Tü nüshajalakat Lucas
17 Nümakalaka Jesús namüin na nikirajüinkana: «Eejeerü tü kasa amalajeʼereetkat nunoula wanee wayuu, kasalajaneetpejeʼe tia nümüin chi amalajeʼerakai nunoula. 2 Anashi nujutunule pasanain sünain palaa sümaa shiʼitaanüin wanee ipa miyoʼu nunutpünaa maʼaka saaʼin tü ipa asirujiakat, suulia nümalajeʼerüin nanoula na tekirajüinkana. 3 Eejüinjatü jaaʼin. Kaainjarale wanee juwala, jüchiaainjachi nia, motuinjatü jaaʼin naainjala niyaawajaale suulia. 4 Jaʼitakajeʼe kaainjarale wanee puwala puulia akaratshitua süpüla kaʼikat jee akaratshituale nukua pümaʼanamüin sünain maa: ‹Nnojotsü taaʼinjeein tia makat›, motuinjatü paaʼin naainjala».
5 Namakalaka na aluwataaushikana nümüin chi Señotkai: «Pükaalinja maa waya süpüla kanoulaleeinjanain waya». 6 Nusoutakalaka chi Señotkai namüin: «Müle tü junoulakat maʼaka saaʼin wanee süʼü ‹mostaza›, eeshiijaʼa süpüla jümüin sümüin wunuʼukat* tüü, ‹anasü putuʼutule puuralanainjee otta püshaʼwalaa pasanain sünain tü palaakat›, saainjeetkalaka tia.
7 »‹Püikalaa pümaala pikaiwa›, ¿meenache jia nümüin wanee jüchepchia nüleʼejapa yüüjaluʼujee süchikijee ajaralaa jee shiale süchikijee arüleejaa? 8 ¿Aashin jümeenain nümüin ‹Anashi puʼwanajaale püsheʼin püʼlakajaaiwa wanee kasa tayaaluʼu, pikireechi taya sümaa püsiʼrüin taya. Pikeechikalaka jee püseechikalaka tachikumüin›? 9 ¿Aashin nnojoleerüin jaapüin analuʼutkat nümüin chi jüchepchiakai saaʼu naaʼinrüin süpüshuaʼaleʼeya tü kasa juluwataakalü anain nia? 10 Akaainjatia neʼe jukuwaʼipa jiakana jaaʼinrapa süpüshuaʼa tü aluwataakalü anain jia, müinjatü jünüiki mayaa: ‹Achepchieʼeraa neʼe waya, nnojotsü wanaain sümaa saapünajatüin wamüin wanee kasa, waaʼinrajatia neʼe tia waaʼinrakat›».
11 Nuʼunapa Jesús Jerusalénmüin, alatüshi nia Samariapünaa otta Galileapünaa. 12 Nülüʼülaapa Jesús sünain wanee pueulo, nüntiraaka namaa polooshii wayuu ajaʼtta atachii sutuma tü ayuulii kanüliakat «lepra», nashaʼwalaaka wattaluʼu nuulia. 13 Naʼwaataka nümüin Jesús sünain maa: «Jesús, Ekirajüikalee, pümüliajaʼaya maa waya». 14 Niʼrapa Jesús naya wayuukana nümaka namüin: «Anashii juʼunule namaʼanamüin na sacerdotekana». Naawalaakalaka naya wayuukana wopuluʼupa naya. 15 Waneeshikalaka neʼe chi wayuu eitaakai naʼakajee na wayuu aawaleʼennakana, niyaawatapa saaʼu anaichipain nia, nuʼwaajakalaka Maleiwa sümaa emetuluin maʼin nünüiki. 16 Nüsapainkakalaka chia wayuukai nümülatuʼu Jesús jee naapakalaka analuʼut nümüin. Samariajeʼewai chia wayuukai. 17 Anuukalaka nünüiki Jesús suluʼujee tia: «¿Aashin polooshiin na wayuu aawaleʼennakana? ¿Jalakaʼa joo na wane mekietsaliikana? 18 Eetaayaai jeʼrashiin na aleʼejakana sünain aʼwaajaa Maleiwa, niaʼala neʼe aleʼejaka wayuukai chii, eerejeʼe wattajeʼewalin nia». 19 Nümakalaka Jesús nümüin chia wayuukai: «Pütamaa, puuʼulaka pümaala, aawalaaichipa pia süka kanoulain pia».
20 Nüsakinnaka Jesús natuma na fariseokana süchiki joujainjachin nuluwataain Maleiwa saaʼu tü mmakat, nusoutakalaka Jesús namüin: «Nnojoleerü shiyaawatüin aaʼu wayuu maʼleekalia nuluwataapeena Maleiwa. 21 Otta nnojoleerü müin wayuu: ‹Anii yaʼayaan›, ‹Ichaa chayaan›, süka jamüin shikeraajüin maaʼulujee yaa tü kasa eejeetkat nuluwataapeena Maleiwa saaʼu tü mmakat».
22 Anuujeseʼe nünüiki Jesús: «Eejeerü wanee kaʼi keeʼireejeetkalü oʼu jaaʼin eeinjachin jümaa chi Süchonkai Wayuu,* nnojoleechipejeʼe nia jümaa. 23 Meerü wayuu jümüin: ‹Ichaa chayaan›, ‹Anii yaʼayaan›, junoujaʼalayaai sünüiki otta nnojo juwataain süchiirua. 24 Maʼaka sümachetaain shiyaa juya sümaa sünakaleeinña waneemüin saʼata tü sirumakat, akaweeria neʼe sukuwaʼipa yaapa chi Süchonkai Wayuu. 25 Eʼrüinjachipejeʼe nia nümüliala palajana otta letüinjachi nia naaʼin na wayuu eekana maaʼulu. 26 Maʼakaapuʼu sülatüin wanee kasa nükalioʼu Noé, meeria neʼe sukuwaʼipa yaapa chi Süchonkai Wayuu. 27 Jamüsüjaʼa nükalioʼu Noé, ekaapuʼushii na wayuukana, asaapuʼushii jee kaʼwayuuseyaa müshii, ekeroto müshijaʼaya Noé suluʼumüin tü anuwa miyoʼukat, süʼitakalaka wanee Juya Miyoʼu maʼin, sajaʼttiraleeka naya. 28 Jamüsüjaʼa nakuwaʼipa na wayuukana nükalioʼu Lot, ekaashii, asaashii, ayaʼlajüshii, oikaashii, apünajüshii otta akumajüshii miichi. 29 Soʼu tü kaʼi nujuʼitakalü oʼu Lot suluʼujee tü mmakat Sodoma, ojutuusü siki chejee iipünaajee sümaʼaleeya ‹azufre›,* ajaʼttaleeshiʼiya jotuin naya wayuukana sutuma. 30 Akaweeria neʼe tü kaʼi niiʼiyalaajeetkalü oʼu sümüin wayuu chi Süchonkai Wayuu.
31 »Soʼu kaʼikat tia chi wayuu saaʼukai nipia, anashi nnojoire nikeroluin paülüʼümüin sünain asaapünawaa wanee kasa eekai nümaʼanain otta chi chakai yüüjapaʼa, anashi nnojoire nüleʼejaain sünainmüin tü kasa nüpütakat. 32 Soto jaaʼin tü alatakat sümüin nuʼwayuuse Lot. 33 Nieechi outaka chi eekai oʼttaweein, eekajasaʼa chi outakai, nieechi kataka oʼu. 34 Tamüshii paala jia, soʼu aikat tia, eejeena piamashii wayuu atunkajaʼalüin, amaaneechi wanee otta apütüneechi chi wane. 35 Eejeena piamashii jieyuu ayüüjaʼalaain süka waneesia moliina, amaaneerü wanee jee apütüneerü wane. 36 * 37 Naapaiwaʼaya tia na nikirajüinkana Jesús namakalaka nümüin: «Señotkalee, ¿jalainjatü alatüin tia makat?». Nusoutakalaka Jesús namüin: «Eere outuin wanee kasa, arütkajeerü tü warulapaikat sünainmüin».