Génesis

49 Neenajirakalaka Jacob na nüchonniikana jee nümakalaka namüin: «Anakajaʼa juutkajaale süpüla taküjainjachin jümüin tü alatajateetkat mapeena. 2 Taya Jacob jee tachonnii jia, anashii juutkajaale jee jaapaja tanüiki. Tayasaʼaya chi jüshikai, taya Israel, anakajaʼa jaapajüle tanüiki.

3 »Rubén, pia chi teʼirumakai, tachon pia katchinwaʼaya taya, pia chi palajachikai tachon, alanaʼaleepuʼushi suluʼu kojutuin pia. 4 Nnojoleechi pia alanaʼaleein noulia na puwalayuukana süka müin pia maʼaka saaʼin wüin eekai jashichin maʼin, ainkaashi pia sümaa taʼwayuuse, süka paaʼinrüin tia mojutusat pümüin kaʼwayuusein taya. Shiaʼaya paaʼinraka tia.

5 »Pawalaawashi Simeón nümaa Leví. Chajaruutamaashii naya sünain ashutaa saaʼu wayuu. 6 Anakajaʼa nnojoire aleewain taya namaa, anakajaʼa nnojorüle suchuntaain taaʼin* namaain taya na namaajanakana süka noʼutuin saaʼin wayuu saaʼujee jashichin naya jee nashanaajüin süsaʼa paaʼa tooloyuu süka anashiin shia namüin. 7 Mojusü maʼin tü naaʼinrakat saaʼujee jashichin maʼin naya, noʼuta aaʼinchii na wayuukana sümaa nnojoluin namülialaain aaʼin naalin. Taʼwalakajeʼereena naya naʼakapünaa na nüikeyuukana Jacob, taʼwalakajeʼereena naya naʼakapünaa na nüikeyuukana Israel.

8 »Jamüshijaʼa piakai Judá naʼwaajeechi pia na puwalayuukana, piʼitaajeerü pajapü sünain nanulu püʼünüü, nasapainkeena pümülatuʼu na puwalayuukana. 9 Judá müshi pia maʼaka naaʼin wanee süchon león. Tachee, meechi puʼunakai aaʼin eejeere pümaʼanain tü püsitkat, müshi aka purolojokai aaʼin jee müshi piyurulaakai aaʼin maʼaka naaʼin wanee león. ¿Jaraleechi maaʼinkai aaʼin achijiraain makai wanee león? 10 Eejeerü nümaʼana Judá waneepia tü wunuʼu* najapuluʼukat wanee aluwataashi jee eejeerü süʼütpaʼa nuuʼui tü waraarat* nümaʼanakat wanee süʼlaüla surulaat, eejeerü tia nümaʼana nüntaleepa Siló, chi soonooinjachikai amüin wayuu maʼleekalia. 11 Nijittaajeerü nüpüliiküse sünain süsaʼa uuwa jee nijittaajeerü süchon nüpüliiküse sünain süsaʼa uuwa eekai anain maʼin, nüshijaajeerü nüsheʼin shiroku wiino jee shiroku shira uuwa. 12 Ishoinjatü noʼu sümaa yuuleematüin shia sutuma tü wiinokot jee kasuujeerü nai sutuma tü leechikat.

13 »Kepiainjachi Zabulón sotpaʼa palaaka eere soʼonule anuwa, chakualüinjatü tü nuumainkat wanaapünaa sümaa Sidón.

14 »Müshi Isacar maʼaka naaʼin wanee püliikü katchinkai jee ichekai eipüse, nuuntuin nülüʼüjain tü nüchisekat jaʼitashi joyotuin nia, ayatüsiaʼaya nülüʼüjain tü nüchisekat. 15 Niyaawateerü anain tü mmakat süpüla eemerawaa jee anain shia süpüla apünajaa, nülüʼüjeerü wanee kasa nunuloʼu jee aʼyataajeechi nia sünain wanee kasa eekai jawatüin.

16 »Loteerü sukuwaʼipa tü kasa naainjakat na nüikeyuukana Dan napüleerua napüshuaʼa na israelitakana, jama napüshinnain naya. 17 Meena na nüikeyuukana Dan maʼaka saaʼin wanee wüi jashichi sotpaʼaka wopu. Meena naya maʼaka saaʼin wanee wüi eekai koʼuwain sotpaʼa wopu achotoko suuʼui ama jee ojutirakai chi amaajuchikai. 18 Jehovákalee, taʼatapajeechi pia süpüla piainjachin oʼtteʼerüin taya süchikumüin outaa.

19 »Ashutuneechi aaʼu Gad sutuma kaʼruwarannuu, eejiraajeechipejeʼe nia, niipiijeerü shiairua.

20 »Watteerü saalii eküülü nümaʼana Aser, aapeechi nia eküülü nikapuʼuka wanee aluwataashi.

21 »Müshi Neftalí maʼaka saaʼin wanee irama pasanuasü, atüjashi maʼin nia süpüleerua nünüiki.

22 »Müshi José maʼaka saaʼin sujuyain wunuʼu kachonka maʼin sotpaʼa eejeere süparalüin wüin, wayaataka apana sooʼopünaa süsepü yüüja. 23 Apüleeruaanapejeʼe naaʼin natuma na jatümaajanakana, ooʼulakünüshi nia natuma jee ayatüshia naʼürülain nia. 24 Anapejeʼe maʼin saalaja tü würaichikat, ichesü maʼin najapü sünain jee atüjashi maʼin nia süpüleerua. Nuuntuin tia sutuma nükaalinjünüin nutuma chi pülashikai maʼin akaalinjakai Jacob, chi makai aka naaʼin arüleejüi jee chi makai aka saaʼin ipa akaalinjakai Israel. 25 Nümaʼanajeejachi nia Nümaleiwase chi nüshikai, nükaalinjeechi nia Maleiwa, nümaashi nia chi pülashikai maʼin jee naapeerü nümüin tü kasa anasü chakalü iipünaa jee tü kasa anasü mmapüjeejatkat. Watteerü saalii nüchonnii jee watteerü saalii nümüʼlüin. 26 Alanaʼaleejeerü tü kasa anasü niʼrüinjatkat nutuma chi nüshikai suulialeʼeya tü kasa anasü eekat sünainjee tü uuchi matüjainkalü ojuttaa jee alanaʼaleeinjatia shia suulia tü kasa anasü eekat sooʼopünaa tü wutai matüjainkat jamajaa. Ayateechia eʼrüin kasa anasü José chi aneekünakai naʼakajee na nuwalayuukana.

27 »Ajaʼtteerü nutuma Benjamín tü nüʼünüükalüirua maʼaka sajaʼttüin nutuma wanee erü simoluuna tü niküinkat. Ajaʼtteerü nutuma nüʼünüü watta maalü jee niitajeetkalaka aliika tü nükanainkat sünain atkawaa».

28 Akumajaasü tü poloosükat piamamüin eʼirukuu suluʼuka Israel nanainjee napüshuaʼa naya wayuukana, shia nünüiki chi nashikai namüin tia soʼu nücheküin anainjatüin nakuwaʼipa, nüküjain namüin waneʼewai nakua tü anainjatkalü atuma nakuwaʼipa.

29 Anuukalaka nünüiki Jacob namüin na nüchonniikana süchikijee tia: «Outataainjaʼa joo taya, anakajaʼa jiʼiküle taya namaʼana wayuu tatuushinuu suluʼu tü koʼushi chakalü suluʼu nuumain Efrón chi hititakai. 30 Shia tü koʼushii chakat suluʼu tü mmakat Macpelá chaa süʼütpaʼa Mamré, tü chakat suluʼu tü mmakat Canaán. Niyaʼlajüin paala tia Abrahán nuulia Efrón chi hititakai, süpülajatü naamaka tia mmakat. 31 Ichaa eʼikünüin Abrahán sümaa Sara tü nuʼwayuusekat, ichaa eʼikünüin Isaac sümaa Rebeca tü nuʼwayuusekat jee ichaa teʼiküin Lea wanaa sümaa sünaajaain. 32 Ayaʼlajuushi noulia na nüchonniikana Het tia mmakat sümaʼaleeya tü koʼushii chakat suluʼu».

33 Keraakalaka nünüiki Jacob namüin na nüchonniikana, nujuleraaka nüchikuaʼa, nüsanatkalaka naaʼin, nünaajaaka maʼaka nanaajaain na nutuushinuukana.