Génesis

4 Nüinkaakalaka Adán sümaa Eva, tü nuʼwayuusekat jee ipuotkalaka shia. «Kachonsü taya süka nükaalinjain taya Jehová», sümakalaka jemeyutpa shia nümaa Caín. 2 Jemeyutkalaka Eva süchikuaʼa mapa, niakalaka süchooin Abel, nimüliaichi Caín chia.

Wayuu arüleejüi anneerü Abel, niaka apünajülin Caín. 3 Shiasaʼa mapa, nüsülajakalaka Caín nümüin Jehová süpüshi tü nüpünajüinkat. 4 Eekajasaʼa Abel naapüin nümüin Maleiwa waneirua shiʼiruma naʼanneetse, nuʼutaka saaʼin jee naapaka shia sümaʼaleeya tü saüsükat. Talataka naaʼin Jehová nümaa Abel sümaʼaleeya tü kasa nüsülajakat nümüin. 5 Nnojoipejeʼe talatüin Maleiwa nümaa Caín jee sümaa tü kasa nüsülajakat. Naashichijaaka Caín suluʼujee tia jee aikalaka shia nümüin. 6 Anuukalaka nünüiki Jehová nümüin Caín: «¿Jamüshikai jashichikaʼa pia saaʼujee tia jee jamüsü aikaʼa shia pümüin? 7 Punoutule pukuwaʼipa jee shiale paaʼinrüin kasa eekai anain, talateechi taya pümaa. Nnojorüle punoutuin pukuwaʼipa jee nnojorüle paaʼinrüin kasa anasü, kaainjaleechi pia. Müsüsa suukajakai aaʼin püpüla süpüla süʼlaülaajaain paaʼu. ¿Puunteetche püchecherüin paaʼin suulia kaainjalaa?».

8 Nuunejaanaka mapa Abel nutuma Caín chi nuwalakai. «Jooʼuya wünaʼapümüin», nümakalaka nümüin. Chapa naya wünaʼapü, nuwataaka Caín nooʼomüin chi nimüliakai jee nuʼutaka naaʼin. 9 Nüsakinnaka mapa Caín nutuma Jehová: «¿Jalashisaʼa Abel chi pimüliakai?». «Waaʼinjaʼa. ¿Nüpüʼüyache joo taya chi temüliakai?», nümakalaka nümüin Maleiwa. 10 Anuujeseʼe nünüiki Maleiwa nümüin Caín: «¿Jamüsükai makaʼa paainjala? ¿Paapayaainchejeʼe?, müsü suʼwaatakai aaʼin tamüin nüsha chi pimüliakai mmapüjee. 11 Tajünajaainsa müinmaʼa pia. Puʼuna suluʼujee mmakat tüü, jama süsüitpain nüsha chi pimüliakai tü amülakat putuma. 12 Nnojoleerü kachooin tü püʼttiakat, ounjulaakuʼu meechi pia jee yalejewaain meechi pia sünain oʼonowaa süpaʼapünaa tü mmakat». 13 Anuukalaka nünüiki Caín nümüin Jehová: «Kapüleesü maʼin tü püküjakalü achiki tamüin saaʼujee kaainjalain taya, mülieechi maʼin taya. 14 Anii joo taya püjünajaain suluʼujee mmakat tüü jee nnojoleechi piʼrüin taya. Ounjulaakuʼu meechi taya jee unataain meechi taya süpaʼapünaa tü mmakat. Suʼuteechi aaʼin taya wayuu wanaale taya sümaa». 15 Anuujeseʼe nünüiki Jehová nümüin: «Akaratshituainjatü kasalajanain nümüin wanee wayuu eekai nuʼutuin paaʼin».

Nüpansaajaka Jehová tia süpüla shiyaawatüin wayuu nnojolinjachin nuʼutunuin aaʼin Caín nutuma wanee wayuu eekai wanaain nümaa. 16 Nuʼunakalaka Caín nümaʼanajee Jehová eemüin tü mma kanüliakat Nod,* wüinpümüinsü tia saaʼujee Edén.

17 Nüinkaakalaka Caín sümaa tü nuʼwayuusekat, ipuotkalaka shia jee shiʼitaanakalaka Enoc nünülia chi nachonkai. Nukumajaka mapa Caín wanee pueulo, niʼitaakalaka nünülia chi nüchonkai sünain tia pueulokot, Enoc sünülia. 18 Mapa maʼin, niashi Enoc nüshikai Irad, Irad nüshi Mehujael, Mehujael nüshi Metusael otta müshia Metusael nüshi Lamec.

19 Piamasü nuʼwayuuse Lamec, Adá sünülia tü palajatkat jee Zilá sünülia tü shipiamüinkat. 20 Niakalaka Jabal süchooin Adá, nia eʼitaaka shikii süpüleerua wayuu kepiayaainjatüin shia loona jee kamüʼlüinjatüin shia. 21 Jubal nünülia chi nimüliakai, nia eʼitaaka süpüleerua wayuu shiʼyalajirüinjatüin tü kanüliakalü «arpa» jee tü kanüliakat «flauta». 22 Niakalaka süchooin Zilá Tubal-Caín, aʼyataashi nia sünain akumajaa kasa süka cobre jee süka kachueera. Naamá sünülia tü nuwalakat Tubal-Caín. 23 Anuukalaka nünüiki Lamec sümüin tü piamasükat nuʼwayuuse, sümüin Adá jee sümüin Zilá:

wayuu jimaʼai chi aʼyaatakai taya.

25 Nüinkaakalaka Adán sümaa tü nuʼwayuusekat kachonkalaka shia nümüin, Set nünülia sutuma süka müin sünüiki: «Kooʼuliwoʼusü taya nutuma Maleiwa süpüla niiʼirakainjachin nia Abel süka nuʼutunüin aaʼin nutuma Caín». 26 Kachonkalaka Set sümüin tü nuʼwayuusekat, Enós nünülia chi nachonkai. Nachuntaka na wayuukana nünülia Jehová soʼujee tia.