Levítico

4 Ayatakalaka naashajaain Jehová nümaa Moisés sünain maa nümüin: 2 «Anuu tü püküjainjatkat namüin na israelitakana: ‹Anuu tü naaʼinrüinjatkat wanee wayuu kaainjarale nia sümaa nnojolin naaʼinjeein shia jee naaʼinrüle wanee kasa tapülajaka tayakai Jehová:

3 »›Kaainjarale wanee sacerdote eekai nüneekuushin jee kaainjarale na israelitakana nutuma, acheküshi naapüinjachin wanee paaʼachon tamüin tayakai Jehová süpüla motuin taaʼin tü naainjalakat, niainjachi wanee paaʼachon eekai nnojolin ayuulin jee nnojolin kamojulain. 4 Niʼikajaajeechika chi paaʼachonkai tamülatuʼu tayakai Jehová soʼuluʼu tü miichi aʼwaajüleekat, niʼitaajeetka najapü saaʼu nikii chi paaʼachonkai jee nuʼuteechika naaʼin toʼupala tayakai Jehová. 5 Niʼikajaajeetka chi sacerdote aneekuushikai süpüshi nüsha chi paaʼachonkai suluʼumüin tü miichi aʼwaajüleekat. 6 Nüchütteetka chi sacerdotekai najapira shiroku tü ishakat jee nütülüittireetka süpüshi tia ishakat akaratshitua tamülatuʼu tayakai Jehová süpüleeruajee tü kuluulu sütaüjiakat tü Kuatta Wulekat. 7 Nushulereeriaʼaya chi sacerdotekai süpüshi tü ishakat sünain tü shiyaakuakat suʼuwa mürüt sünainka tü aʼajüleekat wunuʼu jemetaka eejuu yalaka tamülatuʼu tayakai Jehová suluʼu tü miichi aʼwaajüleekat. Shiasaʼa tü apütaakat sünainjee nüsha chi paaʼachonkai amülainjatü shia saʼatoʼu tü aʼajüleekat mürüt, tü yalakat soʼuluʼu tü miichi aʼwaajüleekat.

8 »›Niyuʼleetka naüsü chi paaʼa naapakai saaʼu naainjala: tü saüsü sutoutajeekat nüleʼe, tü saüsü sünainkat niyüülain 9 otta müsia tü piamasükat nüchüʼü sümaʼaleeya tü saüsü sünainkat. Piyuʼleeriaʼaya tü nüchüʼükat sümaa tü saüsü sünainkat nüpana. 10 Ayuʼnnajatia tia nüleʼeruʼujee chi paaʼakai maʼaka shiyuʼnnuin nüleʼeruʼujee chi paaʼa aapünakai süpüla anajiraainjachin wanee wayuu tamaa tayakai Maleiwa. Naʼajeetkalaka shia chi sacerdotekai saaʼu tü aʼajüleekat mürüt süpüla kaittüinjatüin sümüsain.

11 »›Eekajasaʼa nüta chi paaʼakai, tü niʼirukukat sümaa tü nikiikat, tü nüsaʼakat, tü niyüülainkat jee tü nüchaʼakat, 12 niʼikajeʼerüinjatü shia wattamüin suulia nepia na israelitakana eere süpülee shijitünawalin tü paliʼikat. Naʼajeetkalaka shia süpüshuaʼa soʼu siki, aʼajünajatü shia eere shijitünawalin tü paliʼikat.

13 »›Kaainjarale napüshuaʼa na israelitakana sümaa nnojoluin naaʼinjeein shia jee nnojorüle sütüjaanüin aaʼu* naainjain wanee kasa mojusü tapülajaka tayakai Jehová, 14 shiasaʼa sütüjaanapa aaʼu tü kasa mojusü naainjakat, aapünajachi* wanee paaʼachon saaʼu naainjala jee eʼikajaanajachi nia soʼuluʼumüin tü miichi aʼwaajüleekat. 15 Nayasaʼa na laülaashii nekiipüʼükana na israelitakana neʼitaajeerü najapü toʼupala tayakai Jehová saaʼu nikii chi paaʼachonkai jee noʼuteechi aaʼin chi paaʼachonkai tamülatuʼu tayakai Jehová.

16 »›Niʼikajaajeetka chi sacerdote aneekünakai süpüshi nüsha chi paaʼakai suluʼumüin tü miichi aʼwaajüleekat. 17 Nüchütteetka chi sacerdotekai najapira shiroku tü ishakat jee nütülüittirüinjatü süpüshi tia ishakat akaratshitua tamülatuʼu tayakai Jehová süpüleeruajee tü kuluulu sütaüjiakat tü kuattakat. 18 Nushulereetka süpüshi tü ishakat sünain tü shiyaakuakat suʼuwa mürüt sünainka tü aʼajüleekat wunuʼu jemetaka eejuu yalaka tamülatuʼu tayakai Jehová suluʼu tü miichi aʼwaajüleekat. Shiasaʼa tü apütaakat sünainjee nüsha chi paaʼakai, amülainjatü shia yala saʼatoʼu tü aʼajüleekat mürüt, tü yalakat soʼuluʼu tü miichi aʼwaajüleekat. 19 Niyuʼleetka süpüshuaʼa tü naüsü nünainkat chi paaʼakai jee naʼajeetkalaka shia saaʼu tü aʼajüleekat süpüla kaittüinjatüin sümüsain. 20 Shia aainjünajatka nüka chi paaʼakai tü aainjünajatkat nüka chi paaʼa aapünakai süpüla sülatinnüinjatüin naainjala. Meeriaʼaya sukuwaʼipa nutuma. Naapajachi chi sacerdotekai wanee paaʼachon süpüla sülatinnüinjatüin naainjala na israelitakana, moteetkalaka taaʼin naainjala. 21 Niʼikajeʼereechi chi paaʼakai wattaluʼu suulia nepia na israelitakana süpüla naʼajünüinjachin maʼaka naʼajünüin chi palajachikai paaʼa. Shia wanee kasa asülajünaka saaʼu naainjala na israelitakana.

22 »›Kaainjarale wanee nekiipüʼü na israelitakana sümaa nnojolin naaʼinjeein shia jee kaainjarale nia saaʼujee naainjain wanee kasa mojusü tapülajaka tayakai Jehová chi Nümaleiwasekai 23 jee shiale niyaawatüin saaʼu kaainjalain nia saaʼujee nnojolin noonooin sümaa wanee pütchi aluwataanaka anain, niʼikajaainjachi wanee kaaʼulachon eekai nnojolin ayuulin jee nnojoikai kamojulain süpüla nüsülajüinjachin nia tamüin tayakai Maleiwa. 24 Niʼitaainjatü najapü saaʼu nikii chi kaaʼulachonkai, nuʼuteechikalaka naaʼin eere suʼutunuin aaʼin tü mürüt asülajünakat tamüin süpüla saʼajünüin tamüin, aainjünajatü tia toʼupala tayakai Jehová. Shia wanee kasa asülajünaka tamüin saaʼu saainjala wayuu. 25 Niasaʼa chi sacerdotekai nushulereerü süka najapira süpüshi tü isha aapünakat saaʼu saainjala wayuu, nushulereerü shia sünain shiyaakua tü suʼuwakat mürüt sünainka tü aʼajüleekat mürüt otta amüleerü nutuma tü isha apütaakat saʼatoʼu tü aʼajüleekat mürüt. 26 Naʼajeetkalaka saaʼu tü aʼajüleekat süpüshuaʼa saüsü tü mürüt asülajünakat süpüla kaittüinjatüin sümüsain, meerü sukuwaʼipa maʼaka saainjünüin süka tü saüsü asülajünakat süpüla anajiraainjachin wanee wayuu tamaa. Shia naaʼinrüinjatka tia chi sacerdotekai süpüla sülatinnüin naainjala wanee wayuu, moteetkalaka taaʼin tü naainjalakat.

27 »›Kaainjarale wanee wayuu sümaa nnojolin naaʼinjeein shia jee naainjale wanee kasa tapülajaka tayakai Jehová 28 jee niyaawatüle saaʼu kaainjalain nia, acheküsü niʼikajaainjatüin wanee kaaʼulachon süpüla nüsülajüinjatüin shia saaʼu tü naainjalakat, nnojoluinjatü ayuulin jee nnojoluinjatü kamojulain shia. 29 Niʼitaajeetkalaka najapü saaʼu shikii tü mürüt asülajünakat saaʼu naainjala jee nuʼuteetkalaka saaʼin eere suʼutunuin saaʼin tü mürüt asülajünakat süpüla saʼajünüin tamüin tayakai Maleiwa. 30 Niasaʼa chi sacerdotekai nushulereerü süka najapira süpüshi tü isha aapünakat saaʼu saainjala wayuu, nushulereerü shia sünain shiyaakua tü suʼuwakat mürüt sünainka tü aʼajüleekat mürüt otta amüleerü nutuma tü isha apütaakat saʼatoʼu tü aʼajüleekat. 31 Niyuʼleetka süpüshuaʼa saüsü tü mürüt asülajünakat maʼaka niyuʼluin saüsü tü mürüt asülajünakat süpüla anajiraain wayuu tamaa. Naʼajeetkalaka shia chi sacerdotekai saaʼu tü aʼajüleekat süpüla kaittüinjatüin sümüsain otta jemetüinjatüin seejuu tamüin tayakai Jehová. Shia naaʼinrajatka tia chi sacerdotekai süpüla sülatinnüin naainjala wanee wayuu, moteetkalaka taaʼin naainjala chi wayuukai.

32 »›Nüsülajüinjatüle wanee anneetchon saaʼu naainjala, shiainjatü wanee anneetchon nnojotka ayuulin jee nnojotka kamojulain. 33 Niʼitaajeetkalaka najapü saaʼu shikii tü anneerü naapakat saaʼu naainjala jee nuʼuteerü aaʼin eere suʼutunuin aaʼin tü mürüt aʼajünakat tamüin tayakai Maleiwa. 34 Niasaʼa chi sacerdotekai nushulereerü süka najapira süpüshi süsha tü mürüt aapünakat saaʼu saainjala wayuu, nushulereerü shia sünain shiyaakua tü suʼuwakat mürüt sünainka tü aʼajüleekat mürüt otta amüleerü nutuma saʼatoʼu tü aʼajüleekat tü isha apütaakat. 35 Niyuʼleerü saüsü tü mürüt nüsülajakat maʼaka niyuʼluin naüsü chi anneetchon asülajünakai süpüla anajiraajachin wanee wayuu tamaa tayakai Maleiwa. Naʼajeetkalaka shia chi sacerdotekai saaʼu tü aʼajüleekat süpüla kaittüinjatüin sümüsain, naʼajeerü shia saaʼu tü naʼajakat paala tamüin tayakai Jehová. Shia naaʼinrajatka tia chi sacerdotekai süpüla sülatinnüin naainjala wanee wayuu, moteetkalaka taaʼin tü naainjalakat.