Levítico

2 »›Eere wanee wayuu asülajüinjachikai eküülü* tamüin tayakai Jehová, shiainjatü nüsülajaka wanee ariina eekai yütchoin, amülainjatü nutuma seita saaʼu tü ariinakat jee nijitajatü ‹olíbano›* saaʼu. 2 Niʼikajaajeetka shia namüin na nüchonniikana Aarón, na sacerdotekana, najapateetka chi sacerdotekai süka najapü tü ariina yütchonkalü oʼyotunaka aʼaka seita jee ejitünaka aaʼu ‹olíbano›, naʼajeetkalaka shia saaʼu tü aʼajüleekat süpüla kaittüinjatüin sümüsain, shiyaawase tü kasa asülajünakat tamüin tayakai Maleiwa. Shia wanee kasa aʼajünajatka soʼu siki tamüin tayakai Jehová süpüla jemetüinjatüin maʼin seejuu tamüin. 3 Tü apütaakat sünainjee tü eküülü asülajünakat tamüin, nümüinjatü shia Aarón namaa na nüchonniikana. Shia wanee kasa kojutuka maʼin sünainjee tü kasa asülajünakat tamüin tayakai Jehová aʼajünaka tamüin soʼu siki.

4 »›Püsülajüinjachire eküülü aʼlakajaaushika suluʼu ‹horno›, aainjünajatü shia süka ariina eekai yütchoin. Shiainjatü wanee pan maʼakaka soolojia lakayaaka* seitamaainjatka jee shiale wanee galleta arülachonka maʼakaka soolojia ashulennaka aaʼu seita.

5 »›Püsülajüinjatüle wanee eküülü aʼlakajaaushika suluʼu ‹sartén›, aainjünajatü shia süka ariina eekai yütchoin maʼakaka soolojia otta paliraainjatü shia sümaa seita. 6 Saʼatawalinjatü shia putuma otta piʼyotuinjatü seita saaʼu, shia wanee eküülü asülajünajatka tamüin.

7 »›Püsülajüle wanee eküülü aʼlakajaaushika suluʼu wayeeta, aainjünajatü shia süka ariina yütchonka jee seitamaajatka. 8 Shia ejitünajatka tia saʼaka tü eküülü püsülajüinjatkat tamüin tayakai Jehová jee piʼikajaainjatü shia nümaʼanamüin chi sacerdotekai, niʼikajaajeetka shia saaʼumüin tü aʼajüleekat. 9 Naapaajeetka chi sacerdotekai süpüshi tü eküülü asülajünakat shiyaawaseka tü asülajünakat tamüin. Naʼajeetkalaka shia saaʼu tü aʼajüleekat süpüla kaittüinjatüin tü sümüsainkat, shieerü wanee kasa aʼajünaka tamüin tayakai Jehová süpüla jemetüinjatüin maʼin seejuu tamüin. 10 Tü eküülü apütaakat sünainjee tü asülajünakat tamüin, nümüinjatü shia Aarón namaa na nüchonniikana. Shia wanee kasa kojutuka maʼin sünainjee tü asülajünakat tamüin tayakai Jehová aʼajünaka soʼu siki tamüin.

11 »›Nnojotsü jüsülajüinjatüin tamüin tayakai Jehová wanee eküülü eekai kaʼakain soolojia, nnojotsü jaʼajüinjatüin tamüin tayakai Jehová wanee maasa eekai jashüʼüin jee eekai kaʼakain mapa süpüla kaittüinjatüin sümüsain tamüin.

12 »›Eesü süpüla jaapüin shia tamüin tayakai Jehová saaʼu shiain tü palajatkat süchon aʼttiee asülajünaka tamüin, nnojoluinjatpejeʼe jaʼajüin shia saaʼu tü aʼajüleekat süpüla jemetüinjatüin maʼin seejuu tamüin.

13 »›Süpüshuaʼa tü eküülü püsülajüinjatkat tamüin kaʼakainjatü shia ichii. Nnojotsü püsülajüinjatüin wanee eküülü eekai nnojoluin shijitünüin ichii saʼaka, tü ichii shiyaawasekat tü pütchi tapansaajakat tayakai Maleiwa. Püsülajüinjatüle wanee kasa, ichiimaainjatü shia.

14 »›Püsülajüinjatüle tamüin tayakai Jehová wanee eküülü eekai saainjünüin süka tü palajatkat süchon aʼttiee eekai jeʼwein, shiainjatü tü trigo* eiwaʼatkalü ashannüin, eʼitujuushinjatü shia sümaa shiyüüjaaushin. Shiainjatü tü eküülü eekat sünainjee tü palajatkat süchon püʼttia. 15 Piʼyotuinjatü seita saaʼu jee pijitüinjatü ‹olíbano› saaʼu. Shiainjatü wanee eküülü püsülajüinjatka tamüin. 16 Naʼajeetkalaka shia chi sacerdotekai süpüla kaittüinjatüin sümüsain, shiyaawase tü asülajünakat tamüin tayakai Maleiwa. Tü aʼajünakat shia süpüshi tü trigo ayüüjaaushikat, tü seitakat jee süpüshuaʼa tü olíbanokot. Shia wanee kasa aʼajünaka soʼu siki tamüin tayakai Jehová asülajünaka tamüin.