Génesis

10 Anuu tü nüchikimaajatkat Sem, Cam otta müshia Jafet, na nüchonniikana Noé.

Kachonshii naya süchikijee tü Juya Miyoʼukat maʼin. 2 Niakalaka nüchooin Jafet Gómer, Magog, Madái, Javán, Tubal, Mesec jee müshia Tirás.

3 Niakalaka nüchooin Gómer Askenaz, Rifat jee müshia Togarmá.

4 Niakalaka nüchooin Javán Elisá, Tarsis, Kitim jee müshia Dodanim.

5 Kepiashii nachonnii naya wayuukana suluʼu mma pasanainka sünain palaa, naatayaa müsü tü nanüikikat, kottushii naya sümaa napüshi jee koumainñaa müshii naya.

6 Niakalaka nüchoin Cam Cus, Mizraim, Put jee müshia Canaán.

7 Niakalaka nüchoin Cus Sebá, Havilá, Sabtá, Raamá jee müshia Sabtecá.

Niakalaka nüchoin Raamá Seba jee müshia Dedán.

8 Eejachiaʼaya wanee nüchon Cus kanüliakai Nemrod, nia kojutukaʼaya sümüin wayuu palajana. 9 Atüjashi maʼin olojoo Nemrod sümaa niʼrülin wayumüin nümüin Jehová. «Müshi nia maʼaka naaʼin Nemrod, chi atüjakai olojoo sümaa niʼrülin wayumüin nümüin Jehová», müsüjeseʼe sümawalin wayuu. 10 Chajachi nia aluwataain suluʼu tü mma kanüliakat Sinar, shia nuluwataaka aaʼu palajana Babel, Erec, Akkad jee müsia Calné. 11 Nuʼunaka Nemrod suluʼujee tü mmakat Sinar suluʼumüin tü mma kanüliakalü Asiria, nukumajaka Nínive, Rehobot-Ir, Cálah 12 jee müsia Resen, pasanainsü tia sünain Nínive jee sünain Cálah, miyoʼu tia pueulokot saaʼujee kottiraain tia apünüinsükat.

13 Niakalaka nüchoin Mizraim Ludim, Anamim, Lehabim, Naftuhim, 14 Patrusim, Caftorim jee müshia Casluhim, nia natuushika na wayuu kanüliakana filisteo.

15 Niakalaka nüchoin Canaán Sidón, chi niʼirumakai nümaʼaleeya Het. 16 Nüikeyuu Canaán na wayuu kanüliakana jebuseo, amorreo, guirgaseo, 17 heveo, arqueo, sineo, 18 arvadeo, zemareo jee müshiʼiya na kanüliakana hamateo. Naʼwalakalaaka mapa na nüikeyuukana Canaán. 19 Shia noumainka na nüikeyuukana Canaán tü mmakat Sidón sünainmüinreʼeya Guerar, tü chakat süʼütpaʼa Gaza jee sünainmüinreʼeya Sodoma, Gomorra, Admá jee müsia Zeboyim, tü chakat süʼütpaʼa Lasa. 20 Shia nanüliaka tia na nüchonniikana Cam, kottushii naya sümaa napüshi, koumainñaa müshii naya jee naatayaa müsü nanüikipala suluʼu tü mma kepiakalü aluʼu naya.

21 Kachonshiaʼaya Sem chi nimüliakai Jafet.* Natuushi nia na nüchooinkana Éber. 22 Nia nüchonka Sem Elam, Asur, Arpaksad, Lud otta müshia Aram.

23 Nia nüchonka Aram Uz, Hul, Guéter jee müshia Mas.

24 Niakalaka nüchoin Arpaksad Selá jee niakalaka nüchoin Selá Éber.

25 Piamashii nüchonnii Éber. Péleg nünülia chi epayaakai, jama suʼwalakalaain wayuu soʼu tia. Joctán nünülia chi nimüliakai.

26 Niakalaka nüchoin Joctán Almodad, Sélef, Hazarmávet, Jérah, 27 Hadoram, Uzal, Diclá, 28 Obal, Abimael, Seba, 29 Ofir, Havilá jee müshia Jobab. Nüchonnii Joctán naya makana.

30 Kepiashii naya wayuukana suluʼu tü mma kanüliakat Mesá sünainmüinreʼeya tü kanüliakat Sefar, uuchoʼusü tia mmakat jee wüinpümüinsü shia.

31 Shia nanüliaka tia na nüchonniikana Sem, kottushii naya sümaa napüshi, koumainñaa müshii naya jee naatayaa müsü nanüikipala suluʼu tü mma kepiakalü aluʼu naya.

32 Müsü nakuwaʼipa naikeyuu na nüchonniikana Noé, yaawashii jaraliin kachooin naya jee jaralüin noumain. Naya sutuushika tü wayuu eekat süchikijee tü Juya Miyoʼukat maʼin.