Levítico
10 Shiasaʼa mapa naapaain Nadab nümaa Abihú na nüchonniikana Aarón tü süpülajanakat sikemechi, neʼitaakalaka sikoʼu suluʼu jee neʼitaain saaʼu tia sikoʼukat tü wunuʼu aʼajuushi jemetakalü eejuu, kaittakalaka sümüsain natuma nümülatuʼu Jehová, nnojoishii nuluwataain naya sünain aaʼinraa tia. 2 Nuluwataakalaka Jehová sikoʼu nooʼomüin, jotokalaka naya nutuma, outushiijeseʼe naya nümülatuʼu Jehová. 3 Naashajaakalaka Moisés nümüin Aarón sümaa nümüin nümüin: «Anuusa nünüiki Jehová: ‹Kojuteechi taya natuma na pejekana tanain jee naʼwaajeechi taya napüshuaʼa na israelitakana›». Koʼuuu nümakaʼa neʼe Aarón.
4 Niasaʼa Moisés neenajiraka Misael nümaa Elzafán na nüchonniikana Uziel chi nüʼlaülakai Aarón, anuukalaka nünüiki Moisés namüin: «Jalainna yaamüin, jiyuʼla na juwalayuukana suluʼujee tü miichi aʼwaajüleekat, jiʼikajaa naya wattamüin suulia nepia na israelitakana». 5 Oʼunushiijeseʼe naya, nanainjatü müliashii tü nasheʼin süpülajatkat sacerdotein naya, nalüʼüjakalaka naya wattamüin suulia nepia na israelitakana maʼaka nuchuntuin shia Moisés namüin.
6 Anuukalaka nünüiki Moisés süchikijee tia nümüin Aarón jee nümüin Eleazar jee müshia Itamar na nüchonniikana Aarón: «Nnojo juuʼulaain miyoʼuin juʼwala, nnojo juuʼulaain shokuleraain shia jee nnojo jüchatajaain jüsheʼin suulia outajüin jia jee suulia naashichijaain Maleiwa nooʼomüin napüshuaʼa na israelitakana. Nayeena aʼyalajaka napüshuaʼa na juwalayuu israelitakana naaʼu na wayuu nuʼutakana aaʼin Jehová süka sikoʼu. 7 Nnojo wattaluʼuin jia suulia soʼu tü miichi aʼwaajüleekat, wattaluʼule jia outeena jia süka saaʼuin jikii tü seita oʼyotunakat saaʼu nikii wanee wayuu süpüla nüneeküin nia Jehová». Oonooshiijeseʼe naya sümaa nünüiki Moisés.
8 Anuukalaka nünüiki Jehová nümüin Aarón süchikijee tia: 9 «Nnojoishi pia asüinjachin wiino jee nnojotsü nasüinjatüin shia na püchonniikana sümaʼaleeya yootshi eekai eein jikerotopa suluʼu tü miichi aʼwaajüleekat, nnojotsü jüsüinjatüin shia süpüla nnojoliinjanain outuin jia. Naaʼinrajatü tia na jüikeyuukana süpüla kaʼikat süpüshuaʼa. 10 Jütüjaajeetkalaka saaʼu naatain tü kasa aapünajatkat tamüin tayakai Maleiwa suulia tü kasa nnojotkalü aapünajatüin tamüin jee naatain tü kasa yarüttüsükat suulia tü kasa wulesükat 11 jee jikirajüinjana na israelitakana sünain süpüshuaʼa tü kasa taluwataakalü anain tayakai Jehová nükajee Moisés».
12 Anuukalaka nünüiki Moisés nümüin Aarón, nümüin Eleazar jee nümüin Itamar na nüchonniikana Aarón apütaakana nüpüla: «Anakajaʼa jaapaale tü eküülü apütaakat, tü apütaakat sünainjee tü eküülü aʼajuushi aapünakat nümüin Jehová, jiküinjatü shia maʼaka jiküin pan maʼakakat soolojia süʼütpaʼa tü aʼajüleekat süka shiain wanee kasa kojutuka maʼin. 13 Jiküinjatü shia eekai tü miichi aʼwaajüleekat süka shiain tü aapünajatkat pümüin jee shiain tü aapünajatkat namüin na püchonniikana sünainjee tü kasa asülajuushi aʼajünakat nümüin Jehová süka shiain aluwataanüin anain taya tia. 14 Jiküinjatiaʼaya eekai tü miichi aʼwaajüleekat suʼluuwain tü mürüt oʼutunakalü aaʼin sümaa shiʼyuunaluushin nümüin Maleiwa jee tü süpüʼü aapünakat namüin na sacerdotekana. Piküinjatü shia namaa na püchonnii tooloyuukana jee müshiʼiya na jieyuukana süka shiain tü aapünajatkat pümüin jee tü aapünajatkat namüin püchonnii sünainjee tü naapakat na israelitakana süpüla anajiraainjanain naya nümaa Maleiwa. 15 Jülüʼüjainjatü tü süpüʼü namüinjatkat na sacerdotekana jee müsia suʼluuwain tü mürüt oʼutunakalü aaʼin sümaa shiʼyuunaluushin nümüin Maleiwa jee müsia saüsü tü aapünakat nümüin Maleiwa aʼajünaka soʼu siki, aʼyuunannüinjatü tia nuʼupala Jehová, shia aapünajatka tia pümüin waneepia jee namüin na püchonniikana maʼaka nuluwataain shia Jehová».
16 Nüchajaakalaka maʼin Moisés nüchiki chi kaaʼula oʼutunajachikai aaʼin saaʼu saainjala wayuu jee nütüjaapa saaʼu nuʼutunuichipain aaʼin jee naʼajünüichipain, naashichijaakalaka nooʼomüin Eleazar jee nooʼomüin Itamar na nüchonnii Aarón apütaakana nüpüla sümaa nümüin namüin: 17 «¿Jamüshii nnojoliikaʼa jiküin tü asülajünakat saaʼu saainjala wayuu eekai tü miichi aʼwaajüleekat süka shiain wanee kasa kojutuka maʼin? ¿Aashin saapünüin jümüin süpüla jusoutajanain saaʼu tü kasa mojusü naaʼinrakat na israelitakana jee süpüla sülatinnüin naainjala noulia nuʼupala Jehová? 18 Nnojotsü alüʼüjünüin süsha tü mürütkat suluʼumüin tü miichi aʼwaajüleekat, jiküinjatia shiʼiruku tü mürüt oʼutunakalü aaʼin eekai tü miichi aʼwaajüleekat maʼaka taluwataanüin anain». 19 Nusoutakalaka Aarón nümüin Moisés sünain maa: «Noʼuta aaʼinrü na tachonniikana soʼukai tü mürüʼlü aapünajatkat saaʼu naainjala jee tü mürüt naʼajüinjatkat nuʼupala Jehová, tayapejeʼe alatüin amüin tü kasachikikat. ¿Anashiisüchejeʼe nümüin Jehová teküle soʼukai shiʼiruku tü mürüt oʼutunakalü aaʼin saaʼu saainjala wayuu?». 20 Anakalaka nümüin Moisés tü nümakalü Aarón naapaiwaʼaya shia.