Rut
3 Anuujeseʼe sünüiki Noemí sümüin Rut: «Tachonchee, anataashi tachajaale nüchiki wanee wayuu puʼwayuuseinjachikai, anainjachikai atuma pukuwaʼipa. 2 Nüpüshi Boaz chi taʼwayuusekai, wayuu aʼyataashii nümüin Boaz na jieyuu piʼyataajiraakana amaa. Nuwaajeerü aipaʼa tü cebadakat eere nuwaajüin süchon nüʼttia. 3 Shia anaka aluʼu poʼoojüle sümaa pushulerüin paaʼu seita eekai jemetüin eejuu, paʼata pünain wanee püsheʼin eekai anain jee puʼuneetkalaka eere suwaajünüin süchon aʼttiee, nnojoluinjatpejeʼe niʼrüin pia kettaʼaleepa niküin. 4 Jülüja paaʼin jalainjachin nujuleraain, piyalereetka tü naanala koʼoyookalü aka nuuʼui, pujuleraajeetka saʼatoʼu nuuʼui, nüküjeetkalaka pümüin tü paaʼinrajatkat».
5 «Taaʼinreeria tü pümakat», sümakalaka Rut sümüin Noemí. 6 Suʼunakalaka eere suwaajünüin süchon aʼttiee, ayataka sutuma tü suluwataakalü anain shia tü saʼütkat. 7 Nikakalaka Boaz jee talataka nia, nujuleraaka saaʼu süchon tü aʼttieekat. Surolojokalaka Rut, shiyaletkalaka tü naanalakat Boaz koʼoyooka aka nuuʼui, sujuleraakalaka saʼatoʼu nuuʼui. 8 Nüchijiraakalaka süseʼeruʼu aikat süka nukuruluin,* nojoyolooka jee niʼraka juʼletüin wanee wayuu süʼütpaʼa nuuʼui. 9 «¿Jarat pia?», nümakalaka Boaz sümüin. «Taya tayakat Rut, tü püchepchiakat, nüpüshi pia chi taʼwayuusekai. Pükaalinjaʼaya maa taya, pia keraakai süpüla amüliajüin waya», sümakalaka Rut nümüin. 10 Anuukalaka nünüiki sümüin: «Tachee, kasataalejeseʼe anain pukuwaʼipa nutuma Jehová, jaʼyaleesia paaʼu pümüliajülin wayuu suulialeʼeya paala, jama nnojolin püchajaain nüchiki wanee wayuu eekai jimaʼalin süpüla nuʼwayuuseinjatüin pia, jaʼitashi washirüle jee nnojoire washirüin nia. 11 Tachee, nnojo mmoluin pia, taaʼinreeria tü pümakat tamüin, jama sütüjaain saaʼu wayuu pueulopaʼa wayuuin laülaa aaʼinrü pia. 12 Mayaainjeʼe tayainjachin amüliajüin jia, eeshiaʼaya wanee tapüshi keraʼaleeka süpüla amüliajüin jia. 13 Yaasiaʼaya pia soʼu aikat tüü, nnaweerüjaʼa nünüiki tamüin wattaʼa chi tapüshikai, nümüliajeere pia. Taapüin tanüiki pümüin nooʼopünaa Jehová chi Maleiwa matüjainkai outaa, tamüliajeerüin pia nnojoire nümüliajeein pia chi tapüshikai, pujuleraa püchikuaʼa waneʼereeya pütamaain süwasajaapa aikat».
14 Sujuleraaka Rut süchikuaʼa süʼütpaʼa nuuʼui Boaz, sütamaaka nnojoluiwaʼaya süwasajaain aikat suulia shiʼrüin shia wayuu. «Anasü nnojorüle sütüjaanüin aaʼu yaajeejatüin wanee wayuu eere suwaajünüin süchon aʼttiee», nümakalaka Boaz. 15 Anuukalaka nünüiki Boaz sümüin Rut: «Iche yalejee saajuna püsheʼin, puwayala shia sümaa pajapuluʼujuin shia». Nijitakalaka Boaz piama shikii jaʼralimüin kilo* cebada wanaa sümaa suwayalüin saajuna süsheʼin, nüpataaka shia sümüin, naapaka shia sümüin süpüla sülüʼüjainjatüin jee nuʼunakalaka Boaz pueulopaʼamüin.
16 Süntaka joo Rut shipialuʼumüin tü saʼütkat. «¿Jamüsiaʼaya pukuwaʼipa tachonchee?», sümakalaka Noemí sümüin Rut. Süküjakalaka Rut tü naaʼinrakat Boaz süpüleerua. 17 «Naapüin tamüin piama shikii jaʼralimüin kilo cebada, ‹Anuu tü pajapüipainjatkat sümüin tü paʼütkat püntapa shipialuʼumüin›, müshisa nia tamüin», sümakalaka Rut sümüin tü saʼütkat. 18 Anuukalaka joo sünüiki Noemí sümüin Rut: «Tachonchee, paʼatapaja jameerüin sukuwaʼipa tü alatakat, jimataleejechisa Boaz soʼukai nütüjaapa saaʼu tü sukuwaʼipainjatkat nutuma».