Levítico

11 Anuujeseʼe nünüiki Jehová nümüin Moisés jee nümüin Aarón: 2 «Anuu tü jüküjainjatkat namüin na israelitakana: ‹Anuu tü kasa katakalü oʼu süpaʼa tü mmakalü eeka süpüla jiküin: 3 jiküinjatü süpüshuaʼa tü mürüt eekai kawakalain apatoʼu jee eekai keinoluin apatoʼu sümaʼaleeya türa eekai eiteʼerüin shiküin süleʼeruʼujee süpüla sükünajüin shia süchikuaʼa.

4 »›Anuu tü mürüt nnojoluinjatkat jiküin saʼakajee tü mürülü eekai eiteʼerüin shiküin süleʼeruʼujee süpüla sükünajüin shia süchikuaʼa jee shiale tü eekai kawakalain apatoʼu. Nnojotsü jiküinjatüin shiʼiruku kameeya, eiteʼerüsü shiküin süleʼeruʼujee süpüla sükünajüin shia süchikuaʼa, nnojotpejeʼe kawakalain süpatoʼu. Nnojotsü wulein shiʼiruku süpüla jiküinjatüin shia. 5 Müsia neʼe tü kanüliakat «damán», mayaainjeʼe shiiteʼerüin shiküin süleʼeruʼujee süpüla sükünajüin shia süchikuaʼa, nnojotsü kawakalain süpatoʼu. Nnojotsü wulein shiʼiruku süpüla jiküinjatüin shia. 6 Müsia neʼe tü atpanaakat, mayaainjeʼe shiiteʼerüin shiküin süleʼeruʼujee süpüla sükünajüin shia süchikuaʼa, nnojotsü kawakalain süpatoʼu. Nnojotsü wulein shiʼiruku süpüla jiküinjatüin shia. 7 Müsia neʼe tü püülükükat, kawakalasü süpatoʼu jee keinotsü süpatoʼu nnojotpejeʼe shiiteʼerüin shiküin süleʼeruʼujee süpüla sükünajüin shia süchikuaʼa. Nnojotsü wulein shiʼiruku süpüla jiküinjatüin shia. 8 Nnojotsü wulein shia süpüla jiküinjatüin shiʼiruku jee jipettüinjatüin outapa shia.

9 »›Anuu tü seʼe wüin eekat süpüla jiküin: eeshii süpüla jiküin tü eekai katünain jee tü eekai kolin shirokujatka palaa jee shirokujatka süchi. 10 Nnojotpejeʼe wulein süpüla jiküinjatüin süpüshuaʼa tü seʼe palaa jee tü seʼe süchi eekai nnojoluin katünain jee eekai nnojoluin kolin, jaʼitasü shiain tü wattakat maʼin saalii jee tü katakalü oʼu shiroku wüin. 11 Nnojotsü jiküinjatüin shiʼiruku süka yarüttüin shia jümüin jee nnojotsü jipettüinjatüin outapa shia. 12 Süpüshuaʼa tü seʼekat wüin nnojotka katünain jee nnojotka kolin, nnojotsü wulein shia jümüin.

13 »›Anuu tü wüchii waawatakalü iipünaapünaa jülerajüinjatka, nnojotsü wulein süpüla jiküinjatüin wüchiikalüirua tüü: tü kanüliakalü águila, tü kanüliakalü águila ekütka jime, samut, 14 tü kanüliakat milano real, süpüshuaʼa tü wüchii kanüliakat milano mütsiiaka ata, 15 süpüshuaʼa tü wüchii kanüliakat cuervo, 16 tü kanüliakalü avestruz, tü kanüliakat lechuza, tü kanüliakat gaviota, süpüshuaʼa tü wüchii kanüliakat halcón, 17 konkon, tü kanüliakat cuervo marino, monkolonseerü joʼuuchon, 18 tü kanüliakat cisne, yolija, tü kanüliakat buitre, 19 tü kanüliakat cigüeña, süpüshuaʼa tü wüchii kanüliakat olo, tü kanüliakalü abubilla otta püsichi. 20 Nnojotsü wulein süpüla jiküinjatüin tü wüchiichein katünasükat wattaka maʼin saalii süpaʼapünaa tü mmakat sümaa waraittüin shia süka tü pienchisükat suuʼui.

21 »›Sünainjee tü wüchiicheinkalüirua katünasükat wattaka maʼin saalii süpaʼapünaa tü mmakat sümaa waraittüin shia süka tü pienchisükat suuʼui, shia neʼe eeka süpüla jiküin tü eekai miyoʼuin piamasü süsaʼa suulia tü wanee süsaʼakalüirua sümaa wonnatüin shia süpaʼapünaa tü mmakat. 22 Anuu tü eekat süpüla jiküin: süpüshuaʼa tü kaashapakat, juʼi otta müsia akala. 23 Nnojotpejeʼe wulein süpüla jiküinjatüin waneirua wüchiichein eekai katünain wattaka maʼin saalii süpaʼapünaa tü mmakat, waraittaka süka tü pienchisükat suuʼui. 24 Yarütteeriaʼaya jukuwaʼipa jiküle shia, yarütteechiaʼaya chi eekai epettüin shia outapa shia. Waneʼereeya wulein nia motsopa kaʼikat. 25 Chi eekai nülüʼüjain tia wüchiikat sümaa outuin shia, acheküshi nüshijaainjachin nüsheʼin, waneʼereeya wulein nia motsopa kaʼikat.

26 »›Nnojotsü wulein süpüla jiküinjatüin shiʼiruku eekai kawakalain apatoʼu sümaa nnojoluin keinoluin shia jee eekai nnojoluin eiteʼerüin shiküin süleʼeruʼujee süpüla sükünajüin shia süchikuaʼa. Yarütteechi chi eekai epettüin shia. 27 Nnojotsiaʼaya wulein süpüla jiküinjatüin tü eekai waraittüin süka tü pienchisükat suuʼui, eekai sukoyojuin süka süpaʼa suuʼui.* Yarütteechiaʼaya chi eekai epettüin shia outapa shia. Waneʼereeya wulein nia motsopa kaʼikat. 28 Chi eekai nülüʼüjain tia wüchiikat sümaa outuin shia, acheküsü nüshijaainjatüin nüsheʼin. Waneʼereeya wulein nia motsopa kaʼikat. Nnojotsü wulein shiʼiruku süpüla jiküinjatüin shia.

29 »›Saʼakajee süpüshuaʼa tü wattakat maʼin saalii süpaʼapünaa tü mmakat, anuu tü nnojotkat wulein süpüla jiküin: tü kanüliakat rata topo, kookoocheʼerü, süpüshuaʼa tü lemütüsükat mmoluʼu, 30 jaatut, tü kanüliakat lagarto miyoʼu, tü kanüliakat salamandra seʼeka wüin, tü kanüliakat lagartija jee tü kanüliakat camaleón. 31 Nnojotsü süpüla jiküinjatüin tia wüchii wattakat saalii süpaʼapünaa tü mmakat. Yarütteechiaʼaya chi eekai epettüin shia outapa shia, waneʼereeya wulein nia motsopa kaʼikat.

32 »›Outulejeʼeya shia sümaa sujutuuin saaʼu wanee kasa, yarütteeriaʼaya tü kasa sujutuukalü aaʼu, shialejeʼeya wanee kasa aainjuushika süka taapüla, wanee kuluulu, süta mürüt jee shiale shiʼipa kuluulu shiyaawaseka mojuu aaʼin. Eʼitaanajatü shiroku wüin tia kasa sujutuuka aaʼu, waneʼereeya wulein shia motsopa kaʼikat. 33 Asolojünüinjatiaʼaya tü iita atüküüshikat süka pootshi sujutuule tü wüchiikat suluʼu otta yarütteerü tü kasa suluʼukat. 34 Yarütteerü süpüshuaʼa tü eküülü oʼyotuukalü aaʼu tü wüin sulujutkat tia iitakat otta yarütteerü süpüshuaʼa tü asüüshi sulujutkat. 35 Yarütteerü süpüshuaʼa tü kasa sujutuukalü aaʼu tia wüchii eekai outuin, shiale wanee «horno» jee küʼliki, asolojunüinjatü shia, yarüttüsü tia kasakalüirua jee ayateeria yarüttüin shia jümüin. 36 Shia ayateetka wulein eere süparalüin wüin jee tü ishi kaluʼukat wüin. Akaajasaʼa chi wayuu epettakai tü wüchii outusükat, yarütteechi nia. 37 Ayateeria wulein wanee waüyee eekai süpünajünüinjatüin jaʼitairü sujutuuin saaʼu tia wüchii outusükalüirua. 38 Yarütteeriaʼaya jümüin tia waüyeekat sujutuule saaʼu tia wüchii outusükalüirua sümaa chüʼlüin tia waüyeekat.

39 »›Outule joo wanee mürüt eeka süpüla jiküin, yarütteechi chi wayuu epettakai shia. Waneʼereeya wulein nia motsopa kaʼikat. 40 Eere wanee wayuu ekakai tia mürüt eekai outuin, acheküshi nüshijaain nüsheʼin, waneʼereeya wulein nia motsopa kaʼikat. Akaʼaya eere wanee wayuu alüʼüjakai tia mürüt eekai outuin, nüshijaainjatü nüsheʼin, waneʼereeya wulein nia motsopa kaʼikat. 41 Nnojotsü wulein tia wüchiikat wattaka maʼin saalii süpaʼapünaa tü mmakat, nnojotsü anain süpüla jiküinjatüin shia. 42 Nnojotsü jiküinjatüin wanee wüchii eekai lemütüin mmoluʼu, wanee wüchii eekai waraittüin süka tü pienchisükat suuʼui jee wanee wüchii eekai wattain maʼin saalii süpaʼapünaa tü mmakat jee wainmaka maʼin ooʼui süka yarüttüin shia. 43 Nnojo yarüttüin jukuwaʼipa toʼupala tayakai Maleiwa sünainjee tia wüchii wattakat maʼin saalii süpaʼapünaa tü mmakat jee nnojo yarüttüin jia sünainjee tia wüchiikalüirua. 44 Jaaʼinrüinjatü tia süka tayain Jehová chi Jümaleiwasekai, akatannajana jia tamüin jee wuleinjatü jukuwaʼipa maʼaka wulein takuwaʼipa. Müshiijeseʼe nnojoliinjanain yarüttüin jia sünainjee wüchii eekai wattain saalii süpaʼapünaa tü mmakat jee eekai waraittüin. 45 Taya chi kanüliakai Jehová, chi ayuʼlakai jia suluʼujee tü mmakalü Egipto süpüla tayain Jümaleiwasein, wuleinjatü jukuwaʼipa maʼaka wulein takuwaʼipa.

46 »›Tia shia tü aaʼinnajatkat süka tü mürütkat, tü wüchii waawatakalü iipünaapünaa, tü seʼekat wüin otta süpüshuaʼa tü wüchii wattakat maʼin saalii süpaʼapünaa tü mmakat 47 süpüla sütüjaanüin aaʼu jaralin wulein jee tü nnojotkat wulein, tü anakat süpüla ekünaa jee tü nnojotkalü anain süpüla ekünaa›».