Levítico

6 Naashajaakalaka Jehová nümaa Moisés sümaa nümüin nümüin: 2 «Kaainjarale wanee wayuu jee nnojoire noonooin waneepia tamüin tayakai Jehová saaʼujee nüʼlaülaajaain saaʼu wanee kasa nukoroloko wane wayuu aapünaka paala nümüin süpüla naaʼinmajüin shia jee shiale naʼanapinnüin paala, nuʼluwajataale wanee kasa nukoroloko wane wayuu jee naʼalainparale nia 3 jee shiale nüntüin sünain wanee kasa amülouika sümaa nuunjulajüin süchiki jee naapüle nünüiki sümaa alawaain shia süchiki süpüshuaʼa tia kasa mojusü achuntunuitpakat, anuu tü naaʼinrajatkat müle naainjala: 4 niale kasirüin tia jee kaainjarale nia niiteʼerajatü tü nuʼluwalakat, niiteʼerüinjatü tü nimeejakalü akajee wayuu, tü nimeeʼeraakalü aaʼu, tü anaajeʼennakat nia jee shiale tü kasa amülouisü nüntakalü anain, 5 akaʼaya wanee kasa naapaka aaʼu nünüiki sümaa alawaain shia, niiteʼerajatü shia süpüshuaʼa, sünainjee jaʼraisü shiʼipa sülia tü nuwalaajüinjatkat naapüinjatü wanee shiʼipa sooʼomüin. Naapüinjatü tia nümüin chi kakorolokai shia soʼu tü kaʼi sütüjaanakalü aaʼu kaainjalain chi aapaashikai shia 6 jee saaʼujee kaainjalain nia tamüin tayakai Jehová, niʼikajaainjatü nümüin chi sacerdotekai wanee anneerü eekai nnojoluin kamojulain jee eekai nnojoluin ayuulin. Wanaawainjatü nujutu chi anneetkai wanaapünaa sümaa tü achuntunakat nümüin saaʼujee kaainjalain nia. 7 Oʼutunajachi aaʼin chi anneetkai nutuma chi sacerdotekai toʼupala tayakai Jehová süpüla sülatinnüinjatüin naainjala chi wayuukai, moteetkalaka taaʼin naainjala chia wayuukai».

8 Ayatakalakaʼaya naashajaain Jehová nümaa Moisés sümaa nümüin nümüin: 9 «Anuusaʼa tü puluwataainjatkalü anain Aarón namaa na nüchonniikana: ‹Anuu tü pütchi aluwataanakalü anain süchiki tü mürüt oʼutunajatkalü aaʼin sümaa saʼajünüinjatüin tamüin tayakai Maleiwa. Tia mürüt oʼutunakalü aaʼin sümaa saʼajünüin ayatajatiaʼaya shia soʼu tü sikikat saaʼu tü aʼajüleekat, siraajeerü aikat saaʼu waneemüinreeya wattaʼa maalü, ayatajatiaʼaya chuwatüin tü sikikat saaʼu tü aʼajüleekat. 10 Naʼateerü nünain chi sacerdotekai tü nüsheʼinjatkat wanee sacerdote aainjuushika süka lino, naʼatüinjatiaʼaya nünain tü nüiche aainjuushikat süka lino. Süchikijee tia, najapateerü tü paliʼi apütaakat sünainjee tü aʼajünakat paala soʼu siki saaʼu tü aʼajüleekat, niʼitaajeetka tia paliʼikat saʼatoʼu tü aʼajüleekat. 11 Naakateetkalaka tü nüsheʼin naʼatakat paala jee naʼateerü wanee shiiʼiraka, niʼikajaweetkalaka tü paliʼikat wattamüin suulia nepia na israelitakana eere süpülee shijitünawalin. 12 Ayatüinjatiaʼaya chuwatüin tü sikikat saaʼu tü aʼajüleekat, nnojotsü ayokojoonajatüin. Nuchuwajaʼawalinjatü chi sacerdotekai tü sikikat wattaʼa maalüwai saaʼu tü aʼajüleekat jee naʼajüinjatü saaʼu tü mürüt oʼutunakalü aaʼin, kaitteetkalaka saaʼu saüsü tü mürüt oʼutunakalü aaʼin aʼajünawaika süpüla anajiraainjachin wanee wayuu tamaa tayakai Maleiwa. 13 Chuwatajatü waneepia tü sikikat saaʼu tü aʼajüleekat, nnojotsü ayokojoonajatüin.

14 »›Anuu tü aluwataanakalü anain süchiki tü eküülü asülajünakat tamüin tayakai Maleiwa. Jiainjana jiakana nüchonniikana Aarón aapaka tia tamüin tayakai Jehová sümülatuʼu tü aʼajüleekat. 15 Eeinjachi wanee naʼakajee ajapatüinjachika ariina sümaa piratüin najapü saʼakajee tü eküülü asülajünakat tamüin sümaʼaleeya wanee yootchon seita jee müsia süpüshuaʼa tü ‹olíbano› eekat saaʼu tü eküülü asülajünakat tamüin, naʼajeetkalaka shia saaʼu tü aʼajüleekat süpüla kaittüinjatüin sümüsain, shiyaawase tü kasa asülajünakat tamüin tayakai Jehová süpüla jemetüinjatüin maʼin seejuu tamüin. 16 Nikeerü Aarón namaa na nüchonniikana tü apütaakat sünainjee tü asülajünakat tamüin, neküinjatü tia maʼaka shikünüin pan maʼakakat soolojia. Neküinjatü shia suluʼu süpaatiase tü miichi aʼwaajüleekat. 17 Nnojotsü aʼlakajaanajatüin suluʼu horno sümaa wanee kasa kaʼakaka soolojia. Taapüin tia namüin na nüchonniikana Aarón sünainjee tü kasa asülajuushi aʼajünakat tamüin. Kojutusü maʼin tia maʼaka kojutuin tü nüsülajawaikat wanee wayuu saaʼu tü kasa mojusü naainjakat sümaa nnojolin naaʼinjeein shia jee tü nüsülajakat wanee wayuu saaʼujee tü naainjalakat. 18 Neküinjatü tia napüshuaʼa na tooloyuu nüchonniikana Aarón, aapünawalinjatü tia namüin na nüikeyuukana Aarón süpüla kaʼikat süpüshuaʼa sünainjee tü kasa asülajuushi aʼajünawaikat tamüin tayakai Jehová. Kojuteerü wanee kasa eekai shipettüin tia kasa asülajuushikat›».

19 Naashajaakalaka Jehová nüchikuaʼa nümaa Moisés sümaa müin nünüiki nümüin: 20 «Anuu tü nüsülajüinjatkalü Aarón namaa na nüchonniikana tamüin tayakai Jehová soʼu tü kaʼi nüneekünakalü oʼu Aarón süpüla nekiipüʼüinjachin nia na sacerdotekana: asülajünajatü wanee kilo* ariina yütchonka, asülajünawalinjatü tia eküütkat tamüin, aapünajatü shiatapünaa kilo wattaʼa maalü otta tü wane shiatapünaakalü aliika. 21 Ojuruttünajatü tia sümaa seita jee aʼlakajaanajatü shia suluʼu wanee ‹sartén›. Anainjatü maʼin sujuruttia tia putuma sümaa tü seitakat, paapüinjatü tamüin suluʼu shiʼipawalin putuma tü eküülü püʼlakajaakat suluʼu tü hornokot, shia wanee kasa tamüinjatka tayakai Jehová süpüla jemetüinjatüin maʼin seejuu nümüin. 22 Niainjachi aapaka tia chi sacerdote aneekünakai nüchikumüin Aarón naʼakajee na nüchonniikana. Müinjatü sukuwaʼipa tia süpüla kaʼikat süpüshuaʼa, aapünajatü süpüshuaʼa tia süpüla saʼajünüin sümaa kaittüin sümüsain tamüin tayakai Jehová. 23 Aʼajünajatü süpüshuaʼa tamüin, süpüshuaʼa tü eküülü aapünakat nüpüleerua wanee sacerdote, nnojotsü ekünajatüin shia».

24 Naashajaakalaka Jehová nüchikuaʼa nümaa Moisés sümaa müin nünüiki nümüin: 25 «Anuu tü püküjainjatkat nümüin Aarón jee namüin na nüchonniikana: ‹Anuusa tü aluwataanakalü anain süchiki tü naapüinjatkat wanee wayuu naainjale wanee kasa mojusü sümaa nnojolin naaʼinjeein shia. Tü mürüt naapüinjatkat wanee wayuu saaʼujee naainjain wanee kasa mojusü nnojotka naaʼinjeein, oʼutunajatü aaʼin toʼupala tayakai Jehová chaa eere suʼutunuin aaʼin tü mürüt aʼajünakat tamüin. Shia wanee kasa kojutuka maʼin. 26 Niainjachi ekaka shia chi sacerdote aapakai tü mürüt oʼutunakalü aaʼin saaʼu wanee kasa mojusü naainjaka wanee wayuu sümaa nnojolin naaʼinjeein shia. Ekünajatü shia suluʼu süpaatiase tü miichi aʼwaajüleekat.

27 »›Wuleerü süpüshuaʼa tü kasa epettünakat süka shiʼiruku tü mürüt oʼutunakalü aaʼin tamüin tayakai Maleiwa, akaʼaya sütülüittüle süsha tü mürütkat saaʼu nüsheʼin wanee wayuu, puʼlojooinjatü tü sütülüittakalü aaʼu tü ishakat suluʼu wanee miichi aʼwaajülee.* 28 Süʼlakajünüle shiʼiruku tü mürütkat suluʼu wanee wushu aainjuushika süka pootshi, asoʼttunajatü tü wushukot, eekajasaʼa süʼlakajünüle suluʼu wanee aainjuushika süka cobre ooloʼojünajatü shia sümaa süʼlojoonüin süka wüin.

29 »›Nia neʼe eküinjachika tia wanee wayuu eekai sacerdotein. Shia wanee kasa kojutuka maʼin tia. 30 Eekajasaʼa niʼiruku wanee mürüt eekai oʼutunuin aaʼin saaʼu tü kasa mojusü naainjakat wanee wayuu sümaa nnojolin naaʼinjeein shia, nnojotsü ekünajatüin shia nülüʼüjale chi sacerdotekai tü nüshakat suluʼumüin tü miichi aʼwaajüleekat süpüla motuinjatüin taaʼin naainjala chi wayuu aapakai niʼiruku chia mürütkai. Aʼajünajatü tü niʼirukukat soʼu siki.