Tü nüshajalakat Mateo
8 Nüshakatapa Jesús uuchoʼujee watta saalii wayuu oʼunaka nümaa. 2 Nürütkaaka nünainmüin Jesús wanee wayuu kanainshi tü ayuulii kanüliakat «lepra».* Nüsapainkakaʼa nia nümülatuʼu Jesús sünain maa: «Señotkalee, tatüjaa aaʼu aneechin taya putuma müleka pücheküle süchiki». 3 Niyurutka Jesús nütüna nünainmüin jee nipettaka nia sünain maa: «Tacheküin süpüleerua paawalaainjachin». Anamaataka chia wayuukai. 4 Nümakaʼa Jesús nümüin: «Püküjaʼalayaai süchiki tüü sümüin wayuu. Anashi puʼunule nümaʼanamüin chi sacerdotekai otta piʼikajaa tü asülajünajatkat nümüin Maleiwa naashin Moisés süpüla sütüjaanajatüin saaʼu anaichipain pia».
5 Nüntapa Jesús suluʼumüin tü mmakat Capernaúm arütkaashi wanee sülaülashi surulaat nünainmüin, nuchuntaka kaalinwaa nümüin Jesús. 6 Nümaka nümüin: «Señotkalee, isaa neʼe chi tachepchiakai, müliasü maʼin naaʼin sutuma wanee ayuulii, juʼletüshi neʼe miichipaʼa sutuma». 7 Nusoutaka Jesús nümüin: «Aneechi nia tatuma tantapa chamüin». 8 Nümakalaka chi sülaülakai surulaat nümüin Jesús: «Señotkalee, wayuʼulaa neʼe taya süpüla püntüinjachin tepialuʼumüin. Anasü püküjale naawalaajeechin chi tachepchiakai, aneechika nia. 9 Jamüshijaʼa tayakai, taaʼinrawalin tü aluwataanakalü anain taya natuma na laülaakana tapüleerua otta taluwataain joo na surulaat laülaakana aaʼu taya. Jamüshijaʼa tamüle nümüin wanee, ‹anashi puʼunule sünain tü makat yaa›, oʼunamaatüshi nia, ‹jalaichi› tamüle nümüin chi wane, antamaatüshi nia otta ‹anashi paaʼinrüle tüü›, tamüle nümüin chi tachepchiakai, naaʼinramaatüin shia». 10 Ponusü maʼin naaʼin Jesús tü nümakat chia wayuukai jee nümaka namüin na nümaajanakana: «Shiimain tü tamakat jümüin, nnojoishi teʼrüichin wane wayuu yaa Israel eekai kanoulain maʼin maʼaka naaʼin wayuukai chii. 11 Tamüshii paala jia, wainmeena na wayuu anteenakana wüinpüjee otta wopujee, aikalaajeena naya sünain ekawaa* nümaa Abrahán, Isaac otta Jacob nuluwataapeena Maleiwa chejee iipünaajee. 12 Eekajasaʼa na wayuu ounejaanakana paala nutuma Maleiwa süpüla aluwatawaa chaa iipünaa, meena nojutunakai aaʼin anooipaʼamüin saʼaka piʼyuushi. Cheena aʼyalajüin naya sümaa kepisaneerüin nai». 13 Nümaka Jesús nümüin chi sülaülashikai surulaat: «Anashi puʼunule pipialuʼumüin, anasü shikeraajüle tü puchuntakat saaʼujee wayuuin kanoulashi maʼin pia». Naawalaakalaka chi nüchepchiakai wanaa sümaa tia.
14 Nüntapa Jesús nipialuʼumüin Pedro, niʼrüin tü nimeshikat Pedro juʼletüin sutuma tuttaa.* 15 Naapaaka Jesús sajapü, saawalaʼalaa sümaka, sütamaakalaka sünain aʼlakajawaa niyaaluʼu. 16 Motsouupa, antinnüsü nümüin Jesús wayuu eekai kaleʼeruʼusüin yolujaa otta niyuʼluin Jesús tü yolujaakat süleʼeruʼujee. Naawaleʼerüin na wayuu müliakana sutuma ayuulii. 17 Naaʼinrüin tia süpüla shikeraajüin tü pütchi nüküjakat paala Isaías chi nünüikimaajachikai Maleiwa, tü makat mayaa: «Naawaleʼerüin tü ayuuliikat woulia otta nüsünneʼerüin woulia tü müliakalü atuma waaʼin».
18 Pasanainka neʼe Jesús sünain wayuu, «anashii walatüle waneemüin saʼata wüinkat», nümaka namüin na nikirajüinkana. 19 Nürütkaaka nünainmüin Jesús wanee wayuu napüshi na karaloʼutamaajanakana, nümaka nümüin: «Ekirajüikalee, oʼuneechi taya pümaa eepünaale puʼunuin». 20 Nusoutaka Jesús nümüin: «Tü walitkat kepiasü suluʼu koʼushii, akaʼaya tü wüchiikat kepiasü. Akaisaʼa chi Süchonkai Wayuu* nnojoishi jalainjachin nia eisalaain». 21 Nümaka wanee nikirajüin Jesús nümüin: «Señotkalee, paawala paala taya, teʼikeein palajana chi tashikai». 22 Nümaka Jesús nümüin: «Anashi tamaataraire pia otta puuʼulaa neʼikünaiwa na outushiikana natuma na outakana wanaa namaa».
23 Nuʼunakalaka Jesús suluʼu wanee anuwa namaa na nikirajüinkana. 24 Sukumajaʼalaa sümakalaka wanee wawai shiroku tü palaakat, miyoʼu maʼin sümüna* palaa sutuma. Atunkapejeʼe Jesús soʼunnaa tia. 25 Nüchijinnaka natuma na nikirajüinkana sünain namüin nümüin: «Señotkalee jalia waya, outushiitaa waya». 26 Nusoutakalaka Jesús namüin: «Manoulakanache maʼin jia, ¿jamüshii mmotkaʼa jia?». Nütamaaka, nüchiaaka tü wawaikat otta tü palaakat, jimatuuika shia süchikijee tia. 27 Namajiraaka na nikirajüinkana: «¿Jaraikai wayuukai chii, jüüjüükai amüin wawai otta palaa?».
28 Nüntapa Jesús waneemüin saʼata tü wüinkat noumainpaʼamüin na kanüliakana gadarenos, apanapünüshi nia natuma piamashii wayuu kaleʼeruʼujashii yolujaa, amuuyuupaʼajeejana naya. Jashichija maʼin naya wayuukana, mmotsüjeseʼe wayuu seema alataa suluʼupünaa tia wopukot. 29 Naʼwoolojooko sünain maa: «¿Kasajana waya pümüin pia Nüchonkai Maleiwa? ¿Süsalainjanache waya putuma waainjala süpülapünaa tü kaʼi eʼitaaushikat wapüla?». 30 Shiasaʼa mamüin aka tüsa eejatü watta saalii püülükü ekajaʼalaain. 31 Sümakalaka tü yolujaakalüirua sümaa suchuntashaatain nümüin: «Piyuʼlajanale waya naleʼeruʼujee nala wayuukana, anashii püjütüle waya süleʼeruʼumüin tüsa püülükükalüirua». 32 Anuujeseʼe nünüiki Jesús namüin: «Juʼuna jümaala», sujuʼinuwaakalaka naleʼeruʼujee na wayuukana jee shikeronuwaaka süleʼeruʼumüin tü püülükükalüirua. Sujunuujaayaa sümaka tü püülükükalüirua shirokumüin tü palaakat, palaasitka shia. 33 Napantajaaya namaka na aaʼinmajüliikana tü püülükükalüirua. Nantapaaka chaa pueulopaʼamüin jee naküjain süchiki süpüshuaʼaleʼeya tü alatakat, jaʼitakajeʼe tü alatakat namüin na wayuu kaleʼeruʼushiikana yolujaa. 34 Sukoʼulayaa sümaka wayuu pueulopaʼajee eemüin Jesús. Shiasaʼa nantapa chaa eejachire nia, nachuntaka nümüin nuʼunajachin noumainpaʼajee.