Génesis
27 Laülaakalaka maʼin Isaac, matchinsat noʼu müshijeseʼe moʼupaʼain nia. Neenajirakalaka Esaú chi nüchon epayaakai sümaa nümüin nümüin: «Tachee». «Anii taya», nümakalaka Esaú nümüin. 2 Anuukalaka nünüiki Isaac nümüin: «Laülaaichi taya, eeshi süpüla jamalaʼa tamüin. 3 Anakajaʼa paapaale tü pulojiakat, pülüʼüja türa würaichikat sümaa tü jatükat, puʼuneechikalaka wünaʼapümüin sünain olojoo wanee kasa tayaaluʼu. 4 Püʼlakajaajeechikalaka tayaaluʼu wanee eküülü eekai jemetüin maʼin, tü tekajaakalü maʼin, tekeechikalaka shia püntirapa shia tamüin. Tachunteechikalaka anaa püpüleerua süpülapünaa outuin taya».
5 Saapajapejeʼe Rebeca tü nümakalü Isaac nümüin Esaú, chi nüchonkai. Oʼunushijeseʼe Esaú wünaʼapümüin sünain olojoo. 6 Anuujeseʼe sünüiki Rebeca nümüin Jacob chi süchonkai: «Taapüitpa nünüiki chi püshikai sünain maa nümüin Esaú chi pipayakai: 7 ‹Anakajaʼa puʼunule sünain olojoo teküin, püʼlakajaweetkalaka tamüin wanee eküülü eekai jemetüin maʼin. Püntireetkalaka shia tamüin süpüla teküinjatüin shia, tachunteechikalaka anaa püpüleerua nuʼupala Jehová süpülapünaa tanaajaain›. 8 Paapaja maa tanüiki tachonchee, paaʼinrajatü tü taluwataainjachikalü anain pia. 9 Anakajaʼa püsaajüle piamasü kaaʼulachein eekai kaüsüin maʼin saʼakajee tü wamüʼlüinkat, püntireetkalaka shia tamüin, taʼlakajaainjatü wanee kasa eekai jemetüin maʼin niyaaluʼu chi püshikai, wanee eekai nikaajüin maʼin. 10 Piʼikajaweetkalaka tia nümüin chi püshikai süpüla niküinjatüin shia, nuchunteechikalaka püpüleerua wanee anaa süpülapünaa nünaajaain».
11 Anuupejeʼe nünüiki Jacob sümüin Rebeca tü niikat: «Koi atachi maʼin Esaú chi tawalakai, eekajasaʼa tayakai moi atachi. 12 ¿Jama niʼitaale najapü chi tashikai taaʼu? Mojuteechi nia tatuma suluʼujee tia, nnojoleechi nia achuntuin nümüin Maleiwa tapüleerua süpüla anainjatüin takuwaʼipa, achunteechi neʼe nia süpüla sülatajatüin kasa mojusü tamüin, mülieechikalaka taya». 13 Anuujeseʼe sünüiki tü niikat niʼipajee: «Tachonchee, anakajaʼa tayale kaliajatüin tü kasa mojusü nuchuntakat püpüleerua, paaʼinra tü taluwataakalü anain pia. Püsaaja tamüin tü kaaʼulacheinkat». 14 Nüsaajakalaka Jacob tü kaaʼulacheinkat jee nüntirakalaka shia sümüin tü niikat. Süʼlakajaakalaka wanee eküülü jemetüsü maʼin, tü eküülü nikaajakat maʼin chi nüshikai. 15 Saapaakalaka Rebeca süchikijee tia wanee nüsheʼin Esaú chi süchon epayaakai, sünaajaala paala tia shipialuʼu, saʼatüinjeseʼe tia kuluutkat nünain Jacob chi süchon emülieekai. 16 Shiʼitaakalaka Rebeca süta tü kaaʼulacheinkat saaʼu najapü Jacob jee shiʼitaain shia nunutpaʼa eere molin nünain. 17 Saapakalaka nümüin Jacob tü eküülü jemetüsü süʼlakajaainkat sümaʼaleeya tü pan saainjakat.
18 Nikerotakalaka Jacob nünainmüin chi nüshikai sümaa nümüin nümüin: «¡Tashikalee!». «Anii taya tachee, ¿jarai pia, pia Esaú piataapa Jacob?», nümakalaka chi nüshikai nümüin. 19 Anuukalaka nünüiki Jacob nümüin chi nüshikai: «Taya Esaú chi piʼirumakai, taaʼinrüitpa süpüshuaʼa tü puchuntakat tamüin, püikalaa maala pikaiwa shiʼiruku tü talojuinkat, puchunteechikalaka tapüleerua süpüla anain takuwaʼipa». 20 Nusoutaka Isaac nümüin chi nüchonkai sünain maa: «Tachee, motsoʼokatche maʼin pümaa sünain olojoo». «Tantamaata anainrü tü talojuinkat süka nükaalinjain taya Jehová chi Pümaleiwasekai», nümakalaka nümüin. 21 Anuukalaka nünüiki Isaac nümüin Jacob: «Pürütkaa tanainmüin tachee teʼitaaiwa tajapü paaʼu süpüla tatüjaain saaʼu pialejeʼeya Esaú chi tachonkai jee nnojoirejeʼeya piain». 22 Arütkaashijeseʼe Jacob nünainmüin chi nüshikai, niʼitaaka Isaac najapü naaʼu sümaa nümüin: «Ayatüsü maʼin nümüraluʼu Jacob putuma shiapejeʼe najapü Esaú tü makat». 23 Nnojoikalaka niyaawatünüin Jacob nutuma Isaac süka kolin najapü makaʼa kolin najapü Esaú chi nuwalakai. Achuntushijeseʼe nia nüpüleerua süpüla anainjatüin nukuwaʼipa.
24 Nüsakinnaka Jacob nutuma Isaac: «¿Shiimainña piain maʼin Esaú chi tachonkai?». «Aa, tayaʼayan», nümakalaka nümüin. 25 Anuukalaka nünüiki Isaac nümüin Jacob: «Tachee, pülatira tamüin tü püsitkat sünain olojoo tekaiwa shia jee tachunteechika püpüleerua süchikijee tia süpüla anain pukuwaʼipa». Naapakalaka Jacob niküin chi nüshikai jee naapaleeinña wiino nüsüin, niküinjeseʼe shia Isaac sümaa nüsüin tü wiinokot. 26 Ayatakalaka naashajaain Isaac sünain maa: «Tachee, pürütkaa maa tanainmüin sümaa putuʼluin* tawalapaʼa». 27 Nürütkaakalaka Jacob nünainmüin chi nüshikai sümaa nutuʼluin nuwalapaʼa, naataka Isaac seejuu nüsheʼin chi nüchonkai. Achuntushijeseʼe nia nüpüleerua süpüla anainjatüin nukuwaʼipa sümaa müin nünüiki:
«Tü neejuukat chi tachonkai müsü aka saaʼin seejuu tü kasa chakat wünaʼapü, tü anakalü akuwaʼipa nutuma Jehová. 28 Kasataalejeseʼe eein joojotshi puumainpaʼa nutuma chi shiimainshikai suluʼu Maleiwain, kasataalejeseʼe anain puumain süpüla apünajaa, jouluiwa süchon aʼttiee jee jouluiwa wiino eekai jeketüin aashüʼüjuushin. 29 Kasataalejeseʼe shiʼyataain pümüin wayuu jee süsapainkain wayuu maʼleekalia pümülatuʼu. Piainjachi nalaamainka na puwalayuukana jee nasapainkainjana pümülatuʼu na süchonniikana püi, kasataalejeseʼe sülatüin kasa mojusü nümüin chi wayuu achekakai püpüleerua sülatüin kasa mojusü pümüin jee kasataalejeseʼeya anain nukuwaʼipa chi wayuu achekakai anain pukuwaʼipa».
30 Kettaakalaka nünüiki Isaac süchikijee achuntaa anaa nüpüleerua Jacob, ojuʼitüshijeseʼe Jacob suluʼujee nipia chi nüshikai, wanaa maʼin sümaa tia nüntakalaka süchikijee olojoo Esaú, chi nipayakai Jacob. 31 Nüʼlakajaakalaka Esaú wanee eküülü jemetüsü maʼin, niʼikajaakalaka shia nümüin chi nüshikai sümaa nümüin nümüin: «Püikalaa tashikalee, anakajaʼa piküle shiʼiruku tü tasitkat sünain olojoo, puchunteechika anaa tapüleerua süchikijee tia». 32 «¿Jarai pia?», nümakalaka Isaac sünain asakiraa nia. Nusoutakalaka Esaú sünain maa: «Taya Esaú, chi püchon eʼirumaakai». 33 Nüpatanajaaka aaʼin Isaac sünain maa: «¿Jaraikalaka oʼunuin sünain olojoo sümaa nüntirüin shiʼiruku tü nüsitkat tamüin? Tachuntuitpa anaa nüpüleerua, nieechi anaka akuwaʼipa chia. Eküshiyüʼüiya neʼe taya süpülatuʼu püntüin».
34 Naapaiwaʼaya Esaú tü nümakat chi nüshikai nümüin, emetutsü maʼin nikiisa sümaa mojuin maʼin naaʼin, anuujeseʼe nünüiki nümüin chi nüshikai: «Puchuntaʼaya tapüleerua tashikalee». 35 Anuupejeʼe nünüiki chi nüshikai nümüin: «Yaajeeitchipa chi pimüliakai, nimeejüin taya süpüla tachuntuinjachin anaa nüpüleerua, tü tachuntajatiaakat püpüleerua piakai». 36 Anuujeseʼe nünüiki Esaú nümüin: «Shiaʼaya Jacob nümünaka, piantuaichi müin taya nutuma. Naapaain toulia tü aapünajatiaakat tamüin saaʼu eʼirumaain taya jee naapaataain toulia tü anaa puchuntajatkat tapüleeruaya». Nüsakiraka Esaú chi nüshikai sümaa müin nünüiki nümüin: «¿Nnojoireeka süpüla puchuntuinjachin tapüleerua wanee anaa?». 37 Anuujeseʼe nünüiki Isaac nümüin Esaú: «Niaichipa joo laamaka tatuma Jacob paaʼu jee müsia nüchepchiainjana na puwalayuukana. Tachuntuitpa nüpüleerua jouluinjatüin süchon aʼttiee nümaʼana jee müsia wiino jeketüka aashüʼüjuushin. Tachee, nnojotsü kasain apütaain tapüla taapüinjatka pümüin».
38 Anuujeseʼe nünüiki Esaú nümüin: «Tashikalee, ¿nnojoikalaka süpüla puchuntuin anaa tapüleerua? Puchuntaʼaya anaa tapüleerua». Niʼyalajakalaka maʼin Esaú sümaa nuʼwaatüin. 39 Nusoutaka Isaac nümüin sünain maa:
«Wattaluʼujeechi pia kepiain suulia mma anaka süpüla apünajaa jee müsia suulia tü joojotshi eekat nutuma Maleiwa. 40 Kachajaruutseechi pia waneepia jee nüchepchieechi pia chi pimüliakai. Pukulajaapa aaʼin sünain aʼyatawaa nümüin, taasheechi pia suulia nüchepchiain pia».
41 Üttakalaka maʼin naaʼin Esaú nünain Jacob soʼujeʼereeya tia sutuma nuchuntunuin apüleerua anaa nutuma chi nüshikai, anuujeseʼe nünüiki Esaú nüleʼeruʼu: «Alüʼütshiyaajeʼe süpüla outaa chi tashikai, toʼuteechi aaʼin Jacob maʼaka jeʼra kaʼi süchikijee niʼyalajünüin aaʼu chi tashikai». 42 Saapapa Rebeca tü naaʼinreekalü Esaú, chi süchon epayaakai, suunejiramaatüin Jacob, chi süchon emülieekai jee müsü shia nümüin: «Paapaja maa tanüiki, nuʼutee aaʼinchi pia Esaú chi pipayakai, saaʼujee tü kasa paaʼinrakat nümüin. 43 Tachonchee, anakajaʼa paaʼinrüle tü taluwataainjachikalü anain pia, oʼunamaatüinjachi pia chamüin Harán nümaʼanamüin Labán, chi tawalakai. 44 Kakalieechi pia chaa nümaʼana, waneʼereeya sülatapa jashieekat nuulia chi pipayakai, 45 waneʼereeya motopa naaʼin tü paainjakat nümüin jee nnojoitpa nia jashichin saaʼujee tia. Tasaajireechikalaka pia süpüla püleʼejüin püchikuaʼa. Nnojorüleejaʼa tacheküin süchiki amüloulin jia piamaleʼeya soʼu wanee kaʼi».
46 Anuukalaka sünüiki Rebeca mapa nümüin Isaac: «Müsü outeekai taaʼin sutuma sukuwaʼipa tü nüchonniikat Het. Shia anaʼleeka aluʼu outule taya kasaarüle Jacob sümaa wanee nüchon Het, maʼaka saaʼin tü jieyuu yaakalüirua kepiain suluʼu mmakat tüü».