Chiiruaajatka karaloʼuta Samuel

14 Naapaka süchiki Joab niʼreein maʼin David Absalón. 2 Nüsajiraka Joab wanee wayuu suluʼujee tü mmakat Tecoa, kekiisü tia wayuukat jee nümakalaka sümüin: «Mayaainjatü pia maʼaka saaʼin wanee wayuu eekai kaamakain, luutainjatü püsheʼin jee nnojoluinjatü pushulerüin seita pünain. Jaʼyainjatü paaʼu kakaliairüin piʼyalajüin saalinjee kaamakain pia. 3 Puʼuneetka nümaʼanamüin David, chi laülaashikai, püküjeetka nümüin tü taküjainjatkat pümüin». Nüküjainjeseʼe Joab sümüin tia wayuukat tü süküjainjatkat nümüin David.

4 Süntakalaka tü wayuu chejeʼewatkat Tecoa nümaʼanamüin David, süsapainkaka shia nümülatuʼu sümaa sejepülaain. «Pümüliaja taya laülaashikalee», sümakalaka nümüin. 5 Anuukalaka nünüiki chi laülaashikai sümüin: «¿Kasa alataka pümüin?». Anuujeseʼe sünüiki tia wayuukat nümüin: «Müliasü maʼin taaʼin, outushi chi taʼwayuusekai. 6 Piamapuʼu tachonnii shiasaʼa soʼu wanee kaʼi, wanaa sümaa chajanain naya wünaʼapü atkaajiraashii naya, nuʼutunaka aaʼin wanee tachon nutuma chi wane, jama nnojoluin eejatüin wayuu akatajiraaka naya. 7 Jashichishii tamüin na tapüshikana, anuu nanüiki tamüin: ‹Paapa wamüin nikii chi püchon oʼutakai naaʼin chi nuwalakai, jaʼitashi niain chi waneeshikai püchon apütaakai püpüla›.* Eetaayaai jaraleechin apütaain tapüla noʼutule naaʼin chi tachonkai, nnojoleechi jaralin sotuin aaʼin chi taʼwayuusekai jee nnojoleechi kaikeyuuin nia».

8 Anuujeseʼe nünüiki chi laülaashikai sümüin tü wayuukat: «Anasü puʼunule pipialuʼumüin, takumajireerü sukuwaʼipa tia». 9 Anuujeseʼe sünüiki tü wayuu chejeʼewatkat Tecoa nümüin chi laülaashikai: «Señotkalee, kasataalejeseʼe tayain achekajünüin amüin naainjala chi tachonkai otta namüin nüpüshi chi tashikai, nnojotpejeʼe achekajünajatüin pümüin tia jee nnojotsiaʼaya achekajünajatüin tia namüin na püchooinkana». 10 Anuukalaka nünüiki chi laülaashikai sümüin: «Jamüle nünüiki pümüin wanee wayuu, püntireechi yaamüin, nnojoleetka nikeʼejüin paaʼin piantua». 11 Anuukalaka sünüiki tia wayuukat nümüin: «Laülaashikalee, soto paaʼin Jehová, chi Pümaleiwasekai suulialeʼeya sükooʼomüinraain tü müliaa teʼreetkat nuʼutunule aaʼin chi tachonkai nutuma chi wayuu pasalaainjachikai».* Anuujeseʼe nünüiki sümüin: «Shiimain maʼin tanüiki pümüin nuʼupala Jehová, chi Maleiwa matüjainkai outaa, nnojoleechi jamajüin atumawaa* chi püchonkai». 12 Anuukalaka sünüiki tü wayuukat nümüin: «Eesüleʼe wanee kasa taküjeeka pümüin laülaashikalee». «¿Kasa wayu tia?», nümakalaka sümüin.

13 Anuujeseʼe sünüiki tü wayuukat nümüin: «¿Jamakaʼa makaʼa paainjala namüin na nüpüshikana Maleiwa? Kaainjalashijaʼamata pia sükajee tü pümüitpakat, jama piyoutuin süchiki nüleʼejüinjachin nüchikuaʼa chi püchonkai. 14 Outusü wayuu süpüshuaʼa, müshii waya maʼaka saaʼin wanee wüin eekai shiʼyotunüin mmoluʼu nnojotka süpüla sülaʼanüin süchikuaʼa. Nnojotsü nuʼutuin aaʼin Maleiwa wayuu süpaʼa mma, jülüjaitpa naaʼin Maleiwa jamüin nnojotka anain wattaluʼule nuulia chi wayuu aʼluwataakai suluʼumüin wanee mma. 15 Antüsiaʼaya taya pümaʼanamüin laülaashikalee süpüla taküjain pümüin süchiki tia süka shiimolojuin taya wayuu. Anuu tanüiki namüin: ‹Anasü juuʼulaale toʼunuin nümaʼanamüin chi laülaashikai süpüla yootuinjatüin taya nümaa. Eesüjaʼa nükaalinjeerüle taya. 16 Eesüjaʼa kachipünaajeerüle naaʼin tanüiki chi laülaashikai jee nükaalinjeerüle taya nuulia chi wayuu oʼuteekai taaʼin jee oʼuteekai naaʼin chi waneeshikai tachon. Eeshiijaʼa nükaalinjeenale waya suulia süsütünüin woulia tü mma nüsülajalakat wamüin Maleiwa›. 17 ‹Kasataalejeseʼe anain taaʼin sutuma nünüiki chi laülaashikai›, maa müsü taaʼin. Laülaashikalee, piyaawata aaʼu wanee kasa eekai anain suulia wanee kasa eekai mojuin maʼaka naaʼinrüin shia wanee aapiee nümaʼanajeejachikai chi shiimainshikai suluʼu Maleiwain. Kasataalejeseʼe eein pümaa Jehová chi Pümaleiwasekai».

18 Anuujeseʼe nünüiki David sümüin tü wayuukot: «Tasakireein pia sünain wanee kasa, püküjainjatpejeʼe tamüin tü shiimainkat». «Anakajaʼa, laülaashikalee», sümakalaka nümüin. 19 Anuujeseʼe nünüiki sümüin: «¿Niainjaʼa Joab kajünalain pia tanainmüin?». Anuukalaka sünüiki tü wayuukat nümüin: «Niaichijaʼaya Joab, laülaashikalee. Shiimain tü tamakat pümüin, nüküjain Joab tamüin tü taaʼinrüinjatkat jee tü taküjainjatkat pümüin. 20 Naaʼinrüin tia Joab, chi püchepchiakai süpüla waneejatüin tü jülüjakat paaʼin süchiki tü alatakat. Wayuupejeʼe kekiishi pia señotkalee maʼaka kekiin wanee aapiee nümaʼanajeejachikai chi shiimainshikai suluʼu Maleiwain jee pütüjaa aaʼu süpüshuaʼa tü kasa alatakat suluʼu mmakat tüü».

21 Anuukalaka nünüiki chi laülaashikai nümüin Joab: «Taaʼinreerü süpüshuaʼa tü puchuntaka tamüin, anashi püntirüle Absalón». 22 Nüsapainkaka Joab nümülatuʼu David sümaa nejepülaain, naapüinña analuʼutkat nümüin. Anuujeseʼe nünüiki Joab nümüin: «Tatüjaaitpa aaʼu señotkalee talatüin pia tamaa müsüjeseʼe paaʼinrüin tü tachuntakat pümüin». 23 Nuʼunakalaka Joab suluʼumüin tü mmakat Guesur sünain asaajaa Absalón, nüntiraka nia Jerusalénmüin. 24 Anuukalaka nünüiki chi laülaashikai: «Püma nümüin Absalón nuʼunaiwa nipialuʼumüin, nnojoipejeʼe antajachin nia sünain anaʼlawaa tamüin». Nuʼunakalaka Absalón nipialuʼumüin, nnojoipejeʼe nia antüin sünain anaʼlawaa nümüin chi laülaashikai.

25 Anashi aaʼinchi Absalón, nnojoishi eejachin wanee wayuu makai aka naaʼin suluʼu tü mmakat Israel. Nnojotsü eein wanee kasa mojukat sünain nütapaʼa. 26 Niyoteʼerawalin Absalón tü nuʼwalakat sajaʼttiamüin tü juyakat süka jawatüin shia nümüin, eesü maʼaka saaʼin 2,3 kilo* saawain tü nuʼwalakat shipesajünapa süka tü pesa* epesajünawaikalü aka wanee kasa nipialuʼu chi laülaashikai. 27 Apünüinshii tooloyuu nüchooin Absalón, waneesia neʼe tü neiyetsekat, Tamar sünülia, anasüchon maʼin shia.

28 Sülataka piama juya süchikijee nüntüin Absalón Jerusalénmüin, nnojoishi nia oʼunuin sünain anaʼlawaa nümüin chi laülaashikai. 29 Neenajinnaka Joab nutuma Absalón süpüla nuluwataainjachin nia nümaʼanamüin chi laülaashikai, nnojoipejeʼe jaa müin Joab nümüin. Neenajitkalaka nia nüchikuaʼa, ayatapejeʼe nnojoluin jaa müin nia nümüin. 30 Anuujeseʼe nünüiki Absalón namüin na nüchepchiakana: «Paʼataasü tü tayüüjainkat sümaa tü niyüüjainkat Joab, kaʼttiashisa nia cebada suluʼu, jaʼajapan». Saʼajünakalaka niyüüjase Joab natuma na nüchepchiakana Absalón. 31 Nüntakalaka Joab nümaʼanamüin Absalón jee nümakalaka nümüin: «¿Jamüsü naʼajaka tayüüjase na püchepchiakana?». 32 Anuukalaka nünüiki Absalón nümüin Joab: «Teenajirüin pia, nnojoipejeʼe jaa pümüin tamüin. Taluwataainjachiaa pia nümaʼanamüin chi laülaashikai süpüla püküjainjatüin nümüin wanee pütchi sünain maa: ‹¿Jamüshi tasaajinnakaʼa suluʼujee tü mmakat Guesur? Oʼulaanüshije taya chaʼaya. Teʼree amüinchi pia laülaashikalee, eereje wanee kasa eekai taainjalain puʼutira pümata taaʼin›».

33 Nüntakalaka Joab nümaʼanamüin chi laülaashikai jee nüküjakalaka nümüin tü nümakat Absalón. Neenajinnakalaka Absalón nutuma chi laülaashikai, nüsapainkaka nia nümülatuʼu sümaa nejepülaain, sutunnaka nuwalapaʼa Absalón nutuma chi laülaashikai.