Levítico
9 Shiasaʼa soʼu tü mekiisatkat kaʼi nuunejitka Moisés Aarón, na nüchonniikana jee müshiʼiya na laülaashiikana napüleerua na israelitakana. 2 Anuujeseʼe nünüiki Moisés nümüin Aarón: «Püchajaa wanee paaʼachon eekai mamojulain jee eekai nnojolin ayuulin süpüla paapüinjachin nia saaʼu paainjala otta müshia wanee anneerü eekai nnojolin kamojulain jee eekai nnojolin ayuulin süpüla puʼutuin naaʼin jee paʼajüin nia. Piʼikajaajeechika chi paaʼachonkai jee chi anneetkai nümülatuʼu Jehová. 3 Anuu tü pünüikinjatkat namüin na israelitakana: ‹Jaapaajeechi wanee kaaʼula toolo süpüla jaapüinjachin nia saaʼu jaainjala, jaapaajeechi wanee paaʼachon nümaʼaleeya wanee anneetchon eekai waneeinnain juya süpüla juʼutuin naaʼin jee jaʼajüin naya nümüin Maleiwa, nnojoliinjana kamojulain jee nnojoliinjana ayuulin. 4 Aapeenaʼaya jia wanee paaʼa toolo, wanee anneerü toolo süpüla anajiraain jia nümaa Maleiwa, juʼuteetkalaka naaʼin nümülatuʼu Jehová. Aapeenaʼaya jia eküülü ojuruttuushika sümaa seita süka niiʼiyalaajeechin Jehová jümüin soʼukai›».
5 Neʼikajaakalaka soʼuluʼumüin tü miichi aʼwaajüleekat tü nuchuntakat Moisés, narütkaaka napüshuaʼa na israelitakana sümaa shaʼwatüin naya nümülatuʼu Jehová. 6 Anuujeseʼe nünüiki Moisés: «Shia nuluwataaka anain tia jia Jehová süpüla shiiʼiyalaain jümüin tü nüpülainkat Jehová». 7 Anuukalaka nünüiki Moisés nümüin Aarón: «Pürütkaa eemüin tü aʼajüleekat süpüla paapüinjatüin nümüin Maleiwa tü püsülajüinjatkat saaʼu paainjala otta tü paʼajüinjatkat nümüin, sülatinneetkalaka paainjala otta naainjala na püpüshikana. Paapeeriaʼaya tü nasülajakat na israelitakana süpüla sülatinnajatüin tü naainjalakat noulia maʼaka nuluwataain shia Jehová».
8 Arütkaamaatüshi Aarón eemüin tü aʼajüleekat, nuʼutakalaka naaʼin chi paaʼachonkai süpüla naapüinjachin nia saaʼu tü naainjalakat. 9 Narütkeʼeraka na nüchonniikana Aarón tü ishakat, nüchapatitkalaka Aarón najapira shiroku tü ishakat, nushuletka shia sünain shiyaakua tü suʼuwa mürüt sünainkat tü aʼajüleekat. Niʼyotoko tü isha apütaakat süʼütpaʼa tü aʼajüleekat. 10 Kaittakalaka nutuma saaʼu tü aʼajüleekat sümüsain tü saüsükat, tü süchüʼükat otta müsia tü saüsü sünainkat süpana aapünaka saaʼu saainjala wayuu maʼaka nuluwataanüin Moisés nutuma Jehová. 11 Naʼajakalaka soʼu siki niʼiruku chi paaʼachonkai otta müsia tü nütakat wattamüin suulia nepia na israelitakana.
12 Nuʼuta aaʼinria Aarón tü anneerü aʼajünajatkat, saapünaka tü ishakat nümüin Aarón natuma na nüchonniikana nütülüittitkalaka tü ishakat sutoutajee tü aʼajüleekat. 13 Saapünaka nümüin Aarón natuma na nüchonniikana saʼata tü asalaa aʼajünajatkat sümaʼaleeya tü shikiikat, kaittakalaka nutuma sümüsain saaʼu tü aʼajüleekat. 14 Nuʼlojooka tü shiyüülainkat sümaa tü suuʼuikat, kaittakalaka nutuma sümüsain saaʼu tü aʼajünakat paala saaʼu tü aʼajüleekat.
15 Naapakalaka nümüin Maleiwa tü nasülajakat na israelitakana, chi kaaʼula toolo naapakai na israelitakana saaʼu naainjala, nuʼutaka naaʼin, naapakalaka nia saaʼu naainjala na israelitakana maʼaka tü naaʼinrakat nüka chi nuʼutakai aaʼin palajana. 16 Naapüinña tü asülajünakat nümüin Maleiwa süpüla saʼajünüin nümüin, naaʼinrüin tia maʼakaapuʼu sukuwaʼipa.
17 Naapa nümüsia tü eküülü asülajünakat, najapatüin wanee najapü tia eküütkat, kaittakalaka sümüsain saaʼu tü aʼajüleekat sümaʼaleeya tü asülajuushi aʼajünakat wattaʼa maalü.
18 Nuʼuta aaʼinchia chi paaʼa toolokoi otta chi anneerü aapünakai süpüla anajiraainjanain na israelitakana nümaa Maleiwa. Saapünaka tü ishakat nümüin Aarón natuma na nüchonniikana, nütülüittitkalaka tü ishakat sutoutajee tü aʼajüleekat. 19 Eekajasaʼa naüsü chi paaʼakai, tü nüsikat chi anneetkai tü kaʼüsükat maʼin nünain sümaʼaleeya tü saüsü sünainkat tü kasa nüleʼeruukat, tü nüchüʼükat otta tü naüsü sünainkat nüpana, 20 neitaain na nüchonniikana Aarón tü saüsükat saaʼu suʼluuwain tü mürütkalüirua oʼutunakalü aaʼin, kaittakalaka sümüsain tü saüsükat nutuma Aarón saaʼu tü aʼajüleekat. 21 Eekajasaʼa tü suʼluuwainkat tü mürütkalüirua jee müsia tü suuʼui shikialuʼujeekat, niʼyuunalüin shia Aarón süka shiain wanee kasa asülajuushi aʼyuunannaka nümülatuʼu Jehová maʼaka nuluwataain shia Moisés.
22 Süchikijee naapüin Aarón tü asülajünakat saaʼu saainjala wayuu, tü aʼajünajatkat nümüin Maleiwa jee müsia tü saapakat wayuu süpüla anajiraain shia nümaa Maleiwa, niyalerüin najapü wanaapünaa namaa na israelitakana, nuchuntakalaka anaa napüleerua, nüshakatakalaka saaʼujee tü aʼajüleekat. 23 Nikerotakalaka Moisés nümaa Aarón suluʼumüin tü miichi aʼwaajüleekat, ojuʼitushiijeseʼe naya mapa jee nachuntakalaka anaa napüleerua na israelitakana.
Eeʼiyataasüjeseʼe tü nüpülainkat Jehová noʼupala napüshuaʼa na israelitakana. 24 Nüjütaka Jehová wanee siki iipünaajee sajaʼttiraka tü asülajünakat nümüin sümaʼaleeya tü saüsü eejatkat saaʼu tü aʼajüleekat, neʼrakalaka tia napüshuaʼa na israelitakana. Aʼwaatüshiijeseʼe naya sutuma ponuin maʼin naaʼin tia, naʼwachiraaka mmoluʼu.