Jueces

16 Nuʼunakalaka Sansón suluʼumüin tü mmakat Gaza. Eejatkalaka nüpüla wanee jiet maaʼinsat jee nikerotokoloko shipialuʼumüin. 2 «Aniisa Sansón», nümakalaka wanee wayuu namüin na chajanakana Gaza. Noutkajaakalaka tü pueulokot, siraasü aikat naaʼu soʼuluʼu tü pueulokot sünain outkajaa nüpüla Sansón. «Woʼuteechi aaʼin nia niweetaiwaʼaya chi kaʼikai», namakalaka naya wayuukana suluʼu naaʼin.

3 Nüchijiraakalaka Sansón süseʼeruʼu aikat. Nutuʼujaakalaka supuettoʼuse tü pueulokot sümaʼaleeya tü süsaʼakat otta tü kachueera eejatkat sünain. Nunuloʼukalaka shia süraloʼumüin wanee uuchi, tü chakat shiʼipoʼujee tü mmakat Hebrón.

4 Müliakalaka Sansón shiiʼiree wanee wayuu kanüliasü Dalila. Kepiasü shia süʼütpünaa wanee luwopu kanüliasü Sorec. 5 Nantaka na aluwataakana naaʼu na filisteokana sümaʼanamüin Dalila jee namakalaka sümüin: «Pimeeja Sansón nüküjeetkalaka kasain katchin atuma nia, watüjaweetka saaʼu tü waaʼinrajatkat süpüla wakanajüin nia. Wejiʼttaajeechika nia otta joojeechika nia wapüla. Waapeerü pümüin waneʼewai wakua 1.100 nneerü aainjuushika süka pülaata», namakalaka sümüin.

6 Anuujeseʼe sünüiki Dalila nümüin Sansón: «Püküja maa tamüin kasain katchin maʼin atuma pia otta kasain pijiʼttaanajachin aka süpüla pükanajuuinjachin». 7 «Amatchinjaajeechi taya tejiʼttaanüle süka süsüla mürüt nnojoyütkalia josoin, wanaaweetkalaka tatsüin sümaa wayuu», nümakalaka Sansón sümüin. 8 Nayasaʼa na aluwataakana naaʼu na filisteokana, neʼikajaain sümüin Dalila akaratshisü süsüla mürüt nnojoyütkalia josoin, shijiʼttaakalaka Sansón süka. 9 Nounjulaakalaka naya wayuukana suluʼu wanee kuatta süpüla nataʼülajachin Sansón. «Sansón, anaainnapa na filisteokana», sümakalaka Dalila sümaa emetuluin sünüiki. Niʼyoujeʼerakalaka Sansón süsüla tü mürüt ejiʼttaanakalü aka nia maʼaka shiʼyoujaain sutuma suwarala siki wanee jiitpai eekai saainjuushin süka lino. Nnojotkalaka atüjaanüin saaʼu kasain katchin atuma Sansón.

10 «Nnojotsü taya alin püpüla, nnojotsü taya ashaitajaain pümaa. Püküja maa tamüin kasain pijiʼttaanajachin aka süpüla pütaʼünajachin», sümakalaka Dalila nümüin Sansón. 11 «Amatsüinjaweechi taya tejiʼttaanüle süka jiiku eekai jeketüin, tü nnojoyütkalia shiʼyataain aka wayuu, wanaaweetkalaka tatchin sümaa wayuu», nümakalaka Sansón sümüin Dalila. 12 Shijiʼttaainjeseʼe Sansón süka jiiku jeketü, «Sansón, anaainnapa na filisteokana», sümakalaka Dalila sümaa emetuluin sünüiki. Niʼyoujeʼerakalaka Sansón tü jiiku ejiʼttaanakalü aka nia, maaʼatsü niʼyoujeʼerakai saaʼin wanee jiitpai. Ayatapejeʼe ounjulaain na filisteokana suluʼu wanee kuatta süpüla nataʼülajachin Sansón.

13 Anuujeseʼe sünüiki Dalila nümüin Sansón: «Ayatüsia paʼalainpalain taya. Püküja maa tamüin kasain pijiʼttaanajachin aka süpüla pütaʼünajachin». Anuukalaka nünüiki Sansón shiʼipajee: «Pijiʼttaa tü akaratshisükat taʼwala atürensajuushikat süka tü jiitpai aʼaniakat». 14 Süchikijee süchechejüin tü nuʼwalakat süka tü achechejiakat jiitpai, suʼwaatakalaka nümüin sünain maa: «Sansón, anaainnapa na filisteokana», nüchijiraapünaaka jee niyuluʼutaka tü achechejiakat sümaʼaleeya tü jiitpaikat.

15 Anuujeseʼe sünüiki Dalila nümüin: «‹Aisü pia tapüla›, mayaashi neʼe pia tamüin sümaa nnojoluin püküjain tamüin tü shiimainkat. Apünüintuairü taya paʼalainpalain otta nnojotsü püküjeein tamüin kasain katchin atuma pia». 16 Shapaakalaka naaʼin Sansón sutuma süpüleeruain naaʼin waneepia Dalila. Isakalaka nüchiki nüchecherüin naaʼin, müshijeseʼe outeein nia. 17 Nüküjakalaka Sansón tü shiimainkat sümüin Dalila sünain maa: «Nnojotyülia aüjünüin taʼwala süka nüneekatüjülin taya Maleiwa süpüla nazareoinjachin taya süpülapünaa jemelin taya. Amatsüinjaajeechi taya süüjünüle taʼwala, wanaaweetkalaka tatchin sümaa wayuu».

18 Seenajiramaatakalaka Dalila na aluwataakana naaʼu na filisteokana, shiyaawatapa saaʼu nüküjain Sansón tü shiimainkat sümüin. «Jalainna jümaala, nüküjaitpa tamüin tü shiimainkat», sümakalaka Dalila namüin. Antüshiijeseʼe naya sümaʼanamüin sümaa neʼikajaain tü nneerü naküjakalü achiki paala sümüin. 19 Sutunkirapa Sansón saaʼu süpüʼü, seenajiraka wanee wayuu achotooinjachika tü akaratshikat nuʼwala atürensajuushikat. Süchotoonopa nuʼwala Sansón maʼlainreesai nia süpüla Dalila, jama matchinchipain nia. 20 «Sansón, anaainnapa na filisteokana», sümakalaka Dalila sümaa emetuluin sünüiki. Nüchijiraakalaka Sansón jee nümakalaka suluʼu naaʼin: «Nnojoleechi taya jamajüin atumawaa maʼaka nnojolin taya jamajapuʼuin atumawaa». Nnojotpejeʼe nütüjaain saaʼu Sansón niyüülajüin nia Jehová. 21 Nataʼülakalaka nia na filisteokana, nayuʼlaka noʼu jee namaashi nia Gazamüin. Kaleenaluʼushi nia natuma jee nüʼleeyajinnaka wanee ipa miyoʼu asirujia chaa suluʼu tü kaatsetkat. 22 Shimiyoʼulaaka süchikuaʼa nuʼwala Sansón süchikijee süüjünüin paala.

23 Noutkajaaka na aluwataakana naaʼu na filisteokana süpüla noʼutuinjatüin saaʼin mürüt jee naʼajüinjatüin shia nümüin chi namaleiwase kanüliakai Dagón. Naainjirüin tia shikiira nakanajüin. Anuukalaka nanüiki: «Aapüna ekiichi wamüin Sansón, chi waʼünüükai, nia aapaka nikii wamüin chi wamaleiwasekai». 24 Naʼwaajakalaka namaleiwase neʼraiwaʼaya nia.* «Aapüna ekiichi chi waʼünüükai nutuma chi wamaleiwasekai, ajaʼttataairüjeʼe woumain nutuma otta watta naalii na wapüshi nuʼutakana aaʼin», namakalaka na filisteokana.

25 Anuujeseʼe nanüiki na filisteokana sutuma talatüin maʼin naaʼin: «Jüsaaja jümaala Sansón wasirajaiwa nüka». Antinnüshijeseʼe Sansón namüin jee nüshaʼwaleʼennaka pasanain sünain süsaʼa tü miichikat. 26 Anuukalaka nünüiki Sansón nümüin chi jintüi ajattakai nia: «Piʼikajaa maa taya eemüin süsaʼa tü miichikat, tapüjüʼüyeetka shia». 27 Eejana suluʼu tü miichikat watta naalii tooloyuu jee jieyuu, eejanaʼaya napüshuaʼa na aluwataakana naaʼu na filisteokana. Eejana saaʼu tü miichikat maʼaka 3.000 tooloyuu jee jieyuu asirajakana nüka Sansón.

28 Nuchuntakalaka maʼin Sansón nümüin Jehová sünain maa: «Señotkalee Jehová, pia laülaashikai saaʼu kasa süpüshuaʼa, nnojo motuin taya paaʼin. Maleiwakalee, katchin taya putuma uwatuayaakaijeʼe neʼe. Anashi pasalaale taya putuma naaʼu waneeshiyaakaijeʼe toʼu».

29 Niʼitaakalaka Sansón najapü sünain tü piamasükat süsaʼa miichi, tü pasanainjatkat. Niʼitaain tü najapü nikiakat sünain süsaʼa tü miichikat jee tü nipeʼekat niʼitaain shia sünain tü wane süsaʼakat. 30 «Puuʼulaa outaiwa taya namaa na filisteokana», nümakalaka Sansón sümaa nuʼwaatüin. Nujutakalaka süchiki süsaʼa tü miichikat süka süpüshuaʼa nütchin, sujuttaka tü miichikat naaʼu na aluwataakana naaʼu na filisteokana otta naaʼu na wayuu yalajanakana jutkatüin. Alanaʼaleeshiʼiya na wayuu nuʼutakana aaʼin Sansón wanaa sümaa outuin nia noulialeʼeya na nuʼutakana aaʼin kataiwaʼaya noʼu.

31 Nantakalaka na nuwalayuukana Sansón namaʼaleeya nüpüshi chi nüshikai sünain asaajaa müliashii. Nalüʼüjakalaka nia sümaa neʼiküin nia suluʼu naamaka Manóah, chi nüshikai, tü chakat pasanain sünain tü mmakat Zorá otta Estaol. Nekiipüʼüshi Sansón na israelitakana soʼunnaa piama shikii juya.