Levítico
3 »›Naapünüinjachire wanee paaʼa toolo jee shiale wane paaʼa jierü nutuma wanee wayuu süpüla anajiraainjachin nia tamaa, nnojoluinjatü ayuulin jee nnojoluinjatü kamojulain tü mürüt naapajatkat tamüin tayakai Jehová. 2 Niʼitaainjatü najapü chi wayuukai saaʼu nikii chi paaʼa nüsülajüinjachikai, oʼutunajachi aaʼin chi paaʼakai soʼuluʼu tü miichi aʼwaajüleekat. Na nüchonniikana Aarón, na sacerdotekana, natülüittirüinjatü nüsha chi paaʼakai sutoutajee tü aʼajüleekat. 3 Naapüinjatü tamüin tayakai Jehová süpüla saʼajünüin soʼu siki tamüin süpüshi niʼiruku chi paaʼakai süpüla anajiraainjachin chi wayuukai tamaa. Naapüinjatü naüsü chi paaʼakai sutoutajeeka tü nüleʼekat, tü saüsü sünainkat tü niyüülainkat, 4 tü piamasükat nüchüʼü sümaa tü saüsü sünainkat. Pükataleeriaʼaya sümaa tü nüchüʼükat tü saüsü sünainkat nüpana. 5 Naʼajeetkalaka na nüchonniikana Aarón süpüshuaʼa tia saaʼu tü aʼajüleekat süpüla kaittüinjatüin sümüsain, neʼitaajeerü shia saaʼu tü aʼajünakat paala soʼu tü siki chuwatakat maʼin. Shia wanee kasa aʼajünaka tamüin tayakai Jehová, tü aʼajünakat soʼu siki süpüla jemetüinjatüin maʼin seejuu tamüin.
6 »›Nüsülajüinchire wanee wayuu anneerü jee shiale wanee kaaʼula süpüla anajiraainjachin nia tamaa tayakai Jehová, toolole nia jee jierüle shia nnojoluinjatü ayuulin jee nnojoluinjatü kamojulain. 7 Naapüinjachire wanee anneetchon, naapüinjatü shia tamülatuʼu tayakai Jehová. 8 Niʼitaainjatü najapü chi wayuukai saaʼu shikii tü mürüt nüsülajakat, oʼutunajatü aaʼin shia soʼuluʼu tü miichi aʼwaajüleekat. Natülüittirüinjatü na nüchonniikana Aarón süsha tü mürütkat sutoutajee tü aʼajüleekat. 9 Naapeetkalaka tamüin tayakai Jehová tü saüsükat mürüt süpüla saʼajünüin soʼu siki tamüin jee anajiraajeechika nia tamaa. Niʼyotoojeetkalaka süpüshuaʼa tü süsikat eere sajaʼttüin tü süsapükat, tü saüsü sünainkat süleʼe, süpüshuaʼa tü saüsü sünainkat shiyüülain, 10 tü piamasükat süchüʼü sümaa tü saüsü sünainkat. Pükataleerü sümaa tü süchüʼükat tü saüsü sünainkat süpana. 11 Naʼajeetkalaka chi sacerdotekai süpüshuaʼa tia saaʼu tü aʼajüleekat süpüla kaittüinjatüin sümüsain, meerü aka saaʼin wanee eküülü asülajünaka tamüin tayakai Jehová süpüla saʼajünüin soʼu siki tamüin.
12 »›Eere wanee wayuu aapüinjachikai kaaʼula tamüin tayakai Jehová niʼikajaainjatü shia tamülatuʼu. 13 Niʼitaajeetkalaka najapü saaʼu shikii tü kaaʼula nüsülajakat, oʼutunajatü aaʼin shia soʼuluʼu tü miichi aʼwaajüleekat. Natülüittirüinjatü na nüchonniikana Aarón süsha tü kaaʼulakat sutoutajee tü aʼajüleekat. 14 Shia naapajatka süpüla saʼajünüin soʼu siki tamüin tayakai Jehová tü saüsü sutoutajeekat süleʼe jee müsia süpüshuaʼa tü saüsü sünainkat tü shiyüülainkat, 15 tü piamasükat süchüʼü sümaa tü saüsü sünainkat. Nükataleerü tü süchüʼükat sümaa saüsü sünainka süpana. 16 Naʼajeetkalaka chi sacerdotekai süpüshuaʼa tia saaʼu tü aʼajüleekat süpüla kaittüinjatüin tü sümüsainkat, meerü aka saaʼin wanee eküülü asülajünaka tamüin süpüla saʼajünüin soʼu siki tamüin. Aapünajatü tamüin tayakai Jehová süpüshuaʼa tü saüsükat.
17 »›Naaʼinrajatü tüü napüshuaʼa na jüikeyuukana eepünaale kepiain naya, nnojoliinjana eküin naya saüsü jee müsia nnojoliinjana eküin naya isha›».