Génesis
28 Nuunejinnakalaka Jacob nutuma Isaac süpüla nuchuntajachin anaa nüpüleerua, nuluwataakalaka nia sümaa nümüin nümüin: «Nnojoishi kasaalüinjachin pia sümaa wayuu yaajeʼewatka Canaán. 2 Puʼuna Padán-Arammüin nipialuʼumüin Betuel chi süshikai püi, kasaaleechikalaka pia sümaa wanee nüchon Labán chi shipayakai püi. 3 Eʼreechi pia anaa nutuma chi Maleiwa Pülashikai maʼin, nükaalinjeechi pia süpüla wainmain püchonnii jee süpüla wainmain püikeyuu, wainmeerü wayuu eeka pünainjee. 4 Naapeerü pümüin tü anaa naapakat nümüin Abrahán, naapeeria shia namüin na püikeyuukana. Puumainjeerü tü mma poʼonookalü aluʼu, tü mma naapakat Maleiwa nümüin Abrahán».
5 Nüjütünaka Jacob nutuma Isaac, oʼunushijeseʼe Jacob Padán-Arammüin eemüin Labán chi nüchonkai Betuel chi arameokai. Eekajasaʼa Labán shipaya nia Rebeca tü niikat Jacob nümaa Esaú.
6 Naapa achikirü Esaú suchuntunuin anaa nüpüleerua Jacob nutuma Isaac jee nüjütünüin Padán-Arammüin süpüla kaʼwayuuseinjachin nia chayaa jee naapa achikiriaʼaya nuluwataanüin sünain tü pütchi makat: «Nnojoishi kasaalüinjachin pia sümaa wayuu yaajeʼewatka Canaán». 7 Naapa achikiriaʼaya nuʼunuin Jacob Padán-Arammüin süka naapaain sümaa nünüiki chi nüshikai jee sümaa sünüiki tü niikat. 8 Niyaawataka saaʼu Esaú nnojolin talatüin naaʼin Isaac sümaa tü jieyuu chejeʼewatkat Canaán. 9 Mayaainjeʼe eein waneirua nuʼwayuuse Esaú, oʼunushi nia eemüin Ismael chi nüchonkai Abrahán, nuʼwayuusekalaka Mahalat, tü nüchonkalü Ismael, tü nushunuukat Nebayot.
10 Nuʼunakalaka Jacob Beer-Sebajee, naapaakalaka tü wopu chaʼwatkat Haránmüin. 11 Nüntakalaka mapa suluʼumüin wanee mma, motsosü kaʼikat wanaa sümaa tia, nüchajaainjeseʼe jalainchin nutunkuin soʼu aikat tia. Nüntakalaka sünain wanee ipa naapaakalaka shia süpüla nikiipalain, atunkushijeseʼe nia chayaa. 12 Nüʼlapüjaaka, niʼrakalaka nüʼlapüinruʼu wanee kaleera shaʼwataka yaa mmoluʼujee chaa iipünaamüin, niʼrüin sünain ashakataa jee aliikajawaa sooʼopünaa na aapiee nümaʼanajeejanakana Maleiwa. 13 Niʼrakalaka Jehová iipünaa sünain tü kaleerakat jee sümaa nümüin:
«Taya Jehová Nümaleiwasekai chi püshikai Abrahán, Nümaleiwasekai Isaac, taapeerü tü mma eere juʼletüin pia, taapeeria shia namüin na püikeyuukana. 14 Watteena maʼin naalii na püikeyuukana tatuma maʼaka wattain saalii tü jasaikat. Miyoʼujeerü puumain chaa palaamüin, uuchimüin, wopumüin jee müsia chaa wüinpümüin. Aneerü sukuwaʼipa wayuu maʼleekalia pünainjee jee aneeriaʼaya shia nanainjee na püikeyuukana. 15 Eeshi taya pümaa, taaʼinmajeechi pia jalapünaale puʼunuin, teiteʼereechi pia püchikuaʼa suluʼumüin mmakat tüü. Nnojoleechi pia tapütüin pümüiwaʼa tekeraajalepaʼaya tü tamakat pümüin».
16 Anuujeseʼe nünüiki Jacob süchikijee nüchijiraain sümaa tü nüʼlapüjaakalü amaa paala: «Shiimainña yaain Jehová suluʼu mmakat tüü, nnojotsü tatüjaain aaʼu tia paala». 17 Nüinkuukalaka aaʼin Jacob sümaa nümüin: «¡Anakatche mmakat tüü! Shiakajasaʼa nipia Maleiwa yaʼayaa, yaajeekajasaʼa ekerotuin wayuu sirumatuʼumüin». 18 Nütamaaka Jacob wattaʼa maalü naapakalaka tü ipa nikiipalakat paala, nüshaʼwaleʼeraka shia sümaa nüshorottirüin seita saaʼu. 19 Betelkalaka sünülia tia mmakat nutuma, Luz münapuʼusü paala tia pueulokot.
20 Naapakalaka nünüiki Jacob nümüin Maleiwa sünain maa: «Maleiwakalee, ayatülejeʼeya eein pia tamaa, paaʼinmajüle taya eepünaale toʼunuin, paapüle tamüin tü tayaalujutkat, paapüle tasheʼin, 21 taleʼejüle sümaa anain takuwaʼipa nipialuʼumüin chi tashikai, shiimainjaʼa piain chi Tamaleiwasekai Jehová. 22 Shiyaawase nipia Maleiwa tü ipa tashaʼwaleʼerakat, Tamaleiwasekalee, tü kasa püsülajakat tamüin polooseerü shiʼipa tatuma, tasülajeetka pümüin waneesia shiʼipa».