia tü ayuuliikat. Saaʼujee yarüttüin nia, wattaluʼuinjachi kepiain. Nnojoishi kepiainjachin nia naʼaka na israelitakana.

47 »Eere tü ayuulii kanüliakat lepra sünain kuluulu jaʼitasü shiain laana jee shiale lino, 48 shiale sünain tü jiirü eʼinünakalü aka wanee kuluulu aainjuushika süka laana jee süka lino, sünain süta mürüʼlü jee sünain wanee kasa aainjuushika süka süta mürüʼlü, 49 jee shiiʼiyataale tü ayuulii kanüliakat lepra sünain tü kuluutkat sümaa wüittüin shia, mariieematüle saaʼin jee ishooitüle shia sümaa sünain shia süta mürüʼlü, sünain tü jiirü eʼinünakalü aka tü kuluutkat, yarüttüsü shia sutuma tü ayuulii kanüliakat lepra jee eeʼiyatünajatü shia nümüin chi sacerdotekai. 50 Nünaʼlajatü chi sacerdotekai tü ayuuliikat, nükataleetkalaka sümüiwaʼa tü kasa kanainkat tü ayuuliikat soʼu akaratshi kaʼi. 51 Sülatapa tü akaratshikat kaʼi, nünaʼlajatü chi sacerdotekai tia ayuuliikat. Niʼrüle wattakualüin tü ayuuliikat sünain tü kuluutkat, sünain tü jiirü eʼinünakalü aka tü kuluutkat jee shiale sünain süta mürüʼlü (jaʼitasü kasain aainjünüin süka tia sütakat mürüʼlü), shiajaʼa sünainka tü ayuulii mojusü kanüliakat lepra. Yarüttüsü tü kasa kanainkat shia. 52 Naʼajüinjatü chi sacerdotekai tü kuluutkat, tü jiirü eʼinünakalü aka wanee kuluulu aainjuushika süka laana jee süka lino sümaʼaleeya wanee kasa aainjünaka süka süta mürüʼlü kanainka tü ayuulii mojusü kanüliakat lepra, aʼajünajatü tia soʼu siki.

53 »Eekajasaʼa nünaʼrüle chi sacerdotekai tia kasakalüirua jee niʼrüle nnojoluin wattakualüin tü ayuulii kanüliakat lepra sünain tü kuluutkat, sünain tü jiirü eʼinünakalü aka tü kuluutkat jee sünain wanee kasa eekai saainjuushin süka süta mürüʼlü, 54 nuluwataajeerü chi sacerdotekai suʼlojoonüin tü kasa kanainkat tü ayuuliikat, nükataleetka shia sümüiwaʼa soʼu akaratshi kaʼi sooʼomüin. 55 Sülatapa tü akaratshikat kaʼi süchikijee suʼlojoonüin maʼin, nünaʼlajatü chi sacerdotekai tü kasa kanainkat tü ayuuliikat. Ayatüleʼeya tü yarüttüsükat mayaainjeʼe nnojoluin wattakualüin shia sünain tia kasakalüirua, yarüttüsü tü kasa kanainkat tü ayuuliikat, aʼajünajatü shia soʼu siki süka sajaʼttüin shikuuin tü kasa kanainkat shia jaʼitasü shikuule suluʼupünaa jee shiale sutoutajee.

56 »Nünaʼrüle chi sacerdotekai tü yarüttakat sünain tia kasakalüirua jee niʼrüle sümoutaain süchikijee suʼlojoonüin maʼin, naakatajatü tü kasa yarüttakat sünain tü kuluutkat, sünain tü sütakat mürüʼlü jee sünain tü jiirü eʼinünakalü aka tü kuluutkat. 57 Ayatüleʼeya shiiʼiyalaain tü yarüttüsükat sünain wane saʼata tü kuluutkat jee sünain tü jiirü eʼinünakalü aka tü kuluutkat jee shialejeʼeya sünain wanee kasa aainjuushika süka süta mürüʼlü, shiajaʼa süka wattakualüin shia. Aʼajünajatü tia kasakalüirua soʼu siki. 58 Eekajasaʼa nnojoluitpale tü kasa yarüttüsükat sünain tü kuluutkat, sünain tü jiirü eʼinünakalü aka tü kuluutkat jee sünain wanee kasa aainjünaka süka süta mürüʼlü, tü püshijaakat paala, püshijaainjatü joo shia süchikuaʼaya, wuleetkalaka shia.

59 »Tia shia tü aluwataanakalü anain shiiʼiyalaale tü ayuulii kanüliakat lepra sünain wanee kuluulu aainjuushika süka laana jee shiale süka lino, shiiʼiyalaalejeʼeya sünain tü jiirü eʼinünakalü aka tü kuluutkat jee sünain wanee kasa aainjünakat süka süta mürüʼlü, nüküjeerü chi sacerdotekai wulere jee yarüttüle tia kasakalüirua».