Génesis

29 Süchikijee tia, ayatüshi Jacob oʼunuin eeʼewaire nia suluʼumüin tü mma wüinpümüinkat* saaʼujee Canaán. 2 Niʼraka wanee ishi chaa anouishiipaʼa otta yalajatü süʼütpaʼa apünüinsü shiʼipapaʼa anneerü kasüleka yala. Koʼulujunasü tü ishikat wanee ipa miyoʼu. 3 Kottapa süpüshuaʼa tü anneetkalüirua, asünneʼennawaisü tü ipa soʼulujunakat tü ishikat natuma na arüleejüliikana. Najaʼita namüsia süsüin namüʼlüin, neʼitaa namüsia tü ipa soʼulujunakat tü ishikat.

4 Nüsakiraka Jacob na arüleejüliikana: «¿Jalejeʼewalii jia waʼlemüinñuwaa?». «Chejeʼewalii waya Harán», namakalaka nümüin. 5 Nüsakiraka joo Jacob naya: «¿Jiʼraajüin chi wayuu kanüliakai Labán, chi nülüinkai Nacor?». «Aa, weʼraajüin», namakalaka nümüin. 6 Nüsakiraka naya nachikuaʼa: «¿Anashi nia jiʼrüin?». «Aa, anashi nia, iseʼesa Raquel, tü nüchonkat sümaa tü sürüleejüinkat», namakalaka nümüin. 7 Anuuka joo nünüiki Jacob: «Kaleʼujanainna waya, nnojotyülia keraain süpüla shikerotinnüin tü jürüleejüinkat, jüsiʼra shia wüin otta jikajeʼera shia». 8 «Nnojotsü aapünüin shikii wamüin süpüla müinjatüin sukuwaʼipa, waʼatapajüinjatü kottuin süpüshuaʼa sürüleejüin wayuu otta süsünneʼennüin tü ipa soʼulujunakat tü ishikat. Shia sukuwaʼipaka tia süpüla wasiʼrüin wüin tü anneetkat», namakalaka nümüin.

9 Süntaka Raquel yalaiwaʼaya yootuin Jacob namaa na arüleejüliikana, wayuu arüleejüt shia, shia sürüleejaka naʼanneetse chi süshikai. 10 Niʼraiwaʼaya Jacob süntüin Raquel sümaa tü nümüʼlüinkat Labán, awataamaatüshi nia sünain asünneʼeraa tü ipa soʼulujunakat tü ishikat otta nüsiʼrüin wüin tü sürüleejüinkat Raquel, tü nüchonkat Labán, chi shipayakai tü niikat Jacob. 11 Shiasaʼa mapa nüsakaka Jacob Raquel sümaa nutuʼluin suwalapaʼa, niʼyalajakalaka maʼin. 12 Nüküjaka Jacob sümüin Raquel nüpüshin nia chi süshikai jee süchooin nia Rebeca. Suwataakalaka Raquel sünain aküjaa shia nümüin chi süshikai.

13 Naapaiwaʼaya Labán süchiki nüntüin Jacob, awataashi nia nüpanapa, akoʼojooshi nia nünain otta nüsaküin nia sümaa nutuʼluin nuwalapaʼa. Nümaakalaka nia nipialuʼumüin, nüküjaka Jacob nümüin Labán süpüshuaʼaleeya tü alatakat nümüin. 14 Anuuka joo nünüiki Labán nümüin Jacob: «Shiimainjaʼa maʼin tapüshin pia». Makataka Jacob nümaa soʼu wanee kashi.

15 Anuuka joo nünüiki Labán nümüin Jacob: «Mayaainjeʼe tapüshin pia, nnojoishi süpüla taʼyateʼerüin pia sümaa nnojoluin walaain pia tatuma, püküja tamüin kasain taapüinjatüin pümüin saaʼu piʼyataain». 16 Piamasü tü nüchonniikat Labán, Lea sünülia tü epayaakat otta Raquel sünülia tü emiiruaakat. 17 Anasü aaʼinrü maʼin Raquel suulialeʼeya Lea tü shipayakat. 18 Anuuka joo nünüiki Jacob nümüin Labán süka müliain nia shiiʼiree Raquel: «Aʼyataajeechi taya soʼu akaratshi juya süpüla taʼwayuuseinjatüin Raquel tü püchon emiiruaakat». 19 «Anasü puʼwayuusere shia suulialeʼeya nuʼwayuusein shia wanee wayuu naata, anashi makatüle pia yaa tamaʼana» nümakalaka Labán nümüin. 20 Aʼyataashijeseʼe Jacob soʼu akaratshi juya süpüla nuʼwayuuseinjatüin Raquel, motsoʼopejeʼe sümaʼa tia saaʼin nümüin süka müliain maʼin nia shiiʼiree.

21 Anuuka joo nünüiki Jacob nümüin Labán: «Keraaitpa tü akaratshisükat juya* taʼyataainjachika oʼu pümüin, paapa tamüin Raquel süpüla taʼwayuuseinjatüin shia jee tainkaainjachin sümaa». 22 Naainjakalaka Labán wanee miʼiraa shikiira kaʼwayuusee jee nuunejirüin napüshuaʼa na wayuu kepiakana nüʼütpünaa. 23 Shiasaʼa aipaʼa, niʼikajaaka Labán Lea nümüin Jacob süpüla nüinkaainjachin sümaa. 24 Naapaka Labán tü nüchepchia kanüliakat Zilpá süpüla süchepchiainjatüin shia Lea, tü nüchonkat. 25 Shiasaʼa waneemüin kaʼi niʼraka Jacob shiain Lea juʼletüin naʼatoʼu. Anuujeseʼe nünüiki nümüin Labán: «¿Jamüsü makaʼa paainjala tamüin? ¿Aashin taʼyataain pümüin süpüla taʼwayuuseinjatüin Raquel? ¿Jamüshi pimeejakaʼa taya?». 26 Anuujeseʼe nünüiki Labán nümüin: «Nnojotsü maajüin sukuwaʼipa wayuu yaapünaa saapünüin tü emiiruaakat süpüla nuʼwayuuseinjatüin shia wanee wayuu süpülapünaa tü epayaakat. 27 Anashi waneere semaana pia sünain miʼiraa shikiira puʼwayuusein tia wayuukot, saapüneetkalaka pümüin tü wane wayuukot piʼyataale tamüin akaratshi juya sooʼomüin». 28 Anakalaka tia nümüin Jacob, waneeka nia semaana sünain miʼiraa shikiira nuʼwayuusein Lea. Saapünaka mapa Raquel nümüin Jacob nutuma Labán süpüla nuʼwayuuseinjatüin shia. 29 Naapaka Labán tü nüchepchia kanüliakat Bilhá süpüla süchepchiainjatüin shia Raquel, tü nüchonkat.

30 Nüinkaakalaka Jacob sümaa Raquel, miyoʼu maʼin saalin Raquel nüpüla suulialeʼeya Lea. Aʼyataashijeseʼe nia akaratshi juya sooʼomüin nümüin Labán. 31 Niʼrapa Jehová nnojolin müliain maʼin Jacob shiiʼiree Lea, nükaalinjain shia süpüla ipuoluinjatüin shia. Shiakalaka maralüin Raquel. 32 Ipuotkalaka Lea, jemeyutka shia nümaa wanee joʼuu, Rubén nünülia sutuma süka müin sünüiki: «Müsü nünülia chi tachonkai süka niʼrüin Jehová tü tamülialakat, aijeerü joo taya nüpüla chi taʼwayuusekai». 33 Ipuotkalaka shia süchikuaʼa, jemeyutka shia nümaa wanee joʼuu. Anuukalaka sünüiki: «Müsü nünülia chi tachonkai süka naapüin Jehová tanüiki, nnojotpuʼusü taya alin nüpüla chi taʼwayuusekai. Anuuka joo nükaalinjain taya Maleiwa süpüla kachoinjatüin taya tachikuaʼa». Simeónkalaka nünülia sutuma. 34 Ipuotkalaka joo shia süchikuaʼa, jemeyutka shia nümaa wanee joʼuu. Anuuka joo sünüiki: «Waneepieechi joo chi taʼwayuusekai tamaa, anaasaʼa joo apünüinshiin tachonnii nümüin». Levíka nünülia. 35 Ipuotkalaka joo shia süchikuaʼa, jemeyutka shia nümaa wanee joʼuu. Anuujeseʼe sünüiki: «Taʼwaajeechi joo Jehová». Judáka nünülia sutuma. Suuʼulaaka suulia kachonwaa.